Փաստ ինֆո

«Շենգավիթ» ԲԿ-ում ծննդկան Մերի Մարգարյանի և նրա նորածնի մահվան գործով մեղադրող դատախազ Արա Մնացականյանը հաջորդ դատական նիստում կներկայացնի կրկնակի դատաբժշկական փորձաքննություն անցկացնելու մասին միջնորդություն:

Իսկ մինչ այդ, Շենգավիթ վարչական շրջանի ընդհանուր իրավասության դատարանում, նախագահությամբ Դավիթ Բալայանի, երկար ընդմիջումից հետո այսօր կայացավ գործով դատական նիստը:

Հիշեցնենք, որ գործին կցված ռուսերեն լեզվով փաստաթղթերը դատարանի կողմից թարգմանության էր հանձնվել դեռևս ամիսներ առաջ, սակայն այդ փաստաթղթերը պատշաճ կերպով չէին թարգմանվել և նախագահողը հետ էր ուղարկել նույն կազմակերպությանը՝ որոշման մեջ նշելով, որ չի կատարվել դատարանի պահանջը, ավելին՝ որոշ փաստաթղթեր, որոնք էլ թարգմանվել են, չի կցվել ռուսերեն տեքստը:

Այսպիսով, փաստաթղթերն այս անգամ թարգմանվել էին, սակայն Շուշանիկ Բախշյանի կողմից գրված փաստաթղթերը չէին թարգմանվել, վերջինս չէր ներկայացել և հեռախոսազանգերին ևս չէր պատասխանել:

Բժիշկներին թարգմանությանը ներգրավելու նպատակն այն էր, որ անընթեռնելի ձեռագրերով գրաված փաստաթղթերը ճիշտ թարգմանվեն:

Այսպիսով, այդ փաստաթղթերի հետազոտումից հետո էլ մեղադրող դատախազը դատաքննությունը լրացնող միջնորդություն հայտնելու նպատակով դատարանին խնդրեց իրեն ժամանակ տրամադրել. մասնավորապես՝ դատախազը հայտարարեց, որ առկա է կրկնակի դատաբժշկական փորձաքննություն նշանակելու անհրաժեշտություն, որը, սակայն, կներկայացնի հաջորդ դատական նիստում:

Հիշեցնենք, որ ըստ մեղադրանքի՝ Շուշանիկ Բախշյանը, աշխատելով «Շենգավիթ բժշկական կենտրոն» ՓԲԸ-ում՝ որպես մանկաբարձ-գինեկոլոգ, հանդիսանալով բժշկական օգնություն և սպասարկում իրականացնող անձ, 2015թ. փետրվարի 11-ից հաշվառման է վերցրել և վարել Մերի Վաղինակի Մարգարյանի հղիությունը:

Բժշկական օգնությունը և սպասարկումը կազմակերպելու ժամանակ պարտավոր լինելով Մերի Մարգարյանին ցուցաբերել անհետաձգելի, առաջին բժշկական օգնություն՝ անկախ այդ օգնության դիմաց վարձատրությունը երաշխավորող հիմքերի և այլ հանգամանքների առկայությունից, ինչպես նաև՝ ապահովել ցուցաբերվող բժշկական օգնության և սպասարկման քանակական և որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի՝ Մերի Մարգարյանի, այնուհետև` նորածնի մահը:

Գործով մեղադրանք է առաջադրվել նաև Նույն ԲԿ-ի մանկաբարձ-գինեկոլոգ Անի Բաբելյանին: Վերջինս 2015թ. հուլիսի 25-ին բժշկական օգնությունը և սպասարկումը կազմակերպելու ժամանակ պարտավոր լինելով Մերի Մարգարյանին ցուցաբերել անհետաձգելի, առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի և այլ հանգամանքների առկայությունից, ինչպես նաև՝ ապահովել ցուցաբերվող բժշկական օգնության և սպասարկման քանակական և որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի` Մերի Մարգարյանի, այնուհետև` նորածնի մահը:

Ավելի վաղ տեղեկացրել էինք, որ դատաբժշկական հանձնաժողովը պարզել է, որ Մերի Մարգարյանի և նրա նորածին դստեր կյանքը փրկելու հնարավորությունն ավելի մեծ կլիներ, եթե նրան շուտ ծննդալուծեին՝ կեսարյան հատման միջոցով:

Սակայն Մերի Մարգարյանը 4 օր շարունակ ունեցել է բարձր ջերմություն, «Շենգավիթ» ԲԿ մանկաբարձ-գինեկոլոգ Շուշանիկ Բախշյանը, ով եղել է հղիի բժշկական օգնություն և սպասարկում իրականացնող բժշկուհին, պարտավոր լինելով նրան հոսպիտալացնել, հրաժարվել և չի կատարել իր պարտականությունները. այս պայմաններում հղիին չհոսպիտալացնելը չի հիմնավորվել:
Բժշկի կողմից ցուցաբերված անբարեխիղճ վերաբերմունքի հետևանքով Մերի Մարգարյանը ծննդալուծումից հետո «HELLP» սինդրոմ համախտանիշ երկկողմանի թոքաբորբ» ախտորոշմամբ 2015թ-ի հուլիսի 29-ին մահացել է, կնոջ մահվան հաջորդ օրը թոքերի և գլխուղեղի այտուցից մահացել է նաև նրա նորածին դուստրը:

Իսկ ներկայումս արդեն ամբաստանվող մյուս բժշկուհին՝ Անի Բաբելյանն էլ 2015 թվականի հուլիսի 25-ին առավոտյան, եղել է հերթապահ մանկաբարձ-գինեկոլոգը, սակայն նա նույն օրը բարձր ջերմությամբ ԲԿ դիմած Մերի Մարգարյանին չի հոսպիտալացրել, ինչի հետևանքով առաջացած բազմաօրգանային անբավարարությունից Մ.Մարգարյանն օրեր անց՝ հուլիսի 29-ին, մահացել է:

Շուշանիկ Բախշյանին և Անի Բաբելյանին մեղադրանք է առաջադրվել ՀՀ քրեական օրենսգրքի 130-րդ հոդվածի 2-րդ մասի հատկանիշներով (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ):

Աղբյուր` Փաստինֆո