Փաստ ինֆո

38-ամյա Ջոն Չարլտոնը խոստովանել է, որ սպանել է 40-ամյա Ինգրիդ Լայնին, ում հետ ծանոթացել է ինտերնետով: Տղամարդը պատմել է, որ երեք երեխայի մորը խեղդել է 2016թ. ապրիլի 9-ին, որից հետո մասնատել է նրա մարմինը սղոցի օգնությամբ և մնացորդները Սիեթլում աղբանոցը նետել:

Ըստ life.ru-ի, սպանությունից անմիջապես հետո Ջոն Չարլտոնը պատմել է ոստիկանությանը, որ հանդիպում էր Ինգրիդի հետ և նրա հետ գիշեր է անցկացրել, սակայն չափից դուրս հարբած է եղել, այդ պատճառով չի հիշում, թե ինչպես է վերադարձել Սիեթլ: Հանցագործը պնդել է, որ հանդիպմանը կինը բավականին տարօրինակ էր պահում, սակայն ինքը պատկերացում չունի, թե ինչ է պատահել նրա հետ իր գնալուց հետո:

Խուզարկուները Ինգրիդ Լայնի տանը խուզարկություն են կատարել և լողասենյակում գտել ոչ մեծ սղոց և աղբի համար պարկեր: Դրանց կողքին հայտնաբերվել են արյան հետքեր և մարդկային մարմնի կտորներ: Պարզվել է նաև, որ սպանությանն իր մասնակցությունը հերքող Ջոն Չարլտոնը վեց նահանգներում կրիմինալ պատմություն ունի: Տղամարդը դատապարտվել է կողոպուտների, մեքենաների առևանգումների և մարդկանց վրա հարձակումների համար:

2006 թ. Ջոն Չարլտոնի ծնողները փորձում էին հասնել որդու նկատմամբ արգելող հրամանի. նա եկել էր իրենց տուն և փորձել էր կռիվ սարքել: Հետո նա դարակից հանել էր «Հաննիբալ» կինոնկարը և խորհուրդ էր տվել մորը նայել այն և զգուշանալ: Ավելի ուշ ծնողները հետ էին վերցրել հայցը:

Դատի նախօրեին Ջոն Չարլտոնը որոշել էր ընդունել իր մեղքը Ինգրիդ Լայնի սպանության մեջ և ոստիկաններին պատմել էր, որ խեղդել է նրան: Մեղադրանքի կողմը պահանջում է նրան դատապարտել 27 տարվա ազատազրկման, սակայն չի բացառվում, որ մարդասպանը ցմահ կդատապարտվի: Դատավճիռը կհրապարակվի հունվարի 5-ին:

Աղբյուր` Փաստինֆո