Փաստ ինֆո

Կալիֆորնիայի ոստիկանությունը ձերբակալել է ընտանեկան զույգի, որը կասկածվում է իրենց իսկ երեխաներին բանտարկության մեջ պահելու մեջ: Կալիֆորնիական Պերրիս քաղաքի տանը ոստիկանները հայտնաբերել են 13 երեխայի, որոնցից ամենակրտսերը երկու տարեկան է, իսկ ամենաավագը՝ 29: Նրանցից մի քանիսը շղթաներով գամված են եղել մահճակալներին:

Ըստ BBC-ի ռուսական ծառայության, երեխաների կյանքի համար վտանգավոր իրավիճակ ստեղծելու ու երեխաների հանդեպ վատ վերաբերմունքի մեղադրանքներով ձերբակալվել են 57-ամյա Դեվիդ Ալլեն Տուրպինը ու 49-ամյա Լուիզա Աննա Տուրպինը:

Ինչպես հաղորդել են Ռիվերսայդի ոստիկանության բաժանմունքում, աղջիկներից մեկին հաջողվել է անցած կիրակի օրը փախչել տնից ու տանը գտած բջջային հեռախոսից զանգահարել փրկության ծառայություն:

Ըստ ոստիկանների, 17-ամյա աղջիկը հյուծված էր և իր տարիքից շատ ավելի փոքր՝ տասը տարեկան, էր երևում:

Տուրպին ընտանիքի տուն ժամանած ոստիկանությունը տեսել էր ցնցող տեսարան՝ կիսամթան մեջ, տհաճ հոտով սենյակում գտնվում էին շղթաներով մահճակալներին գամված երեխաներ: Նրանց ծնողները չեն կարողացել տրամաբանական բացատրություն տալ տեղի ունեցողին:

Ըստ ոստիկանների, իրենք ցնցված էին, որ 13 երեխայից 7-ը 18-29 տարեկան են: «Նրանք բոլորն ակնհայտորեն տառապել են թերսնումից, ապրել են հակասանիտարական պայմաններում ու կեղտի մեջ»,- ասել են ոստիկանությունում:

Այժմ անազատության մեջ բոլոր պահվողները վերականգնողական ու բուժման կուրս են անցնում տեղական հիվանդանոցներում:

«Դա այնքան ցավալի է, որ դրան դժվար է հավատալ»,- Ռոյթեր գործակալությանը հայտնել է հիվանդանոցներից մեկի բժիշկ Մարկ Ուֆֆերը:

Պաշտոնական տեղեկատվության համաձայն, Կալիֆորնիա տեղափոխվելուց առաջ Տուրպին ընտանիքը երկար ժամանակ բնակվել է Տեխասում: Դեվիդ Տուրպինը ամերիկյան ռազմաարդյունաբերական Northrop Grumman ընկերությունում աշխատում է որպես ինժեներ և ստանում ոչ նվազ աշխատավարձ: Սակայն, ինչպես ենթադրել են ոստիկանությունում, քանի որ կինը չի աշխատում, իսկ չափահաս երեխաները սովորելու ու աշխատելու հնարավորություն չեն ունեցել, կարելի է ենթադրել, որ նրանց պոտենցիալ ծախսերը կարող էին գերազանցել նրանց եկամուտները:

Դեվիդ Տուրպինը տեղական դպրոցներից մեկում, որտեղ հաշվառված են նրա երեխաներից վեցը, պարտքեր ունեցողների թվում է:

Աղբյուր` Փաստինֆո