Փաստ ինֆո

Նոր օրենքը, որն արգելում է մինչև 18 տարեկան աղջիկներին աշխատել ծառայությունների, այսպես կոչված՝ «վարձատրության դիմաց ժամադրությունների», ոլորտում, ուժի մեջ է մտել Ճապոնիայի մայրաքաղաք Տոկիոյում:

Ըստ «ՌԻԱ Նովոստի»-ի, Կիոդո գործակալության տվյալներով, օրենքի նախագիծը նախօրեին միաձայն հավանության է արժանացել մայրաքաղաքի իշխանությունների կողմից: Սա Ճապոնիայում հատուկ օրենք ընդունելու առաջին դեպքն է, որն ուղղված կլիներ վարձատրության դիմաց մինչև 18 տարեկան բարձրդասարանցիների հետ ժամադրությունների սահմանափակումներին:

Ներկայումս Տոկիոյում, Ճապոնիայի մայրաքաղաքի ոստիկանության տեղեկատվության համաձայն, գոյություն ունի մոտ 110 կոմերցիոն ձեռնարկություն և մոտ 30 չգրանցված ընկերություն, որոնք առաջարկում են դպրոցական աղջիկների հետ ժամադրությունների կազմակերպման ծառայություններ: Շատ հաճախ այդպիսի ժամադրությունների ուղարկում են 18 տարեկանից ցածր տարիքի աղջիկների: Տոկիոյի իրավապահ մարմիններն այդ ձեռնարկություններից մի քանիսին կասկածում են նաև դեռահասների կողմից ինտիմ ծառայություններ մատուցելու նպատակով նրանց հետ ժամադրությունների անօրինական կազմակերպման մեջ:

Այժմ, ըստ նոր օրենքի, «վարձատրության դիմաց ժամադրություններին» կարող են մասնակցել միայն 18 տարեկանից բարձր աղջիկներ: Իրավախախտներին սպառնում է մինչև մեկ տարվա բանտարկություն կամ տուգանք մինչև 1 մլն իենի չափով (8,9 հազար դոլար):

Անհայտ է մնում, թե ինչպես է պատրաստվում Տոկիոյի ոստիկանությունը պայքարել այսպես կոչված «պապա կացու»-ի ֆենոմենի դեմ այն դեպքում, որ աղջիկները անհատապես յուրօրինակ բանավոր պայմանագիր են կնքում տղամարդու հետ վարձատրության դիմաց ժամադրությունների մասին: Որոշ աղջիկներ, որոնք առաջարկում են նման ծառայություններ, 14 տարեկան էլ չկան:

Աղբյուր` Փաստինֆո