Փաստ ինֆո

Ամուսնացածները ավելի հազվադեպ են մահանում ինֆարկտից, արտերիալ հիպերտենզիայից և շաքարախտից, քան միայնակները, ամուսնալուծվածները և տղամարդիկ, ում կանայք մահացել են:

Ըստ life.ru-ի, Սրտաբանների եվրոպական համայնքի կոնգրեսում, Բարսելոնում, ներկայացվել են ծավալուն հետազոտության արդյունքները, որոնք ցույց են տալիս, որ կողքին զուգընկերոջ առկայությունն օգնում է ինֆարկտի մեծ ռիսկով մարդկանց ողջ մնալ: Դա ճիշտ է նաև նրանց համար, ովքեր ինֆարկտ են տարել և նրանց համար, ովքեր դեռևս ինֆարկտ չեն տարել, սակայն կան դրա առաջացման մեծ ռիսկի գործոններ՝ շաքարախտ, արյան բարձր ճնշում և արյան մեջ «վատ» խոլեստերինի բարձր մակարդակ:

Հետազոտությանը, որն անց է կացվել 2000-2013թթ., մասնակցել է 929 552 բրիտանացի: Նրանցից 25 287-ի մոտ մինչև 2000թ. արդեն եղել են սրտի նոպաներ, իսկ մնացածի մոտ՝ ոչ: Շատերի մոտ գործել են ինֆարկտի ռիսկը բարձրացնող գործոններ՝ շաքարախտ (68 098 մարդ), կայուն բարձր արյան ճնշում (168 431 մարդ), արյան մեջ «վատ» խոլեստերինի բարձր պարունակություն (53 055 մարդ): Մասնակիցներին բաժանել են խմբերի հարաբերությունների կարգավիճակի համաձայն՝ ամուսնացածներ և միայնակներ:

Ինֆարկտ տարածների մոտ մինչև հետազոտության ավարտը՝ 2013 թվականը, ամուսնացածները 14 տոկոսով ավելի հաճախ էին վերապրում: Նման պատկեր էր դիտվում նաև շաքարախտով հիվանդների պարագայում՝ զույգ ունեցողները 14 տոկոսով ավելի հազվադեպ էին մահանում իրենց հիվանդությունից: Համանման թվեր են ստացվել արտերիալ հիպերտենզիայով հիվանդ ամուսնացած տղամարդկանց ու կանանց պարագայում (նրանց վերապրելու տոկոսը միայնակներից ավելի բարձր էր 10 տոկոսով) և արյան մեջ խոլեստերինի բարձր մակարդակով (16 տոկոսով):

Հետազոտության հեղինակները եզրակացնում են, որ զուգընկերների աջակցությունը կարևոր դեր է խաղում սրտանոթային հիվանդությունների ու շաքարախտի դեպքում: Թեև ամուսինն ու կինը բացարձակապես անպայման չէ, որ բժշկության բավարար գիտելիքներ ունենան և միշտ չէ, որ ունակ են առաջին օգնություն ցույց տալ, նրանք ընդհանուր առմամբ բարենպաստ ազդեցություն են ունենում իրենց ամուսինների տրամադրվածության վրա և երկարացնում նրանց կյանքը:

Աղբյուր` Փաստինֆո