Փաստ ինֆո

Ամանորի գիշերը «Սեֆ Ինթերնեյշնլ» ՈւՎԿ- ի Վանաձորի մասնաճյուղից առանձնապես խոշոր չափերի գողության գործով հետախուզող Արսեն Գրիգորյանին մահացած հայտնաբերելու գործով «Փաստինֆո»-ին նոր տեղեկություններ է հայտնի դարձել:

1970թ. ծնված Գրիգորյանի դին հայտնաբերվել էր կնոջ գերեզմանի մոտ, դիակի կողքին հայտնաբերվել էր նաև ներարկիչ՝ որոշակի նյութով:

Արդյունքում պարզվել է, որ այդ նյութը եղել է մեթադոն տեսակի թմրամիջոց:

«Փաստինֆո»-ն Քննչական կոմիտեից տեղեկացավ, որ այդ փաստով հարուցվել է քրեական գործ՝ ՀՀ քրեական օրենսգրքի 266-րդ հոդվածի 1-ին մասով՝ թմրամիջոց իրացրած անձի ինքնությունը պարզելու նպատակով:

Ավելի վաղ տեղեկացրել էինք, որ 2018թ. հունվարի 1-ին «Սեֆ Ինթերնեյշնլ» ՈՒՎԿ Վանաձորի մասնաճյուղի կառավարչից ահազանգ էր ստացվել, որ գրասենյակից կատարվել է գողություն: Ենթադրյալ հանցագործություն կատարած անձը, տեխնիկական միջոցների գործադրմամբ պատուհանը բացելով, Ամանորի գիշերը մուտք է գործել գրասենյակ, բացել չհրկիզվող պահարանը և հափշտակել առկա կանխիկ գումարը և քաղաքացիների կողմից գրավադրված ոսկյա զարդերը:

Դեպքի առթիվ ՀՀ քննչական կոմիտեի Լոռու մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 177-րդ հոդվածի 3-րդ մասի 1-ին կետով:
Պարզվել էր, որ հափշտակությանն առնչություն է ունեցել վարկային կազմակերպության մասնաճյուղի կառավարիչը և որ գողության իրականացումը ծրագրվել է դեռևս 2017 թվականի օգոստոսին՝ նրա նախաձեռնությամբ: Կառավարիչը համաձայնություն է ձեռք բերել Երևանի բնակչի Գրիգորյանի հետ, իսկ գողությունը կատարվել էր երկու փուլով։

2017թ. դեկտեմբերի 29-ի երեկոյան՝ մասնաճյուղի աշխատակիցների հեռանալուց հետո, կառավարիչն անջատել է թվային տեսագրության համակարգը և դրամապահոցից գաղտնի հափշտակել առանձնապես խոշոր չափերով ոսկյա զարդերը և առկա առանձնապես խոշոր չափերի գումարը, ապա 2018 թվականի հունվարի 01-ին՝ ժամը 00:14-ի սահմաններում, մյուս քաղաքացին, մասնաճյուղի պատուհանը տեխնիկական միջոցների գործադրմամբ բացելով, ապօրինի մուտք է գործել գրասենյակ, անջատել անվտանգության համակարգը, իր մոտ գտնվող կրկնօրինակ բանալիով բացել դրամապահոցի դուռը, գաղտնի հափշտակել մնացած ոսկյա զարդերը և գումարը:

Քրեական գործով կատարված քննչական գործողությունների արդյունքում հայտնաբերվել են կառավարչի կողմից դեկտեմբերն 29-ին հափշտակված գումարը և ոսկյա զարդերը։

Ձեռք բերված բավարար ապացույցների հիման վրա՝ մասնաճյուղի կառավարչին և գողոնը պահած նրա ընկերոջը մեղադրանք էր առաջադրվել, իսկ Արսեն Գրիգորյանի նկատմամբ հայտարարվել է հետախուզում:

Հունվարի 8-ից հետախուզման մեջ գտնվող Արսեն Գրիգորյանին հայտնաբերեցին հունվարի 28-ին՝ կնոջ գերեզմանի կողքին:

Դատաբժշկի հայտնած նախնական տվյալներով՝ նրա մահվան պատճառ է հանդիսացել սրտի կաթվածը։ Նշանակվել է դիակի դատաբժշկական փորձաքննություն:

Աղբյուր` Փաստինֆո