Փաստ ինֆո

Կոտայքի մարզի ընդհանուր իրավասության դատարանը՝ դատավոր Հ.Ավագյանի նախագահությամբ,  30-ամյա Արման Բաղդասարյանին մեղավոր է ճանաչել ՀՀ քրեական օրենսգրքի 104-րդ հոդվածի՝ սպանությունը,  1-ին մասով և 235-րդ հոդվածի՝ ապօրինի կերպով զենք, ռազմամթերք ձեռք բերելը, կրելը, պահելը, 1-ին մասով և դատապարտել  11  տարվա ազատազրկման:

Դատարանը հիմնավոր կասկածից վեր ապացուցողական չափանիշին համապատասխան հաստատված է համարել, որ Կոտայքի մարզի Ներքին Պտղնի գյուղի 1-ին փողոցի 4-րդ նրբանցքի 2-րդ տան բնակիչ Արման Բաղդասարյանը որպես վարորդ ծառայություններ է մատուցել նույն գյուղի 1-ին փողոցի 2-րդ տան բնակիչ, իր ազգական Մ. Բաղդասարովին և վարել է վերջինի «Մերսեդես Բենց» մակնիշի ավտոմեքենան։ 2015 թվականի օգոստոսի 27-ի գիշերն Արման Բաղդասարյանը Մ.Բաղդասարովին և վերջինի որդուն նշված ավտոմեքենայով տեղափոխել է օդանավակայան, Մ. Բաղդասարովի որդուն ճանապարհել են Ռուսաստանի Դաշնություն, որից հետո երկուսով նույն ավտոմեքենայով վերադարձել են Կոտայքի մարզի Ներքին Պտղնի գյուղ։

Ժամը 05:59-ին Արման Բաղդասարյանը Մ. Բաղդասարովին իջեցրել է գյուղի 1-ին փողոցի 2-րդ տան բակում, որից անմիջապես հետո նշված ավտոմեքենայով միայնակ շարժվել է իր տան ուղղությամբ։ Նույն ժամանակահատվածում Պտղնի գյուղի բնակիչ Արսեն Ազիզյանն իր «Մերսեդես Բենց» մակնիշի ավտոմեքենայով երթևեկել է դեպի Կոտայքի մարզի «Զանգվի ձոր» կոչվող տեղանքում գտնվող, իրեն պատկանող ձկնաբուծարան։ Ներքին Պտղնի գյուղի 1-ին փողոցի և 1-ին փողոցի 3-րդ նրբանցքի խաչմերուկում «Մերսեդես Բենց» մակնիշի երկու ավտոմեքենաները  հանդիպել են, որի ժամանակ Արսեն Ազիզյանը ձայնային ազդանշան է տվել և կանգնեցրել Արման Բաղդասարյանին։

Դրանից հետո Արսեն Ազիզյանը, իր հետ գտնվող անձանց, ինչպես նաև ձայների վրա փողոց դուրս եկած համագյուղացիների ներկայությամբ, ձեռքերով և ոտքերով բազմաթիվ հարվածներ է հասցրել Արման Բաղդասարյանի գլխին և մարմնի մյուս մասերին, տվել սեռական բնույթի հայհոյանքներ ինչպես Արման Բաղդասարյանի, այնպես էլ նրա ընտանիքի անդամների հասցեներին։ Միաժամանակ, Արսեն Ազիզյանը ոտքով հարվածել և վնասել է Արման Բաղդասարյանի կողմից վարած  ավտոմեքենայի բեռնախցիկի ծածկոցի աջ մասը, որից հետո հանել է իր մոտ գտնվող ատրճանակը, դրանով հարվածել Արման Բաղդասարյանին, փորձել վերջինին գցել իր ավտոմեքենայի բեռնախցիկը, սպառնացել, որ նրան տանելու է իրեն պատկանող ձկանոց և սպանելու։

Արսեն Ազիզյանի գործողությունների հետևանքով Արման Բաղդասարյանը ստացել է գլխի ծոծրակի շրջանի փափուկ հյուսվածքների սալջարդների, ճակատի աջ կեսի քերծվածքների, աջ ճակատային թմբկության պրոյեկցիայով արյունազեղումների, աջ ականջախեցու սալջարդի և արյունազեղման, ականջախեցու պրոյեկիցիայով քունքային շրջանի, աջ վերին կոպի արյունազեղումների ձևով առողջության թեթև վնասի հատկանիշներ չպարունակող մարմնական վնասվածքներ։

Վիճաբանությանը ներկա գտնվող անձինք մի պահ առանձնացրել են Արսեն Ազիզյանին, որից հետո Արման Բաղդասարյանը նստել է  ավտոմեքենան և նշված վայրից հեռացել։ Արդեն ժամը 06:09-ին վիճաբանությունը եղել է դադարած և Արսեն Ազիզյանը, վերջինի հորեղբոր որդին և նրանց հետ գտնվող երեք կանայք իրենց  ավտոմեքենաներով Զանգու գետի մոտ գտնվող ձորը տանող ճանապարհով շարժվել են դեպի ձկնաբուծարան։ Որոշ ժամանակ անց՝ ժամը 06:32-ին,  դեպի ձկնաբուծարան է շարժվել նաև Արսեն Ազիզյանի ընկերն, ով միացել է Արսեն Ազիզյանին, նրա հետ գտնվող անձանց, նրանց է միացել նաև ձկնաբուծարանի պահակը, նստել են ձկնաբուծարանի տարածքում տեղադրված վագոն-տնակի կողքին գտնվող սեղանի շուրջ և զրուցել։

Նույն ժամանակահատվածում Արման Բաղդասարյանը, իրեն ծեծի ենթարկելու, սպառնալու, այլ անձանց ներկայությամբ իր և ընտանիքի անդամների հասցեին հայհոյանքներ հնչեցնելու դիմաց Արսեն Ազիզյանից վրեժխնդիր լինելու շարժառիթով, սույն դատաքննության ընթացքում հետազոտված ապացույցներով չհաստատված հանգամանքներում ապօրինի ձեռք է բերել 1976 թվականի գործարանային արտադրության 5,45մմ տրամաչափի «ԱԿՍ-74» տեսակի մարտական ակոսափող ինքնաձիգ և 1974 թվականի նմուշի գործարանային արտադրության 5,45մմ (5,45x39) տրամաչափի մարտական փամփուշտներ և ենթադրելով, որ Արսեն Ազիզյանը գտնվում է իր ձկնաբուծարանում, իր ազգականի  կողմից շահագործվող «Միտցուբիշի Պաջերո ԻՕ» մակնիշի  ավտոմեքենայով գնացել է Կոտայքի մարզի «Զանգվի ձոր» կոչվող տեղանք։

Ժամը 06:40-ի սահմաններում Արման Բաղդասարյանը, հասնելով նշված վայր և նկատելով ջրավազանի հարևանությամբ կայանված Արսեն Ազիզյանի ավտոմեքենան, համոզվել է, որ վերջինը գտնվում է նշված տարածքում։ Նպատակադրված արարքն ավարտին հասցնելու նպատակով Արման Բաղդասարյանը թաքնվել է քիչ հեռու գտնվող և ջրավազանի շրջակայքը տեսանելի քարքարոտ վայրում, դարանակալել և սպասել է մինչև իր տեսադաշտում կհայտնվի Արսեն Ազիզյանը: Քիչ անց վերջինս  նստած դիրքից վեր է կացել, առանձնացել է հյուրերից և քայլել ջրավազանի երկայնքով, որի ժամանակ էլ Արման Բաղդասարյանը, հարմար առիթն օգտագործելով, Արսեն Ազիզյանին կյանքից զրկելու ուղղակի դիտավորությամբ հիշյալ ինքնաձիգից կրակահերթ է արձակել վերջինի ուղղությամբ։

Արձակված կարկոցների հետևանքով  Արսեն Ազիզյանը ստացել է ձախից թոքահյուսվածքի, ստոծանու, փայծախի վնասումների, ձախից 3-րդ, 4-րդ, 10-րդ կողերի մանր, բազմաբեկոր կոտրվածքների ձևով, իրանի, ձախ վերին վերջույթի հրազենային, գնդակային թափանցող վնասվածքներ, ինչի հետևանքով առաջացած հեմոռագիկ շոկից կարճ ժամանակ անց մահացել է։

Դատարանը գտել է, որ Արման Բաղդասարյանի կատարած արարքները համապատասխանում են ՀՀ քրեական օրենսգրքի 104-րդ հոդվածի 1-ին մասով և 235-րդ հոդվածի 1-ին մասով նախատեսված հանցագործությունների հատկանիշներին, ինչի համար նա ենթակա է քրեական պատախանատվության և պատժի:

Դատարանն ամբաստանյալ Ա.Բաղդասարյանի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս, հաշվի է առել կատարված հանցագործությունների հանրության համար վտանգավորության աստիճանն ու բնույթը, այդ թվում՝ կատարված սպանության դրդապատճառները, սպանության կատարման եղանակը, հանգամանքները, հանցավորի դիտավորությունը, ինչպես նաև՝ ապօրինի ձեռք բերված զենքի և ռազմամթերքի տեսակը, քանակը:

Որպես հանցավորի անձը բնութագրող տվյալներ Դատարանը հաշվի է առել այն, որ նա բնութագրվում է դրականորեն, նախկինում դատապարտված կամ այլ կերպ արատավորված չի եղել։

Ըստ դատավճռի, Ա.Բաղդասարյանի պատասխանատվությունն ու պատիժը մեղմացնող հանգամանք է հանդիսանում տուժողի վարքագծի հակաօրինականությունը և հակաբարոյականությունը, որով պայմանավորվել է հանցագործությունը:

Աղբյուր` Փաստինֆո