Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանը շարունակում է գտնվել «Դատապարտյալների հիվանդանոց» ՔԿՀ-ում և ըստ նրա պաշտպան Վարդուհի Էլբակյանի՝ առողջական վիճակը ոչ թե վատ է, այլ շատ վատ է:

Շենգավիթ վարչական շրջանների ընդհանուր իրավասության դատարանում այսօր շարունակվեց գործի ապացույցների հետազոտումը:

Մինչ ապացույցների հետազոտմանն անդրադառնալը՝ հիշեցնենք, որ առողջական վիճակով պայմանավորված՝ Բարսեղյանը սեպտեմբերի 15-ին տեղափոխվել է «Դատապարտյալների հիվանդանոց», որտեղ դեղորայքային բուժում է ստանում:

Կատարված հետազոտությունների արդյունքում բժիշկները հանգել են հետևության, որ անհրաժեշտ է կորոնորոգրաֆիա կատարել՝ որոշելու համար՝ սրտի վիրահատության անհրաժեշտություն կա՞, թե՝ ոչ:

«Փաստինֆո»-ի թղթակցի հետ զրույցում պաշտպան Վարդուհի Էլբակյանը նշեց, որ Բարսեղյանը ամեն օր դեղեր է խմում որպեսզի հնարավոր լինի նրան դատարան բերել, գործի ձգձգումը նրա շահերից չի բխում:

Մեր այն հարցին, թե սեպտեմբերի 28-ին նշանակված դատական նիստի օրը, պաշտպանի հայտարարության համաձայն, Բարսեղյանին դատարան են բերել հողաթափերով և սպորտային հագուստով՝ որևէ քայլ ձեռնարկվե՞լ է այդ կապակցությամբ, պաշտպանն ասաց, որ նման ձևով անձին դատարան բերելն իրենք նվաստացուցիչ են գնահատում և համապատասխան մարմնի դեմ հայց կներկայացվի, բացի այդ, Բարսեղյանին այդ օրը ստիպողաբար են նստեցրել մեքենան և բերել դատարան:

Անդրադառնալով գործի ապացույցներին՝ նշենք, որ այսօր դատարանը հետազոտեց նույն դատարանի շենքի 8 տեսախցիկների պատկերները, մասնավորապես՝ դատարանում տեղադրված և դատարանի շենքից դուրս տեղադրված տեսախցիկները, որտեղ երևում էր՝ իգական սեռի մի անձնավորություն մուտք է գործում դատարան, բարձրանում է երկրորդ հարկ, մտնում դատավորի աշխատասենյակ, ապա իջնում է և դուրս գալիս դատարանի շենքից:

Ապացույցը գրեթե հետազոտվեց լռության մեջ, միայն ժամանակ առ ժամանակ նախագահողը դատարան մուտք գործած անձի գործողություններն էր կցկտուր նկարագրում:

Ավելի հստակ դատարան մուտք գործած անձի գործողությունները նկարագրեց մեղադրող դատախազ Կարեն Բիշարյանը. դատավորի աշխատասենյակի դուռը բացվելուց հետո այնտեղից դուրս է գալիս մոխրագույն տաբատով, սպիտակ կոշիկներով և դեղնավուն վերնազգեստով մի աղջիկ: Նրա ձեռքին կան ինչ- որ թղթապանակներ: Իսկ երբ աղջիկը հետո վերադառնում է և մտնում աշխատասենյակ, ձեռքին թղթապանակներ չկային:

Պաշտպանական կողմը հայտարարությամբ հանդես եկավ՝ նշելով, որ առհասարակ դատավորի աշխատակազմ մտնում են մեկ դռնից, սակայն դա չի նշանակում, որ նրանք բոլորը նույն այդ սենյակում են նստում, դատավորի օգնականն ունի իր առանձին աշխատասենյակը, դատավորը՝ այլ, սակայն բոլորը մեկ դռնից են ներս մտնում և հետևաբար որևէ մեկը չի կարող ասել, թե այդ աղջիկը դռնից ներս մտնելուց հետո կոնկրետ դատավորի աշխատասենյակ է գնացել:

Նշենք նաև, որ ապացույցի հետազոտման և մեղադրողի կողմից դատարան մուտք գործած աղջկա գործողությունները նկարագրելիս դատախազն այդ աղջկա անունը չհնչեցրեց:

Սակայն, ենթադրաբար, նա գործով ամբաստանյալ Էլզա Զաքարյանն է: Ապացույցների հետազոտումը շարունակվում է, հաջորդիվ հետազոտվելու է մեղադրանքի հիմքում դրված Իշխան Բարսեղյանի հեռախոսահամարի մուտքային և ելքային զանգերի վերծանումները:

Աղբյուր` Փաստինֆո