Փաստ ինֆո

«Սասնա-ծռեր»-ի այսօրվա դատական նիստին ամբաստանյալ Արայիկ խանդոյանի պաշտպան Արա Ղարագյոզյանը պահանջեց դահլիճ վերադարձնել իր պաշտպանյալին, որի նկատմամբ դատական սանկցիա էր կիրառվել, և նա հեռացվել էր դատական նիստերի դահլիճից:

Պաշտպանը պարզաբանեց, որ դատարանի նկուղում, որտեղ այժմ գտնվում է Արայիկ Խանդոյանը, նա գտնվել է նաև հունիսի 28-ին, որտեղ նրա և գործով մի շարք այլ ամբաստանյալների նկատմաբ խոշտանգում է իրականացվել: Պաշտպանն ընդգծեց, որ այդ օրն էլ դատավորը գտնվում էր նիստերի դահլիճում, և ներքևից լսելի էին ձայներ, սակայն որևէ միջոց չձեռնարկվեց՝ խոշտանգումները կանխելու ուղղությամբ:

Դատարանը պարզաբանեց, որ այդ դեպքի առթիվ քրեական գործ է հարուցվել, ընթանում է նախաքննություն, և նախաքննության արդյուքնների մասին տեղեկություն կտրվի:

Իսկ այս գործի շրջանակներում դա քննության առարկա լինել չի կարող:

Պարզաբանմանը հետևեց Արա Ղարագյոզյանի հարցը՝ հնարավո՞ր է Արայիկ Խանդոյանը նորից խոշտանգման ենթարկվի, ինչին դատարանը բացասական պատասխան տվեց:

Ա.Ղարագյոզյանը հայտարարեց, որ դատարանը՝ դատավոր Արտուշ Գաբրիելյանի նախագահոությամբ, չի կարող արդարադատություն իրականացնել այս գործով, որովհետև դատարանը չի կառավարում դատավարությունը, այլ դատավարությունը կառավարում են Վլադիմիր Գասպարյանը, Դատական դեպարտամենտը և Բաղրամյան 26-ը:

«Դուք ինքներդ որոշում չեք կայացնում, ես ինքնաբացարկ չեմ հայտարարում, որովհետև դա էլ այլ անձ է որոշելու»,- ասաց Արա Ղարագյոզյանը:

Փաստաբան Լուսինե Սահակյանը դատարանի ուշադրությունը հրավիրեց այն խնդրին, որ անձը, որ առնվազն կասկածյալ է ամբաստանյալների խոշտագման դեպքով, իսկ ամբաստանյալները պետք է տուժող ճանաչված լինեին արդեն վաղուց, անթույլատրելի է, որպեսզի այդ անձը գտնվի ամբաստանյալների կողքին: 

Դատարանը կասկած հայտնեց, արդյոք անձը՝ ուղեկցող գումարտակի ղեկավար Արմեն Ղազարյանը, գործով կասկածյա՞լ է, Լուսինե Սահակյանը հակադարձեց, որ ՄԻԵԴ-ի իմաստով նա մեղադրյալ է, եթե անգամ կասկածյալ էլ չէ, ապա գոնե վկա է և ճիշտ չէ, որպեսզի վկան և տուժողը գտնվեն նույն տարածքում:

«Ինչպես՞ս եք թույլ տալիս, որ շփվեն իրար հետ»,- նշել Լուսինե Սահակյանը:

Դատական նիստերի դահլիճում նորից բարձրացվեց պաշտպաններից մեկի բացակայության պայմաններում դատական նիստը շարունակելու անթույլատրելիության հարցը:

Մասնավորապես՝ ամբաստանյալ Սմբատ Բարսեղյանի պաշտպան Հայկ Ալումյանը դիմել էր դատարանին՝ հայտնելով, որ ինքը չի կարող դատական նիստին ներկա լինել, քանի որ նախօրոք նշանակված այլ դատական նիստեր ունի:

Դատարանը նորից  շարադրեց իր նախկին դիրքորոշումը. նախապատրաստական փուլում որևէ պաշտպանի բացակայությունը խոչընդոտ չէ՝ դատական նիստը շարունակելու համար:

Դատարանը պարզաբանեց, որ հաջորդ դատական նիստին, երբ Հայկ Ալումյանը կներկայանա, դատարանը նրա համար առանձին կբացատրի ինքնաբացարկի, բացարկի հիմքերը և կպարզի՝ նա ինքնաբացարկ կամ բացարկ ունի՞ դատարանին կամ մեղադրող կողմին, թե՝ ոչ: 

Այս քննարկման շուրջ էլ դատարանը մեկ ժամով ընդմիջեց դատական նիստը:

Լուսանկարը՝ Ֆոտոլուրի

Աղբյուր` Փաստինֆո