Փաստ ինֆո

Երրորդմասցի Լյովիկի ու նրա ընկերների սպանության աղմկահարույց գործով այսօրվա դատական նիստին էլ չէր ներկայացել ընթերակա Յուրի Գալստյանը: Ընթերական դատարան է հրավիրվել պաշտպանական կողմի միջնորդությամբ:

Պաշտպանական կողմը վիճարկում է ընթերակայի մասնակցությամբ քննչական գործողության արձանագրությունը, քանի որ արձանագրությունում նշված ծննդյան թվով անձ նույն այդ անվամբ, հայրանվամբ ու ազգանվամբ Հայաստանի Հանրապետությունում առկա չէ: Արձանագրությունում ճիշտ չի նշված նաև անձի հասցեն՝ գրված է թիվ մեկ շենք՝ կոտորակ մեկ շենքի փոխարեն՝ ընդ որում, հասցեն կոտորակ մեկի է փոխվել տասը տարի առաջ, սակայն արձանագրության մեջ նշված է հին հասցեն:

Պաշտպանական կողմը վիճարկում է այս ապացույցը, պահանջում, որպեսզի կամ մեղադրողը հրաժարվի այդ ապացույցից, կամ էլ պահանջում է, որպեսզի ընթերական գա դատարան ու հայտնի, որ արձանագրությունում վրիպակներ են թույլ տրվել:

Անձը, ում դատարանը հրավիրում է դատարան՝ հարցաքննության, ըստ տեղեկությունների, գտնվում է Ռուսաստանում: Ուստի այսօրվա դատական նիստում որոշվեց նորից ծանուցել նրան դատական նիստի մասին և ՍԵԿՏ համակարգով նորից ստուգել նա վերադարձե՞լ է Հայաստան, թե՞ ոչ:

Հիշեցնենք, որ գործով ամբաստանյալները երեքն են՝ «Գաստիկ» մականվամբ Վահան Հակոբյանը, «Տլե» մականվամբ Սարգիս Հախանումյանն ու «Ծգլ» մականվամբ Սարգիս Գրիգորյանը:

Ըստ մեղադրական եզրակացության, Վահան Հակոբյանը մի խումբ անձանց կողմից նախնական համաձայնությամբ ապօրինի ձեռք է բերել և պահել մարտական ակոսափող հրազեն հանդիսացող` 1963թ. գործարանային արտադրության 7,62 մմ տրամաչափի «ԱԿՄՍ» տեսակի ինքնաձիգ, 1976թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ և 1960թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ , որոնք ապահովված են եղել պահունակներով, ինչպես նաև ռազմամթերք հանդիսացող փամփուշտներով:

Ըստ մեղադրանքի, 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նախաքննական մարմինը որպես սպանության դրդապատճառ նշել է այն, որ Վահան Հակոբյանը «լարված, անբարյացակամ, գժտված վիճակում» է եղել Լևոն Ղազարյանի ու նրա շրջապատի հետ և, ըստ մեղադրական եզրակացության, սպանությունը կատարվել է վրեժխնդրությունից դրդված:

Աղբյուր` Փաստինֆո