Փաստ ինֆո

Դատավորի կողմից իր մասնագիտական գործառույթներն իրականացնող փաստաբանի կամ անգամ դատախազի նկատմամբ մինչև 100.000 ՀՀ դրամի չափով տուգանք կիրառելու հնարավորությունը իրականությունից կտրված և իրավական պետության կայացմանը խոչընդոտող նորամուծություն է: «Փաստինֆո»-ի լրագրողի հետ զրույցում այս մասին տեսակետ հայտնեց ՀՀ փաստաբանների պալատի խորհրդի անդամ Հրանտ Անանյանը:

Ըստ փաստաբանի, նման փոփոխությունը մեզ մի քանի քայլով հետ է մղում և արգելակելու է փաստաբանության և նույն դատական համակարգի զարգացումը:

«Ուշագրավ է, որ օրինագծով կարգապահական պատասխանատվության ենթարկելու համար ՀՀ փաստաբանների պալատին դիմելը որպես սանկցիայի առանձին տեսակ վերացվել է առհասարակ: Այսինքն՝ շատ դատավորներ փորձելու են իրենց վարկանիշը բարձրացնել բացառապես «մահակի» միջոցով, միակողմանի, պահի ազդեցությամբ կամ ինքնահաստատմանն ուղղված հույզերի ներքո, ինչն անթույլատրելի է մեր իրականության մեջ, երբ որոշ «դատավորներ» դեռևս այն համոզմունքի են, որ փաստաբանները (պաշտպան, ներկայացուցիչ) ավելորդ են որպես դատավարության մասնակիցներ:

Շատ դատավորներ սպասում են նման «հնարավորության», որ պատեհ-անպատեհ անեն այն, ինչ որ ցանկանում են»,- ասաց Հ.Անանյանը:

Փաստաբանը նշեց, որ ներկա կարգավորման համաձայն՝ փաստաբանի կարգապահական պատասխանատվության ենթարկել-չենթարկելու, տույժի այս կամ այն տեսակը որոշելու հարցի լուծումը վերապահված է ՀՀ փաստաբանների պալատի խորհրդին, ում որոշումներն, ի դեպ, կարող են բողոքարկվել ընդհանուր հիմունքներով դատական կարգով նույն նախաձեռնողի, տվյալ դեպքում՝ սանկցիա կիրառած դատարանի (նախագահողի) կողմից:

Այլ կերպ ասած՝ դատական իշխանությունը զրկված չէ միջամտելու այդ հարաբերություններին և փաստաբանի հնարավոր անհարգալից վարքագծի իրավական գնահատականը ներկա կարգավորմամբ չի ավարտվում միայն ՀՀ փաստաբանների պալատով:

Այսինքն՝ գործող օրենսդրությունը նախատեսում է պատշաճ զսպումների և հակակշիռների մեխանիզմ նշված հարաբերությունների ներդաշնակ կարգավորման և զարգացման համար, մինչդեռ օրինագծի հեղինակները փորձում են խախտել հավասարակշռությունը, ինչն առաջացնելու է բազում լրջագույն խնդիրներ:

«Հասարակությանը շեղելու համար փորձեր են կատարվում ներկայացնել որոշ եվրոպական երկրների օրինագծին համահունչ փորձը, որպես էտալոն, սակայն պարզ ուսանողական նյութ է, որ օրենսդրական կարգավորման մեխանիկական ներդրումը՝ առանց մեր իրականության առանձնահատկությունները հաշվի առնելու, միանշանակ հետընթաց է, վնաս հանրային շահին:

Փորձ է արվում տպավորություն ձևավորելու, իբր, դատարաններն ուղղակի «հոյակապ» են աշխատում, բոլոր խնդիրները գալիս են փաստաբաններից կամ դատախազներից, սակայն, կարծում եմ, աքսիոմատիկ ճշմարտություն՝ իրավունքի պաշտպանությանը և արդարությանը հասնելու համար ինչպիսի դժվար ուղի է անցնում փաստաբանը պետական մարմինների, այդ թվում հենց դատական իշխանության հետ հարաբերություններում, այսինքն՝ փաստաբանի պատրաստվածությունն ու վճռականությունն այն էական փոխկապակցված խթաններն են, որ դատական համակարգը հաճախ շտկում է իր սխալները: Ներկայումս անհիմն փորձ է արվում ոչնչացնել վճռականությունը: Համոզված եմ, որ փաստաբանները անսպառ եռանդով պայքարելու են այս օրինագծի դեմ»,- ասաց Հրանտ Անանյանը:

Լուսանկարում՝ ՓՊ խորհրդի անդամ, փաստաբան Հրանտ Անանյանը

Աղբյուր` Փաստինֆո