Փաստ ինֆո

20 զորակոչիկի ամառային զորակոչից ազատելու հիմք հանդիսացող հիվանդությունների կեղծ ախտորոշումներով` կաշառքի դիմաց ակտեր տրամադրելու գործով վերաքննիչ բողոք է ներկայացվել:

«Փաստինֆո»-ն ավելի վաղ տեղեկացրել էր, որ քրեական գործով ամբաստանյալի աթոռին են հայտնվել «Քանաքեռ-Զեյթուն բժշկական կենտրոնի» ակնաբուժական կլինիկայի գլաուկոմայի բաժանմունքի վարիչը, նույն ԲԿ-ի ակնաբուժական կլինիկայի ղեկավարը, «Մալայանի անվան ակնաբուժական կենտրոնի» բժշկական փորձագիտության գծով փոխտնօրենը և Թալինի տարածքային զինվորական կոմիսարը:

Այսպիսով, ըստ մեղադրանքի՝ բաժանմունքի վարիչը, ընդգրկված լինելով բժշկական կենտրոնի զորակոչիկների բժշկական փորձաքննություն իրականացնող հանձնաժողովի կազմում՝ նախնական համաձայնության գալով նույն բժշկական կենտրոնի ակնաբուժական կլինիկայի ղեկավար, հանձնաժողովի մյուս անդամ  և «Մալայանի անվան ակնաբուժական կենտրոնի» բժշկական փորձագիտության գծով փոխտնօրեն, բժշկական կենտրոնի զորակոչիկների բժշկական փորձաքննություն իրականացնող հանձնաժողովի անդամի հետ, իր լիազորությունների շրջանակում գործողություն կատարելու՝ թվով 20 զորակոչիկների վերաբերյալ 2014թ. ամառային զորակոչից ազատելու հիմք հանդիսացող ախտորոշմամբ առողջական վիճակի հետազոտման ակտեր տրամադրելու համար ինքնությունը չպարզված անձանցից որպես կաշառք ստացել է տարբեր չափի գումարներ, կամ, օգտագործելով իր պաշտոնեական դրությունը, միջնորդել է  կաշառքի դիմաց տրամադրել այդպիսի ակտեր։

Ըստ զինվորական կոմիսարին առաջադրված մեղադրանքի՝ 1992թ. Լեռնային Ղարաբաղի սահմանների պաշտպանության մարտական գործողությունների մասնակցելու ընթացքում ապօրինի ձեռք է բերել և Արագածոտնի մարզի Աշնակ գյուղում գտնվող իր առանձնատուն է տեղափոխել թվով 92 հատ 9 մմ տրամաչափի և 476 հատ 7,62մմ տրամաչափի ռազմամթերք հանդիսացող փամփուշտներ։ Բացի այդ, վերջինս, ծառայելով Թալինի տարածքային զինկոմիսարիատում որպես զինվորական կոմիսար, կոչումով մայոր, հանդիսանալով պաշտոնատար անձ, օգտագործելով իր պաշտոնեական դիրքը, կատարել է կաշառքի միջնորդություն։

Բաժանմունքի վարիչին մեղադրանք է առաջադրվել ՀՀ քրեական օրենսգրքի 311-րդ հոդվածի 3-րդ մասի 2,3 կետերով և 313-րդ հոդվածի 2-րդ կետով, «Մալայանի անվան ակնաբուժական կենտրոնի» բժշկական փորձագիտության գծով փոխտնօրեն՝ 311-րդ հոդվածի 3-րդ մասի 2,3 կետերով և 313-րդ հոդվածի 2-րդ մասի 2-րդ կետով, կլինիկայի ղեկավարին՝ 311-րդ հոդվածի 3-րդ մասի 2,3 կետերով, զինվորական կոմիսարին 313-րդ հոդվածի 2 –րդ մասի 2-րդ կետով և 235-րդ հոդվածի 1-ին մասով: Կաշառքի դիմաց կեղծ ակտեր տրամադրելն են արժեցել է 500-1500 ԱՄՆ դոլար:

Բաժանմունքի վարիչը, դատաքննության ընթացքում օգտվել է իր դատավարական իրավունքից, հրաժարվել է ցուցմունք տալուց, սակայն իր վերջին խոսքում հայտնել է, որ առաջադրված մեղադրանքի հետ համաձայն չէ, սակայն մասնակիորեն իրեն մեղավոր է ճանաչել և նշել, որ թույլ է տրվել որոշակի սխալներ, խնդրելով իր նկատմամբ մեղմ մոտեցում ցուցաբերել:
Գործով մյուս ամբաստանյալներն իրենց մեղավոր չեն ճանաչել առաջադրված մեղադրանքում:

Ավելին, զինվորական կոմիսարը հայտարարել է, թե ինքը կաշառքի միջնորդություն չի կատարել ընդամենը զինծառայողի հորը որպես համագյուղացի ճանաչելով և տեղեկանալով, որ երիտասարդը ունի տեսողության հետ կապված խնդիրներ՝ դիմել է «Մալայանի անվան ակնաբուժական կենտրոնի» բժշկական փորձագիտության գծով փոխտնօրենին, որպեսզի ակտում նշվի զորակոչիկի իրական հիվանդությունը:

Ինչ վերաբերում է ապօրինի զենքի պահելու դրվագին, ապա այդ մասով նա իրեն մեղավոր է ճանաչել:

Արաբկիր և Քանաքեռ -Զեյթուն վարչական շրջանի ընդհանուր իրավասության դատարանի դատավճռով՝ բաժանմունքի վարիչը եւ փոխտնօրենը  դատապարտվել են 4 տարի ժամկետով ազատազրկման, սակայն նրանց նկատմամբ նշանակված պատիժը պայմանականորեն չի կիրառվի՝ նշանակվել է 2 տարի ժամկետով փորձաշրջան:

Կլինիկայի ղեկավարը դատապարտվել է 4 տարի ժամկետով ազատազրկման, իսկ կոմիսարը՝ ՀՀ քրեական օրենսգրքի 313-րդ հոդվածի 2-րդ մասի 2-րդ կետով դատապարտվել է 300 000 ՀՀ դրամ տուգանքի, իսկ ՀՀ քրեական օրենսգրքի 235-րդ հոդվածի 1-ին մասով` 1 տարի ժամկետով ազատազրկման:

Նշենք նաև, որ գործով վերաքննիչ բողոք է բերվել նախ դատախազի կողմից՝ պահանջով խստացնել պատիժը։

Վերաքննիչ բողոք է բերվել նաև կոմիսարի կողմից՝ պահանջով բեկանել և փոփոխել Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի` իր մասով դատավճիռը՝ և ՀՀ քրեական օրենսգրքի 313 –րդ հոդվածի 2-րդ մասի 2-րդ կետով առաջադրված մեղադրանքում ճանաչել և հռչակել իր անմեղությունը, իսկ 235-րդ հոդվածի 1-ին մասով նշանակված պատիժը, բավարարվելով արդեն իսկ նախաքննության ընթացքում կրած 5 ամիս 16 օր կալանավորման ժամկետով կամ նշանակված պատիժը պայմանականորեն չկիրառել:

Կլինիկայի ղեկավարի կողմից բերված վերաքննիչ բողոքով պահանջ է ներկայացվել բեկանել իր վերաբերյալ դատավճիռը, ճանաչել և հռչակել իր անմեղությունը, իսկ մեղքը հաստատված համարելու դեպքում նրա նկատմամբ ազատազրկման ձևով նշանակված պատիժը պայմանականորեն չկիրառել` սահմանելով փորձաշրջան:

Աղբյուր` Փաստինֆո