Փաստ ինֆո

2015 թ. հունվարի 29 -ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով շարունակվում է վկաների հարցաքննությունը:

Երևանի Ավան և Նոր-Նորք վարչական շրջանների ընդհանուր իրավասության դատարանում, նախագահությամբ Դավիթ Հարությունյանի, այսօր հարցաքննվեց վկա, կապիտան Արտյոմ Ավետիսյանը:

Ըստ վկայի՝ դեպքի օրն առավոտյան օրվա հերթապահն իրեն տեղեկացրել է, որ Հայկազ Բարսեղյանի անկողինն արյան մեջ է, և նա չկա, կապիտանն էլ շտապել է Բարսեղյանի ննջարան, որտեղ եղել են այդ ննջարանում քնող մյուս կուրսանտները, մի մասն էլ դեռ արթնացած չի եղել, իսկ Հայկազ Բարսեղյանի անկողինը եղել արյան մեջ:

Այդ պահին կապիտանը մտածել է, որ Բարսեղյանը ինքնավնասում է կատարել, հրահանգել է «ճարպիկ» կուրսանտներին արագ փնտրել Հայկազին, ապա նաև վերադասներին է տեղյակ պահել կատարվածի մասին:

Իսկ մինչ դեպքի վայր կժամանեին իրավապահները, գիտակցելով տեղի ունեցածի լրջությունը՝ դեպքի վայրը պահպանել է, որևէ մեկին թույլ չի տվել մոտենալ, Հայկազի անկողնուն:

Այն պահին, երբ գտնվել են Հայկազ Բարսեղյանի ննջարանում, ըստ կապիտանի, Մովսես Ազարյանն իրեն սրիչ է ցույց տվել՝ ասելով՝ «երևի՞ սրանով է արել», որին ի պատասխան՝ կապիտանը հրահանգել է գետնին գցել, ոչ մի բանի ձեռք չտալ, և որ մատնահետքերը կմնա վրան:

Նշենք նաև, որ այդ սրիչը վերցնելու և կապիտանին ցույց տալու վերաբերյալ հայտարարությամբ հանդես եկավ ամբաստանյալ Վաչե Սահակյանը՝ հայտնելով, որ այդ մասին ինքը նախաքննության ընթացքում ևս ասել, որ այդ սրիչին ինքն է ձեռք տվել:

Թերևս վկան շփոթել էր, քանի որ նախաքննության ընթացքում ինքը ևս Վաչե Սահակյանի անունն էր տվել:

Այդ ամենից հետո, երբ վկան տեղեկացրել է, որ կուրսանտները Հայկազին հայտնաբերել են շարահրապարակում՝ պպտաձողից կախված, շտապել է այնտեղ և տեսել, որ Հայկազը կախված է բարձր պտտաձողից, այստեղ էլ թեև մեծ թվով հավաքվածներ են եղել, ինքը կրկին թույլ չի տվել, որ դեպքի վայրին որևէ մեկը մոտենա:

Վկան ասաց, որ Հայկազը ցածրահասակ էր և այդ պտտաձողի վրա վարժություններ կատարելու համար իրեն որևէ մեկն օգնում էր, որպեսզի կարողանար բարձրանար կամ պպտաձողից աջ և ձախ կողմերի ձողից բռնելով էր բարձրանում:

Ինչ վերաբերում է Հայկազի սպանությանը, ապա, վկայի խոսքով, արյան մեջ հայտնաբերելով Հայկազի անկողինը՝ իր մտքով չի անցել, որ Հայկազին կարող էին սպանել, անգամ ինքնասպանության մասին չի մտածել:

Վկան հայտնեց նաև, որ Հայկազ Բարսեղյանին վերջին անգամ տեսել է դեպքից ժամեր առաջ՝ գիշերը ժամը 01.00-ի սահմաններում, զուգարան էր գնում, ասեցի ինչ կա զուգարանում, ծիծաղելով պատասխանեց, թե՝ «էլ ինչո՞ւ պետք է գնամ»:

Կապիտանն այդ օրը գիշերը քուն հրամանից հետո տեսել էր նաև Նորիկ Սահակյանի և մեկ այլ կուրսանտի, ով իր ջոկից է եղել: Ըստ վկայի՝ նրանք միջանցքում պարապում էին, ապա նաև ցանկացել են սուրճ պատրաստել, ինչից հետո ինքն ասել է՝ գնացեք քնելու, բայց չի գնացել նրանց հետևից, որ ստուգի՝ քնե՞լ են արդյոք, թե՝ ոչ:

Բացի այդ, վկան նաև հայտնեց, որ քուն հրամանից հետո երկու անգամ կուրսանտների ննջարաններով անցել է, ստուգել՝ արդյոք բոլորը քնա՞ծ են, թե՝ ոչ, Հայկազ Բարսեղյանին ևս տեսել է, թեև նրա դեմքը չի տեսել, քանի որ գլուխը ծածկոցի տակ է եղել, բայց տեսել է, որ անկողնում պառկած մարդ կա, ու մինչև հիմա չի կարողանում հասկանալ՝ դա սարքա՞ծ է եղել, թե՝ ոչ:

Վկան հայտնեց նաև, որ դեպքի օրը Բարսեղյանի անկողինն արյան մեջ հայտնաբերելուց հետո հարցեր է ուղղել ննջարանի կուրսանտներին, թե ինչ տրամադրություն է ունեցել Հայկազը և մի շարք այլ հարցերին, կուրսանտները պատասխանել են, որ տարօրինակ բաներ է ասել, թե, իբր, ինչ որ հարց կա, եթե դա լինի, ինքը ինստիտուտից գնալու է և նման այլ բաներ, որը հետագայում վկան ճշտել է, որ սուտ է եղել, նման բան չի ասել Հայկազը:

Վկայի դատաքննական և նախաքննական ցուցմունքներում առակ էական հակասություններով պայմանավորված՝ հրապարակվեց նրա նախաքննական ցուցմունքները, իսկ հակասությունների վերաբերյալ վկան ասաց, որ բավականին ժամանակ է անցել և որոշ մանրամասներ չի հիշում:

Կապիտանը պնդեց իր նախաքննական ցուցմունքները:

Նշենք նաև, որ նկարագրելով Հայկազ Բարսեղյանին՝ վկան ասաց, որ նա բոլորի հետ չէր շփվում, համեստ, հանգիստ տղա էր, չի տեսել, որ մյուսների հետ վատ հարաբերություններ ունենա:

Վկաների հարցաքննությունը կշարունակվի հաջորդ՝ դեկտեմբերի 23-ին կայանալիք նիստում:

Լուսանկարը՝ Armtimes.com-ի

Աղբյուր` Փաստինֆո