Փաստ ինֆո

Վահան Շիրխանյանի և մյուսների վերաբերյալ գործով այսօրվա դատական նիստը հետաձգվեց՝ ամբաստանյալ Արման Հայրապետյանի պաշտպան Հերմինե Միքայելյանի բացակայության պատճառով. պաշտպանը գտնվում է հիվանդանոցում: 

Մինչ դատական նիստի հետաձգումը դատական նիստերի դահլիճից երեք ժամով հեռացված Վահան Շիրխանյանի պաշտպան, փաստաբան Հայկ Ալումյանը հայտարարեց, որ նիստերի քարտուղարը, զեկուցելով, թե դատավարության մասնակիցներից ովքեր են ներկա, չնշեց, որ բացակայում է Վահան Շիրխանյանը:

Նիստերի ձայնագրառումը լսելու դեպքում չի կարելի տեղեկանալ, որ իր պաշտպանյալը դատական նիստին ներկա չէ, իսկ ձայնագրառումը լսելու են և բազմաթիվ անգամ են լսելու, հավաստիացրեց Հայկ Ալումյանը:

Պաշտպանը պահանջեց նախագահող դատավորից պարզաբանել, թե ե՞րբ է լրանում սանկցիայով սահմանված ժամկետը, հնչեց դատավորի արձագանքը՝ Վահան Շիրխանյանը հեռացվել է երեք ժամով, և ժամկետը չի լրացել:

Պաշտպանն իր հերթին պարզաբանեց, որ ոչ մի տեղ գրված չէ, որ սանկցիայի ժամկետի հաշվարկը նիստերի ընթացքին է վերաբերվում:

Հայկ Ալումյանը հայտարարեց նաև, որ մտադիր է ինքնաբացարկի միջնորդություն ներկայացնել նախագահող դատավոր Արմեն Բեկթաշյանին՝ առաջին իսկ հնարավորության դեպքում:

Պաշտպանը նշեց, որ երբ Վահան Շիրխանյանը փորձել է ասել՝ Դուք չեք հասկանում, թե ինչ ցավեր ունի ինքը (դատավորը ընդհատել է ամբաստանյալին և թույլ չի տվել նախադասությունը մինչև վերջ ասել), դատավորը համարել է, որ նա իրեն վիրավորել է և դուրս գալով դատական նիստերի դահլիճից՝ դատավորը դարանակալել է Վ.Շիրխանյանին միջանցքում՝ դատական նիստերի դահլիճի դռնից այն կողմ:

«Երբ պրն. Շիրխանյանին աթոռի վրա նստած վիճակում հանել են նիստերի դահլիճից, Դուք բազմաթիվ ոստիկանների ու կարգադրիչների ներկայությամբ, չափազանց անհարգալից և վիրավորական արտահայտություններով, «դու»-ով, փորձել եք հաշիվ պահանջել այն բանի համար, որ պրն. Շիրխանյանն, իբր, հանդգնել է Ձեզ չհասկացող անվանել: Այդքանին ես ականատես եմ եղել անձամբ:

Տեսնելով, որ տեղի ունեցածը երևում է դահլիճից, կարգադրիչները փակել են դուռը, որից հետո արդեն պրն. Շիրխանյանի պատմելով Դուք նրան ասել եք հետևյալը.

«Դու ո՞վ ես, որ ասես «չի հասկանում»», «Ձեր շինած երկիրն ա, ի՞նչ ես ուզում», «Ես քեզանից շատ բան եմ արել այս երկրի համար», «Դերասան, դու ոչ մի հիվանդ չես, դու նույնիսկ վազում ես, մատների վրա սաղին ֆռռցնում ես»»,- նշեց Հայկ Ալումյանը:

Լրագրողների հետ զրույցում փաստաբանը հայտնեց, որ պարտադիր դիմելու է Արդարադատության խորհուրդ ոչ միայն այս հայտարարությունների հետ կապված, այլ մի շարք իրադարձությունների հետ կապված, որոնք որ դատական նիստում տեղի են ունեցել, որոնք որ ինքնին շատ կոպիտ խախտումներ են:

Հայկ Ալումյանը հայտնեց, որ մեկ շաբաթ առաջ դիմել է դատարանին, որպեսզի ստանա Վահան Շիրխանյանի և իր վերաբերյալ դատական սանկցիաների որոշումները, արդեն մեկ շաբաթ է իրեն դրանք չեն տրամադրվում: Դատական նիստերից Վահան Շիրխանյանին հեռացնելուց հետո Հայկ Ալումյանի բացակայությունը դատարանը գնահատել է որպես անհարգալից վերաբերմունք և դատական սանկցիա կիրառել նաև փաստաբանի նկատմամբ:

Պաշտպանը նշեց, որ երբ որ դատավորը ընդմիջում է հայտարարում և չի սահմանում, թե ինքը կես ժամով, հինգ ժամով, թե չորս օրով ընդմիջեց դատական նիստը, դրանից ելնելով դատավարության մասնակիցների մոտ չի առաջանում պարտականություն գտնվել դահլիճում այնքան ժամանակ մինչև դատավորը կգա: Անորոշ ժամկետով նիստը ընդհատելու պարագայում, երբ դատարանը վերադառնալով տեսնում է, որ փաստաբանն այնտեղ չէ, իրավունք չունի դատական սանկցիա կիրառել:

Բացի այդ Վ.Շիրխանյանը բոլորի համար լսելի ձևով հայտարարել է, որ չի ցանկանում, որ իր պաշտպանն իր բացակայությամբ գտնվի դատական նիստին: Ընդհանուր սկզբունք է՝ պաշտպանը չի կարող կատարել այնպիսի գործողություններ իր վստահորդի համար ու նրա անունից, որի համար վստահորդի կողմից լիազորված չի, դա հանրահայտ ճշմարտություն է, ասաց Հայկ Ալումյանը:

Արդյոք դատավորը ինքնաբացարկ կհայտնի՞ հարցին ի պատասխան Հայկ Ալումյանը նշեց, որ իր մոտ մի միտք է առաջացել, որ միգուցե դատավորը ինքն այնպիսի բաներ է ասել, որպեսզի ստիպված լինի հետո դրա հիման վրա ինքնաբացարկ հայտնել:

«Ես չգիտեմ, որովհետև ուրիշ ո՞նց կարելի է բացատրել դատավորի այդպիսի խոսելաձևը, այդպիսի մոտեցումը: Ուրիշ ձև չեմ կարողանում բացատրել, որովհետև մենք պրն. Բեկթաշյանին մինչև այդ համարյա բոլորն, ում հետ խոսում էի, ու ինքս էլ անձամբ իմ փրոձից՝ իր մոտ քիչ չեմ ունեցել դատավարություններ, շատ հավասարակշռված գիտենք իրեն, հատկապես այդ մի գիծը միշտ եղել է: Այս դատավարությունում ես նրան չեմ ճանաչում, ես էլ չգիտեմ, ինքն այդ ամեն ինչն անում է, որ հետագայում ինքնաբացարկի հիմքեր ստեղծի՞, ուղղակի ուրիշ բացատրություն չեմ գտնում»,- ասաց Հայկ Ալումյանը:

Լուսանկարը՝ Armenpress-ի

Աղբյուր` Փաստինֆո