Փաստ ինֆո

ՀՀ Գեղարքունիքի մարզի ընդհանուր իրավասության դատարանի պաշտոնյաների և մյուսների  վերաբերյալ կաշառքի աղմկահարույց գործով այսօր սկսվեց դատաքննությունը: Դատարանում հրապարակվեց  13 ամբաստանյալներից հինգի մասով մեղադրական եզրակացության եզրափակիչ մասը, մնացած ութի մասով մեղադրական եզրակացության եզրափակիչ մասի հրապարակումը կշարունակվի հաջորդ դատական նիստում:

 Այսպես, ըստ մեղադրանքի, Գեղարքունիքի մարզի ընդհանուր իրավասության առաջին ատյանի դատարանի նախագահ Աղվան Պետրոսյանը  իր վարույթում գտնվող  քրեական գործով դատաքննության ընթացքում՝  2015թ. սեպտեմբեր-2016թ. ապրիլ ամիսն ընկած ժամանակահատվածում  Գոռ Գալստյանի  ծնողներ Կամո և Մելանյա Գալստյաններից՝  նրանց որդու Գ. Գալստյանի և դստեր ամուսին Մասիս Կարապետյանի օգտին իր լիազորությունների շրջանակում գործողություն կատարելու և իր պաշտոնեական դիրքն օգտագործելով նույն անձանց օգտին գործողություն կատարելուն նպաստելու՝ Գ. Գալստյանին մեղմ պատժի դատապարտելու, Մ. Կարապետյանին քրեական պատասխանատվությունից ազատելու համար, իր վարորդ Կարեն Մարտիկյանի և Վարդենիս քաղաքի բնակիչ Հայկ Կարապետյանի միջոցով ստացել է առանձնապես խոշոր չափերով՝ 11.343.373 ՀՀ դրամին համարժեք 23000 ԱՄՆ դոլար կաշառք:

Բացի այդ, ըստ մեղադրական եզրակացության, 2017թ. փետրվարի 27-ին ժամը 15.00-ից 17.00-ի սահմաններում Գեղարքունիքի մարզի ընդհանուր իրավասության դատարանի Գավառի նստավայրում՝ իր աշխատասենյակում դատարանի նախագահը Ռոբերտ Գրիգորյանի ներկայացուցիչ Էդվարդ Չինարյանի միջոցով վերջինիս ներկայացրած անձանց օգտին իր պաշտոնեական դիրքն օգտագործելով ակնհայտ ապօրինի գործողություններ կատարելուն՝ Զարիկ Գրիգորյանին պատկանող անշարժ գույքի կապակցությամբ վճռի ապօրինի պարզաբանում տալուն նպաստելու համար, նույն դատարանի դատավոր Վանիկ Վարդանյանի հետ խմբով ստացել է առանձնապես խոշոր չափերով՝ 1.011.600 ՀՀ դրամին համարժեք 120.000 ՌԴ ռուբլի կաշառք։

Դատարանում հրապարակվեցին նաև նույն դատարանի դատավոր Վանիկ Վարդանյանի, Գեղարքունիքի մարզի դատախազության դատախազ Սևակ Շհոյանի, ինչպես նաև Կարեն Մարտիկյանի և Հայկ Կարապետյանի վերաբերյալ մեղադրական եզրակացության եզրափակիչ մասը:

Աղվան Պետրոսյանին և Վանիկ Վարդանյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով և 311-րդ հոդվածի  4-րդ մասի 3-րդ կետով (համապատասխանաբար՝ առանձնապես խոշոր չափերի կաշառք ստանալը և դատավորի կողմից կաշառք ստանալը), Սևակ Շհոյանին՝  ՀՀ քրեական օրենսգրքի 311-րդ հոդվածի  4-րդ մասին 2-րդ կետով,  Կարեն    Մարտիկյանին՝  ՀՀ քրեական օրենսգրքի    313-րդ հոդվածի 1-ին մասով՝  կաշառքի միջնորդություն, իսկ Հայկ Կարապետյանին՝  բացի նույն՝ կաշառքի միջնորդության հոդվածից  մեղադրանք է առաջադրվել նաև  ՀՀ քրեական օրենսգրքի 34-312-րդ հոդվածի  1-ին մասով՝ կաշառք տալու փորձ:

Աղվան Պետրոսյանը հայտարարեց, որ իրեն հասկանալի չէ մեղադրանքը, իրավական որակումը և այն կարիք ունի պարզաբանման, մասնավորապես, ինչպես է խմբի կողմից կաշառք  վերցվել: Նա միաժամանակ հայտարարեց, որ իրեն մեղավոր չի ճանաչում: Վանիկ Վարդանյանն ևս հայտարարեց, որ մեղադրանքը պարզ չէ, այն պետք է բխի գործով ձեռք բերված ապացույցներից: Մեղադրական եզրակացությունն, ըստ նրա,  «մարդկանց հանդեպ քար անտարբերության հետևանք է»:  Մասնավորապես, նա հարցրեց՝ ո՞ր պահին է կաշառքի դիմաց հանցավոր համաձայնությունը տեղի ունեցել: Նա նույնպես իրեն մեղավոր չճանաչեց առաջադրված մեղադրանքում:

Ամբաստանյալ Սևակ Շհոյանը հայտարարեց, որ պարզ չէ, թե երբ, ինչ հանգամանքներում և ում կողմից է տեղի ունեցել վերագրվող արարքը: Ըստ նրա, մեղադրանքը հիմնված է ենթադրությունների, բամբասանքների, հակակրանքի վրա: «Ես բացարձակ անմեղ եմ»,- ասաց ամբաստանյալը՝ կոչ անելով մեղադրողին հրաժարվել մեղադրանքից:

Կաշառքի միջնորդության մեջ մեղադրվող Կարեն Մարտիկյանն ու  Հայկ Կարապետյանն իրենց մեղավոր չճանաչեցին առաջադրված մեղադրանքում, վերջինս ասաց, որ մեղադրանքն իրականությանը չի համապատասխանում:

Դատարանը մինչ դատաքննությունը սկսելը մասնակի բավարարեց պաշտպան Ռուբեն Հակոբյանի միջնորդությունը և վերացրեց  Վանիկ Վարդանյանի կենսաթոշակի ու աշխատավարձի գումարների  վրա դրված կալանքը, իսկ անշարժ գույքի վրա դրված կալանքը վերացնելու մասով միջնորդության լուծումը հետաձգվեց մինչև էական հանգամանքների պարզելը:  Դատարանը հետաձգեց նաև պաշտպանի միջնորդությունը Վանիկ Վարդանյանի ազատության ու անձնական անձեռնմխելիության իրավունքի խախտումը ճանաչելու մասին:

Ըստ պաշտպանի,  դատավորներ Մելիքյանն ու Իսկոյանը՝ ինքնաբացարկ հայտնելով, որոշման մեջ նշել են, ամբաստանյալների կալանավորումը մնում է անփոփոխ, ինչի իրավասությունը նրանք, ըստ պաշտպանական կողմի, չեն ունեցել: Արդյունքում 25 օր իր պաշտպանյալն ապօրինի է պահվել կալանքի տակ: Նույն խնդիրը բարձրացրեցին նաև մի շարք այլ ամբաստանյալների պաշտպաններ:

Գործով մեղադրող Դավիթ Կարապետյանը նշեց, որ բացի ընդդատության վերաբերյալ որոշումից, դատարանը ցանկացած որոշման մեջ պարտավոր է անդրադառնալ խափանման միջոցի հարցին, ուստի դատարանի կողմից խախտում թույլ տալու խնդիր չկա:   

Հաջորդ դատական նիստում դատարանն ըստ ամենայնի կավարտի մեղադրական եզրակացության եզրափակիչ մասի հրապարակումը, ապա քննության կառնի ամբաստանյալ Վանիկ Վարդանյանի պաշտպան Ռուբեն Հակոբյանի միջնորդությունն իր պաշտպանյալի նկատմամբ ընտրված կալանավորումը գրավով փոխարինելու մասին:

Աղբյուր` Փաստինֆո