Փաստ ինֆո

Սամվել Բաբայանի և մյուսների գործով այսօրվա դատական նիստը հետաձգվեց. Բաբայանի առողջական վիճակով պայմանավորված՝ նրան դատարան չէին բերել:

Նախագահող դատավոր Արշակ Վարդանյանը ներկաներին տեղեկացրեց, որ դատարանը քրեակատարողական հիմնարկից գրություն է ստացել, որում Բաբայանը հայտնել է, որ մրսածության պատճառով ձայնը կտրվել է և քանի որ նախատեսվում էր իր ցուցմունքը, չի կարող ելույթ ունենալ: Ուստիև՝ Բաբայանը խնդրել էր նիստը հետաձգել մեկ շաբաթով:

Եվ քանի որ նիստը հետաձգվելու էր, դատարան չէին բերվել նաև մյուս երկու ամբաստանյալները՝ Սանասար Գաբրիելյանը և Արմեն Պողոսյանը:

Հաջոր՝ հոկտեմբերի 23-ին կայանալիք դատական նիստում կհարցաքննվեն ամբաստանյալներ Սանասար Գաբրիելյանը և Արմեն Պողոսյանը:

Հիշեցնենք, որ Ազգային անվտանգության ծառայությունը Սամվել Բաբայանին մեղադրանք է առաջադրել ՀՀ քրեական օրենսգրքի 235-րդ հոդվածի երկրորդ մասի և 235.1 հոդվածի երկրորդ մասի հատկանիշներով:

Ըստ մեղադրանքի՝ Սամվել Բաբայանը դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահռթիռային համալիր ձեռք բերելուն, փոխադրելուն և պահելուն, ինչպես նաև փոխարկման արդյունքում ձեռք է բերել հանցավոր ճանապարհով ստացված գույք:

Ըստ Սանասար Գաբրիելյանին և Արմեն Պողոսյանին առաջադրված մեղադրանքի՝ նրանք մի խումբ անձանց հետ` նախնական համաձայնությամբ ապօրինի կերպով ձեռք է բերել, փոխադրել և պահել ռազմամթերք հանդիսացող «Իգլա» տեսակի դյուրակիր զենիթահռթիռային համալիր:

Աղբյուր` Փաստինֆո