Փաստ ինֆո

Հայաստանի ազգային հավաքականի գլխավոր մարզիչ Արթուր Պետրոսյանը ԱԱ-2018-ի ընտրական փուլի` Դանիայի հետ անցկացնելիք խաղից առաջ հանդիպել է լրագրողների հետ:

Հիշեցնենք` հանդիպումը տեղի կունենա վաղը` սեպտեմբերի 4-ին, և կմեկնարկի ժամը 20:00-ին Վ. Սարգսյանի անվան «Հանրապետական» մարզադաշտում.

- Ռումինիայի հետ խաղի վերջին վայրկյաններին ցավալի գոլ բաց թողեցինք ու վերջնականապես կորցրինք հույսերը ԱԱ-2018-ում որակավորվելու համար: Վաղն ինչի՞ համար ենք դուրս գալու խաղադաշտ:

- Հաղթելու:

- Պարոն Պետրոսյան, ի՞նչ տվեց Ձեզ պաշտպանությունում այդ փորձարկումները: Հաջորդ խաղում նաև Տարոն Ոսկանյանը կբացակայի, այդ ամենն ինչպե՞ս եք փոխհատուցելու:

- Մինչև կարմիր քարտը մեզ մոտ լավ էր ստացվում: Կարողանում էինք և՛ լավ պաշտպանվել, և՛ գրոհներ ձեռնարկել: Կարմիր քարտից հետո փոխեցինք մեր խաղային տակտիկան: Տարոն Ոսկանյանի բացակայությունը մեծ հարված է մեզ համար, հատկապես երբ Մկոյանը բացակայում է: Կփորձենք ելք գտնել: Հուսամ՝ կստացվի:

- Ցավոք, առաջին անգամը չէ, երբ մեր թիմերը վերջին վայրկյաններին գոլ են բաց թողնում: Նշել եք, որ Ռումինիայի հետ խաղում այդ գոլն ընդունելու պատճառը հոգնածությունն էր: Ի՞նչ պետք է անել նման խնդիրներից խուսափելու համար:

-  Մոտ 40 րոպե ճնշում էր մեր դարպասին, մոտ 40 րոպե խաղում էինք 10 հոգով: Ինչպես տեսաք պաշտպան չմտցրեցի խաղադաշտ 10 հոգով մնալուց հետո: Փոխարինումներով նախ իմ թիմին էի ուզում ցույց տալ, որ դաշտ դուրս ենք եկել հաղթելու համար: Պետք է թիմը հասկանար, որ նույնիսկ 10 հոգով մենք դեռ շանսեր ունենք: Անտանելի ճնշումն ու հոգնածությունն էր պատճառը, որ կորցրինք կենտրոնացումը: Կարծում եմ՝ դա հոգեբանության հարց է: Կարծում եմ՝ ֆիզիկական պատրաստվածության խնդիր չէր, այլ՝ հոգեբանական:

- Ձեր օրոք մենք հավաքականում տեսանք Գրիգոր Մելիքսեթյանին և Սարգիս Ադամյանին: Ի՞նչ կասեք նրանց մասին: Նաև կցանկանայի խոսեիք Ռումինիայի հետ խաղում բավականին ակտիվ Տիգրան Բարսեղյանի մասին:

- Մելիքսեթյանի համար շատ ուրախ եմ, բարձր մակարդակի խաղ անցկացրեց: Հուսավ՝ նույն կերպ կշարունակի: Տիգրանը շատ մեծ ծավալի աշխատանք կատարեց: Եթե փոխարինման հնարավորության ունենայինք, նրան կփոխարինեինք, որպեսզի հանգստանար, բայց Մալաքյան Գոռն առողջական խնդիրներ ուներ, և ստիպված էինք նրան փոխարինել:

- Ի՞նչ խնդիրների մասին է խոսքը:

- Մկանային խնդիրների: Չգիտեմ՝ արդյոք նա կկարողանա վերականգնվել մինչև վաղը, բայց ես կարծում եմ՝ չի մասնակցի հանդիպմանը:

- Արտակ Գրիգորյանի բացակայությունն ի՞նչ ազդեցություն ունեցավ մեր թիմի խաղում, և ի՞նչ կասեք Գաելի մասին: Ինչու՞ նա խաղադաշտ դուրս չեկավ, երբ Տարոն Ոսկանյանը հեռացվեց խաղադաշտից:

- Արտակ մեծ ուժ է մեզ համար՝ իր աշխատասիրության, նվիրվածության շնորհիվ: Իսկ Գաելը երկար ժամանակ չի խաղացել, հիմա արդեն 10 օր է՝ մեզ հետ մարզվում է, կարծում եմ՝ եթե կարիքը լինի, կմտածենք այդ մասին:

- Բոլորի սպասումները մեծ են Հենրիխ Մխիթարյանից: Բայց շատ երկրպագուների կարծիքով նա հավաքականում չի ցուցադրում այն խաղը, որը՝ նրանից սպասում են: Ինչպե՞ս կմեկնաբանեք Մխիթարյանի խաղը:

- Հենրիխը հիանալի խաղ ցուցադրեց, ահռելի աշխատանք կատարեց թիմի համար: Եթե նայեք Ռումինիայի հետ խաղի վիճակագրությունը, ապա կտեսնեք, որ բոլոր ցուցանիշներով նա առջևում է: Մենք ամեն խաղում Հենրիխից 3 գոլային փոխանցում ենք սպասում և երկու գոլ, բայց ֆուտբոլը թիմային խաղ է: Թիմը պետք է նրան օգնի, ինքն էլ՝ թիմին: Հենրիխն ահռելի աշխատանք կատարեց թիմի համար:

- Վաղը որքանո՞վ ենք պատրաստ պրեսինգով խաղալ:

- Ճիշտն ասած՝ հիմա չեմ կարող պատասխանել այդ հարցին: Չեմ կարող ասել, թե ինչ մարտավարություն ենք ընտրելու: Կարծում եմ՝ ծանր պարտությունից հետո հոգեբանորեն ամբողջովին վերականգնվել են:

- Դանիայի մոտիվացիան վաղվա խաղում շատ մեծ է: Մենք ի՞նչ շանսեր ենք պահպանում: 

- Տանն ենք խաղում, փորձելու ենք ձգտել հաղթանակի: Իրենք 4:0-ից հետո հոգեբանորեն ավելի լավ վիճակով են մոտենում խաղին: Բայց Դանիան Հայաստանում հեշտ խաղեր չի ունենում:

- Կենտրոնական պաշտպանի խնդիր ունենք: Առաջիկայում այդ հարցն ինչպե՞ս կարող ենք լուծել:

- Այս պահին լուծում չունեմ այդ հարցին: Հուսով եմ՝ մի բան կստացվի, մի լավ երիտասարդ կաճի ու կկարողանա մեզ օգնել:

- Ռումինիայի հետ խաղից հետո նշեցիք, որ ունենք Ձեր նպատակները; Որքանո՞վ եք երկարաժամկետ դրանք: Ինչպե՞ս եք տեսնում մեր հավաքականը 3, 6 կամ 1 տարի անց, այն դեպքում, երբ հիմա ոչնչի համար չենք պայքարում:

- Իմ պայմանագիրը նախատեսված է մինչև հոկտեմբեր, բայց ֆեդերացիայի նախագահն ինձ երկարաժամկետ պայմանագիր է առաջարկել ի սկզբանե: Դեռ ժամանակ ունենք Ֆեդերացիայի նախագահի հետ այդ մասին խոսելու: Նպատակները վերաբերում են մեր մյուս ընտրական փուլին: Պետք է այնքան ուժեղ լինենք, որ վերջին րոպեներին ցավալի գոլեր չընդունենք, հուսով եմ՝ կհասնենք այդ նպատակին: Պետք է բոլոր օղակներում բալանսավորված խաղ լինի:

- Ի՞նչ կոչ կանեք երկրպագուներին:

- Որ գան մարզադաշտ և դրական լիցք հաղորդեն մեր թիմին: Մենք միշտ տեսնում ենք ու ստանում ենք այդ աջակցությունը: Ռումինիայում շատ հաճելի էր նման աջակցություն տեսնելը: Կցանկանամ վաղը լեփ-լեցուն տրիբունաներ տեսնել;

- Արդյոք հավաքականի դռները փակվելու՞ են Անատոլի Այվազովի համար:

- Իհարկե, ոչ: Ես որպես մարզիչ՝ չեմ կարող նման բան ասել: 

Աղբյուր` armsport.am