Փաստ ինֆո

ՀՀ վարչական դատարանը մերժել է Վալերի Պերմյակովին Հայաստանի իրավազորությանը հանձնելու հարցով անցկացված խաղաղ երթի առնչությամբ ոստիկանության հայցը, իսկ հասարակական գործիչ, վերլուծաբան Արգիշտի Կիվիրյանի հակընդդեմ հայցը՝ բավարել: 

Այս մասին «Փաստինֆո»-ին հայտնեց Արգիշտի Կիվիրյանի ներկայացուցիչ, փաստաբան Արամազդ Կիվիրյանը:

Փաստաբանը Ֆեյսբուքում այս կապակցությամբ գրառում է թողել, որը ստորև ներկայացնում ենք ամբողջությամբ.

«ՀՀ վարչական դատարանը, դատավոր Ալեքսանդրա Հարությունյանի նախագահությամբ, ինչպես միշտ մնում է իր բարձրունքի վրա։ Բազմաթիվ գործերով նա ապացուցել և շարունակում է ապացուցել, որ ինքն իրապես արժանի է դատավորի կոչմանը, ավելին՝ այն դատավորն է, ով իրապես այսօր եղանակ է ստեղծում ՀՀ վարչական դատարանում։

Ես չեմ ցանկանում գովազդել որևէ դատավորի և հարցը այստեղ գովազդը չէ, սակայն երբ մնացած գործերով ՀՀ վարչական դատարանի այլ դատավորներ բավարարում էին ոստիկանության հայցերն ընդդեմ Արգիշտի Կիվիրյանի, իսկ ոստիկանության գործողությունները ոչ իրավաչափ ճանաչելու պահանջով մերժում ներկայացված հակընդդեմ հայցերն, ապա այս գործով, Դատարանը կայացրել է տրամագծորեն այլ վճիռ, մասնավորապես մերժելով ոստիկանության հայցը, իսկ հակընդդեմ հայցն ամբողջությամբ բավարարելով»։

Հիշեցնենք, որ ոստիկանությունը ՀՀ վարչական դատարան ներկայացրել է ոստիկանության ծառայողի օրինական պահանջը չկատարելու համար Վարչական իրավախախտումների վերաբերյալ ՀՀ օրենսգրքի 182-րդ հոդվածի հատկանիշներով Արգիշտի Կիվիրյանին վարչական պատասխանատվության ենթարկելու պահանջ:

Իսկ Արգիշտի Կիվիրյանը հակընդդեմ հայցով պահանջել է ոչ իրավաչափ ճանաչել ոստիկանության գործողությունները՝ կապված Գյումրիում Ավետիսյանների ընտանիքի սպանության մեջ մեղադրվող Վալերի Պերմյակովին Հայաստանի իրավազորությանը փոխանցելու պահանջի վերաբերյալ 15.01.2015թ. կազմակերպված հավաքի հետ:

«Փաստինֆո»-ի հետ հարցազրույցում ավելի վաղ Արամազդ Կիվիրյանը նշել էր՝ ոստիկանությունը հայտարարում է, որ իրենց գործողությունները իրավաչափ են եղել՝ պատճառաբանելով, որ Շիրակի մարզի դատախազության շենքի մուտքը փակելու ցանկություն է եղել: Ընդ որում, կոնկրետ Արգիշտի Կիվիրյանը բերման է ենթարկվել ոստիկանություն՝ նույնիսկ դատախազության շենքի մոտ չհասած:

Ոստիկանությունը տվյալ դեպքում պատճառաբանում է, որ եթե այնտեղ հավաք տեղի ունենար և Արգիշտի Կիվիրյանը գտնվեր այնտեղ, ինքն այնտեղ մուտք կփակեր, կխաթարեր ընդհանուր գործունեությունն և այլն: «Այդ փաստարկը որևէ քննադատության չի դիմանում»,- ասել էր Արամազդ Կիվիրյանը: Ըստ նրա, իրենց կողմից ապացույցներ են ներկայացվել առ այն, որ դատախազության շենքն ունի երկու մուտք, այսինքն՝ եթե առաջին մուտքը փակվեր, բնականաբար կգործեր երկրորդը:

«Տվյալ դեպքում մուտք փակելը չի կարող պատճառաբանվել անձին իր խոսքի ազատությունից զրկելով, այդ թվում՝ սահմանափակելով վերջինիս և՛ տեղաշարժի իրավունքը, և՛ փաստացի ազատությունը, որովհետև ի վերջո անձին բերման են ենթարկել: Եվ բացի այդ, ամենակարևորը, ոստիկանությունը նշելով, որ մուտքը փակում էին կամ ցանկություն ունեին մուտքը փակելու, պետք էր այդ առումով ինչ-որ պատճառաբանություն ներկայացներ»,- նշել էր փաստաբանը՝ հավելելով, որ այդ պնդումն աբսուրդային է, քանի որ հավաքի որևիցե մասնակից մուտք փակելու ցանկություն չի ունեցել:

Արամազդ Կիվիրյանը փաստել էր, որ հավաքը տեղի է ունեցել բացառապես Պերմյակովին ՀՀ իշխանությունների իրավազորությանը հանձնելու, այսինքն՝ գործը Հայաստանի իրավասու մարմինների կողմից քննելու հարցը բարձրացնելու համար, և շենքի մուտք փակելու որևէ ցանկություն չի եղել:

Աղբյուր` Փաստինֆո