Փաստ ինֆո

Նախագահող դատավորն այն դատավորն է, ում օրոք ու նախագահությամբ ամբաստանյալներին նիստերի դահլիճից դուրս բերելիս խոշտանգում է տեղի ունեցել, որը շարունակվել է այլ տեղում՝ նույնպես դատարանի շենքում: Այս մասին դատարանին ինքնաբացարկի միջնորդություն ներկայացնելիս այսօր նշեց «Սասնա Ծռերի» գործով երկու ամբաստանյալի պաշտպան Լուսինե Սահակյանը: Նա հավելեց, որ դատավորը ոչինչ չի լսել ու տեսել, թեև գործով պաշտպանին լսելի են եղել ձայներ, և նա այդ մասին ահազանգել է Մարդու իրավունքների պաշտպանին:

Լ.Սահակյանը նշեց նաև թույլ տրված այլ խախտումների մասին ևս: Դատական նիստերի դահլիճում ոստիկանը խանգարել է պաշտպանի և նրա պաշտպանյալի միջև հաղորդակցմանը, ավելին՝ հրապարակվել է ամբաստանյալի ու պաշտպանի միջև գրագրությունը, այսինքն՝ փաստաբանական գաղտնիքը:

Ըստ Լուսինե Սահակյանի, դատարանը նշեց, որ Երվանդ Վարոսյանի բացակայությունը չի կարող խոչընդոտել դատավարությանը, քանի որ նրա պաշտպանյալները ևս մեկ պաշտպան ունեն: Մինչդեռ առնվազն մեկ ամբաստանյալի՝ Սմբատ Բարսեղյանի պարագայում դատարանը նրա միակ պաշտպան Հայկ Ալումյանի բացակայությունը չի համարում դատական նիստը հետաձգելու հիմք:

Դատարանը չքննարկեց դատական սանկցիայի ենթարկված ամբաստանյալներին նիստերի դահլիճ վերադարձնելու և ամբաստանյալներին խոշտանգելու դեպքի հետ կապված ուղեկցող գումարտակի ղեկավար Ղազարյանին ծառայությունից ազատելու միջնորդությունները:

Դատարանն անկախ ու անկողմնակալ չէ, եզրափակեց իր միջնորդությունը Լուսինե Սահակյանը:

Պաշտպանական կողմը միացավ միջնորդությանը: Մասնավորապես, փաստաբան Տիգրան Հայրապետյանը հայտարարեց, որ դատարանի դահլիճում իշխում է ոչ թե օրենքը, այլ իշխում են ոստիկանները՝ դիտարկելով դա հատկապես դատարանի շենքում ամբաստանյալներին խոշտանգելու արտառոց ու աննախադեպ դեպքի համատեքստում: Դրա մասին է վկայում, որ ոստիկանի կողմից նամակը վերցվել է առանց նախագահողի հրահանգի: Ընդհանրապես դատական նիստերի դահլիճում ոստիկանները չպետք է գտնվեին, այլ պետք է գտնվեին միայն դատական կարգադրիչները:

Փաստաբանը հայտարարեց նաև, որ դատական նիստին իրավունք ունեն գտնվել ամբաստանյալների երկուական հարազատ և հարց ուղղեց՝ չի՞ կարելի, արդյոք, գոնե հարյուր ունկնդիր տեղավորող մի դահլիճ գտնել:

Փաստաբան Ինեսսա Պետրոսյանն իր հերթին նշեց, որ դատավարությունը սկսելու օրվանից խախտվում է պաշտպանական իրավունքը: Մասնավորապես, դատարանին չի մտահոգում, որ դատական նիստերի դահլիճից հեռացված Գագիկ Եղիազարյանի պաշտպանը ներկա չի նիստին:

Հանրային պաշտպան Արմինե Ֆանյանը նույնպես բարձրացրեց պաշտպանական իրավունքի խախտման, մասնավորապես, պաշտպանների բացակայությամբ նիստեր անցկացնելու հարցը՝ ընդգծելով, որ նախապատրաստական փուլն էլ ի վերջո դատավարության փուլ է:

Մեղադրող կողմը նշեց, որ որևէ դատավարական խախտում դատավորի կողմից թույլ չի տրվել: Մասնավորապես, կողմին անհասկանալի է, թե ինչպե՞ս պետք է դատարանը թույլ չտար ոստիկաններին ներկա գտնվել նիստերի դահլիճում:

Դատարանը մերժեց ինքնաբացարկի միջնորդությունը:

Լուսանկարը՝ ֆոտոլուրի

Աղբյուր` Փաստինֆո