Փաստ ինֆո

Մարաշի զինված խմբի գործով այսօրվա դատական նիստը տեղի չունեցավ` ամբաստանյալ, ՀՀ նախկին փոխվարչապետ և Պաշտպանության նախկին փոխնախարար Վահան Շիրխանյանի բացակայության պատճառով: Ըստ քրեակատարողական հիմնարկից ստացված գրության` Վահան Շիրխանյանը «ներկա առողջական վիճակով չի կարող մասնակցել դատական նիստին»:

Լրագրողների հետ զրույցում Վ.Շիրխանյանի պաշտպան Հայկ Ալումյանը նշեց, որ իր պաշտպանյալն ամեն նիստին էլ ունենում է առողջական խնդիրներ, որոշակի ժամանակ անցնելուց հետո այլևս չի կարողանում նստած դիրքում գտնվել և շատ երկար ժամանակ տանջվելուց հետո միայն իրեն թույլ է տալիս ասել, որ այլևս չի կարող նստած մնալ:

«Չնայած իր շատ ծանր առողջական խնդիրներին, մինչև վերջերս քրեակատարողական հիմնարկները՝ սկզբում «Երևան-Կենտրոն» ՔԿՀ-ն, հետո «Դատապարտյալների հիվանդանոց» ՔԿՀ-ն, տեղեկանքներ էին գրում, թե իբր պրն.Շիրխանյանը ի վիճակի է մասնակցել դատարավարությանը: Առաջին անգամն է, երբ որ քրեակատարողական հիմնարկից նամակ եկավ, որ պրն. Շիրխանյանն ի վիճակի չէ մասնակցել»,- ասաց Հայկ Ալումյանն, ընդգծելով՝ ի՛նչ աստիճանի է սրվել նրա առողջական վիճակը, որ ՔԿՀ-ն ասում է, որ նա ի վիճակի չէ մասնակցել դատական նիստին: Պաշտպանը նկատեց, որ քրեակատարողական հիմնարկները երբեք հակված չեն եղել ճշմարտությունն ասել, միշտ հակված են եղել պնդելու, որ առողջական խնդիրներն ավելի քիչ են, քան իրականում կան: «Եվ դա ինձ շատ մտահոգում է»,- ,- ասաց Հ.Ալումյանը:

Արդյոք դա կարո՞ղ է լինել վերջերս ՄԻԵԴ-ի կողմից Վահան Շիրխանյանի գործով կայացված որոշման հետևանքը (որով ՄԻԵԴ-ը պարտավորեցրել է պետությանը անհապաղ միջոցներ ձեռնարկել՝ նրա առողջական վիճակը ճիշտ գնահատելու և անհրաժեշտ բուժումն ապահովելու համար) հարցին պաշտպանը պատասխանեց. «Այն, որ Հայաստանի Հանրապետությունը խնդիր ունենալու է Շիրխանյանի առողջական վիճակի հետ կապված, վաղուց էր հասկանալի»: Հայկ Ալումյանը զարմանք հայտնեց, որ իշխանությունները միայն վերջերս են սկսել դա հասկանալ:

ՄԻԵԴ-ի հիշյալ որոշումից հետո կառավարությունն, ըստ պաշտպանի, ընդհանրապես ոչ մի քայլ չի ձեռնարկում կամ «գոնե մեզ այդպիսի քայլեր հայտնի չեն»: Հայկ Ալումյանը նշեց նաև, որ իրենք հիմա բանակցում են մասնագետների հետ, փնտրում են այնպիսի մասնագետների, ում կվստահեն, «և մենք այդ մասնագետներին Հայաստանում չենք փնտրում, որովհետև մենք հասկանում ենք, թե Հայաստանում ինչ լծակներ կան ցանկացած բժշկի նկատմամբ»: Պաշտպանը պարզաբանեց, որ այսօրվա դրությամբ ցանկացած բժիշկ որևիցե բժշկական կենտրոնում է աշխատում, իսկ «դուք նաև գիտեք, թե ում են պատկանում այդ բժշկական կենտրոնները և համապատասխանաբար ինչ լծակներ կան ցանկացած բժշկի նկատմամբ»:

Ըստ Հայկ Ալումյանի` այդ պատճառով իրենք պատրանքներ չունեն, որ հայաստանյան բժիշկներից կարող են օբյեկտիվ կարծիք ստանալ Վահան Շիրխանյանի հետ կապված:

Պաշտպանը նշեց նաև, որ կողմը միջոցներ չունի այդ մասնագետներին վճարելու համար:

«Բայդ մենք գտնում ենք, որ այդ մասնագետներին վճարելու պարտականությունը կրում է կառավարությունը: Երբ որ մենք կստանանք այդ մասնագետների համաձայնությունը, որպեսզի իրենք հետազոտությունը անցկացնեն, ապա մենք իրենցից կստանանք իրենց ծառայությունների դիմաց նրանց նախահաշիվը և այն կներկայացնենք կառավարությանը՝ վճարման համար», - ասաց Հայկ Ալումյանը՝ հավելելով, որ երկու տարի է, ինչ համարյա բոլոր դեղամիջոցները Վ.Շիրխանյանի հարազատներն են ձեռք բերում, համարյա բոլոր հետազոտությունների համար իր պաշտպանյալի հարազատներն են վճարում այն դեպքում, երբ որ դա կառավարության պարտականությունն է:

«Եվ հիմա արդեն եկել է ժամանակը, որպեսզի կառավարությունն իր պարտականությունները կատարի»,- ասաց Հայկ Ալումյանը:

Լուսանկարը՝ Ֆոտոլուրի

Աղբյուր` Փաստինֆո