Փաստ ինֆո

«Սասնա Ծռեր-2»-ի գործով այսօրվա դատական նիստում խմբավորման անդամները չընդունեցին մեղադրանքները: Մասնավորապես, Արամ Մանուկյանը հայտարարեց, որ իրենք ապստամբություն են արել: Ամբողջ մեղադրանքի ծավալի մեջ Հովհաննես Հարությունյանի համար ընդունելի էր միայն «ենթադրյալ» բառը: Արամ Հակոբյանի գնահատմամբ, մեղադրանքը հրեշի կերպարանք ունի: Ըստ նրա, Քրեական օրենսգրքում մեկ կետ պետք է ավելացնել՝ հայրենասիրություն, և դրանով մեղադրել:

Նախագահող դատավորը հայտարարեց նոր փուլի, այն է՝ ապացույցների հետազոտման կարգ սահմանելուն անցնելու մասին և խոսքը տվեց մեղադրող կողմին այդ կապակցությամբ կողմի կարծիքն իմանալու համար:

Պաշտպանական կողմը, մասնավորապես, փաստաբան Լուսինե Սահակյանը հայտարարեց, որ առարկություն ունի նախագահողի գործողությունների դեմ, քանի որ մեղադրանքի պարզաբանման փուլը հարկ եղած կերպ չավարտած դատարանն անցնում է հաջորդ փուլին: Դատարանը, սակայն, փաստաբանին հնարավորություն չտվեց առարկությունը ներկայացնել: Այդ պատճառով դահլիճում դժգոհության ալիք բարձրացավ, և նիստն ընդմիջվեց:

Պաշտպանական կողմի փաստարկներից ու դրանց հակադարձումներից հետո ի վերջո դատարանը թույլ տվեց պաշտպան Լուսինե Սահակյանին օգտվել իր իրավունքից: Փաստաբանն առարկություն հայտնեց դատավորի գործողությունների դեմ, նշելով, որ մեղադրանքները պարզ չեն, անհատականացված չեն, դրանք վերացական են և նման պայմաններում պաշտպանական կողմի համար պարզ չէ, թե ինչից պետք է պաշտպանվել: Ըստ Լ.Սահակյանի, դատարանն արբիտր է, ուստի՝ նա պետք է պահանջի մեղադրողից պարզաբանել, թե ով ինչ է արել, մեղադրանքը պարզաբանելը մեղադրողների պարտականությունն է:

Պաշտպանին միացավ նաև պաշտպանյալը՝ Մարտիրոս Հակոբյանը՝ Դեդը, նա հայտարարեց, որ իրենք ապստամբել են տարածք են ազատագրել և հայտարարել որպես չորրորդ հանրապետություն: «Հայրենիքիս 40 հազար քառ.մ ազատագրել ենք, ամբողջն ենք ազատագրելու»: Նա հավելեց, որ եթե չեն կարողանում պարզաբանել մեղադրանքն, ինչպես են իրենց դատելու:

Ամբաստանյալ Թորոս Թորոսյանի պաշտպան Լիպարիտ Սիմոնյանն ընդգծեց, որ Վճռաբեկ դատարանը կոլեկտիվ մեղադրանքի մասին որոշում է կայացրել, ըստ որի եթե անհատականացված մեղադրանք առաջադրված չէ, ապա մեղադրանքն անորոշ է:

Պաշտպան Դավիթ Գյուրջյանն իր հերթին հայտարարեց, որ իր պաշտպանյալ Արամ Հակոբյանին պատանդ վերցնելու մեղադրանք է առաջադրվել, սակայն պարզ չէ, թե նա ում է պատանդ վերցրել:

Արամ Մանուկյանը հայտարարեց, որ շինծու գործ է, քաղաքական պատվեր է: «Այս ինչ կապիկություն է, ամոթ է, մի խայտառակեք մեր դատարանը»,- ասաց նա:

Դատարանի դիրքորոշման համաձայն, դատարանը Քրեական դատավարության օրենսգրքի համաձայն ճշտել է ամբաստանյալների դիրքորոշումը մեղադրանքի վերաբերյալ, ապացույցները պետք է հետազոտվեն և միայն դրանից հետո դատարանն արբիտր կլինի:

Ըստ մեղադրող կողմի, մեղադրանքն պարզ ու հստակ է, ցանկացած անձ էլ կարող է հայտարարել, որ այն պարզ չէ: Դատարանը իրավասու չէ մեղադրողներից պահանջել այն, ինչ օրենքով սահմանված չէ: Մեղադրող կողմն այնուամենայնիվ որոշ պարզաբանումներ արեց, պարզաբանման մեջ, սակայն, նշելով, որ ամբաստանյալին մեղադրանք է առաջադրվել Քրեական դատավարության օրենսգրքի հոդվածով:

Ի վերջո դատարանն անցավ ապացույցների հետազոտման կարգը սահմանելուն: Մեղադրող կողմն առաջարկեց ապացույցների հետազոտումը կատարել հետևյալ հերթականությամբ՝ հարցաքննել վկաներին, ապա տուժողներին, հետազոտել ապացույցներն, այլ ապացույցները, իրեղեն ապացույցները, հարցաքննել այլ քրեական գործով ամբաստանյալներին, այս գործով ամբաստանյալներին:

Պաշտպան Լիպարիտ Սիմոնյանը առարկեց այդ կարգի դեմ՝ առաջարկելով ապացույցների հետազոտումը սկսել իրեղեն ապացույցների հետազոտումից, ապա հետազոտել փաստաթղթերը՝ ամբողջությամբ և ոչ թե վերնագրերը կարդալով, ապա հարցաքննել տուժողներին, վկաներին, ամբաստանյալներին: Պաշտպանն ընդգծեց, որ ամբաստանյալների իրավունքն է ցանկացած ապացույցի հետազոտման ժամանակ դիրքորոշում հայտնել, ցուցմունք տալ:

Դատարանը որոշեց ապացույցների հետազոտումը սկսել գործի գրավոր ապացույցների հետազոտումից, ապա հարցաքննել տուժողներին, վկաներին, այլ քրեական գործով մեղադրյալներին, հետազոտել իրեղեն ապացույցները, վերջում ամբաստանյալների ցանկության դեպքում հարցաքննել նրանց:

Ապացույցների հետազոտումը կսկսվի հաջորդ դատական նիստում:

Աղբյուր` Փաստինֆո