Փաստ ինֆո

Զենքի կամ որպես զենք օգտագործվող առարկաների գործադրմամբ խուլիգանության մեջ մեղադրվող մի շարք անձանց վերաբերյալ գործով հայտարարվել է նախաքննության ավարտի մասին: «Փաստինֆո»-ի լրագրողի հետ զրույցում մեղադրյալներից երկուսի պաշտպան, «Նոր սերունդ» ՀԿ փաստաբան Արա Ղարագյոզյանը նշեց, որ ՔԿ Կենտրոն և Նորք-Մարաշ վարչական շրջանների քննչական բաժնի քննիչ Մխիթարյանի վարույթում գտնվող այս գործով նախաքննությունն ընթացել է մի շարք դատավարական խախտումներով:

Մասնավորապես, Ա.Ղարագյոզյանը նշեց, որ իր պաշտպանյալին տուժողներին ճանաչման չեն ներկայացրել, պարզապես առերես հարցաքննության ժամանակ իր պաշտպանյալին ձեռնաշղթաներով «բերել-նստեցրել են» հարցաքննությանը, բնականաբար, անձը ձեռնաշղթաներ տեսնելով, պետք է ասեր, որ հենց նա է մեղադրյալը:

Բացի այդ պաշտպանը նշեց, որ քննիչն իրեն ընդամենը երկու օր ժամանակ է տրամադրել չորս հատոր կազմող քրեական գործին ծանոթանալու և միջնորդություններ ներկայացնելու համար: «Նման արատավոր երևույթ նաև Սասնա ծռերի գործի նախաքննության շրջանակում է եղել»,- ասաց Արա Ղարագյոզյանը՝ պարզաբանելով, որ օրենսդիրը քննիչի հայեցողությանն է թողնում գործի նյութերին ծանոթանալու համար տրամադրվելիք ժամկետն որոշելը, և քննիչներն այդ իրավունքից կամայական են օգտվում՝ զրկելով մեղադրվող կողմին պաշտպանական իրավունքի լիարժեք իրացումից:

Պաշտպանը նշեց, որ իր իրավունքը սահմանափակելու հետևանքով ինքը ճիշտ է, քննչական մարմնին ուղղված միջնորդություններ պատրաստել է և դրանք ներկայացրել է քննիչին, սակայն այդուհանդերձ ժամկետը բավարար չի եղել և՛ գործի նյութերին ծանոթանալու, և անհրաժեշտ ու լիարժեք միջնորդություններ ներկայացնելու համար:

Պաշտպանը հավելեց, որ հետագայում պատրաստվում է դիմել ՀՀ գլխավոր դատախազին՝ քննիչի կամայական գործությունների և նրա կողմից թույլ տրված մի շարք դատավարական խախտումների հարցերը քննության առնելու խնդրանքով:

Լուսանկարում ՝ փաստաբան Արա Ղարագյոզյանն է 

Աղբյուր` Փաստինֆո