Փաստ ինֆո

Քրեական հեղինակություն համարվող Թևոսիկի եղբոր՝ Արթուր Սաֆարյանի, սպանության գործով այսօրվա դատական նիստում մեղադրող Հայկ Հակոբյանը միջնորդեց ամբաստանյալ Իսրայել Սարգսյանին մեղավոր ճանաչել ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով՝ պատվերով սպանություն, 104-րդ հոդվածի 2-րդ մասի 11-րդ կետով՝ այլ հանցանքը թաքցնելու նպատակով կատարված սպանություն, 235-րդ հոդվածի 1-ին մասով՝ ապօրինի կերպով զենք, ռազմամթերք ձեռք բերելը, պահելը, և դատապարտել ընդհանուր առմամբ 25 տարվա ազատազրկման:

Ըստ մեղադրողի, ամբաստանյալին առաջադրված մեղադրանքն ամբողջությամբ հիմնավորված է, իսկ գործի քննությամբ ձեռք բերված ապացույցներն էլ բավարար մեղադրական դատավճիռ կայացնելու համար:

Մասնավորապես, ըստ մեղադրողի, բավարար ապացույցներ են ձեռք բերվել, որ Իսրայել Սարգսյանը Մովսես Ներսիսյանին պատվիրել է սպանել Արթուր Սաֆարյանին (վերջինս սպանվել է 2014թ. հունվարի 26-ին), որից հետո Ի.Սարգսյանը սպանել է Մովսես Ներսիսյանին:

Ըստ մեղադրանքի կողմի, առաջին սպանությունը կատարվել է Թևոսի դիրքերն ու ազդեցությունը թուլացնելու, իսկ երկրորդը՝ Իսրայել Սարգսյանի բացահայտվելու վտանգը չեզոքացնելու նպատակով:

Հ. Հակոբյանն իր մեղադրական ճառում նշեց, որ Իսրայել Սարգսյանը մտացածին պատրվակով՝ կանանց հետ ժամանց անցկացնելու համար Մովսես Ներսիսյանի հետ գնացել է Մագնում հյուրանոցային համալիր, որտեղ էլ սպանել է Մ.Ներսիսյանին, իսկ դիակն էլ տեղափոխել ու նետել Քանաքեռավանի կոյուղատարի դիտահորը: Մեղադրողն արձանագրեց, որ դիտահորի հարևանությամբ գտնվում է Ի.Սարգսյանի կնոջ անվամբ հողատարածքը:

Ապա սպանությունից հետո Իսրայել Սարգսյանը Ներսիսյանի ավտոմեքենան տարել թողել է օդանավակայանում:

Մեղադրական ճառի՝ երեք ժամ տևած հրապարակման ընթացքում մեղադրողը մեկ առ մեկ անդրադարձավ գործով ձեռք բերված ապացույցներին՝ վկաների ցուցմունքներին, փորձաքննությունների եզրակացություններին, տեսանյութերին և այլն: Նա հատուկ անդրադարձավ նաև ամբաստանյալի ու վկա Տիգրան Ասատրյանի խոսակցության՝ վերջինիս կողմից կատարված ձայնագրությանը: Այն կատարվել է Մովսես Ներսիսյանի ենթադրյալ սպանությունից երկու օր անց, 2014թ. փետրվարի 3-ին: Այդ խոսակցության ժամանակ ամբաստանյալը խոստովանել է, որ Արթուր Սաֆարյանի սպանելու պատվեր է տվել ու սպանել Մովսես Ներսիսյանին:

Մեղադրողը, հաշվի առնելով, որ մրցակից կողմը կարող է բարձրացնել ապացույցի անթույլատրելիության հարց, նշեց, որ ապացույցը ձեռք է բերվել դատավարական կարգի պահպանմամբ:
Բացի այդ, նշեց մեղադրողը, Տիգրան Ասատրյանը ներկայացել է դատարան, այսինքն՝ ապահովվել է իր դեմ ցուցմունք տված անձի հակընդդեմ հարցման ամբաստանյալի իրավունքի իրացումը: Մեղադրողն ընդգծեց, որ ձայնագրությունը միակ ու վճռորոշ ապացույցը չէ, այն մյուս ապացույցների հետ մեկ ամբողջություն է:

Մեղադրողը անդրադարձավ նաև առայսօր Մովսես Ներսիսյանի դիակի չհայտնաբերման հարցին:

Տեսադաշտից Մովսես Ներսիսյանի անհայտանալուց հետո ծագած կասկածները հիմնավորվել են Մագնում հյուրանոցում, Մ.Ներսիսյանի մեքենայում և կոյուղատարի դիտահորի մոտ հայտնաբերված արնանման հետքերով:

Ըստ մեղադրողի, չկա որևէ տեղեկություն, որ Մովսես Ներսիսյանը հատել է Հայաստանի սահմանը, և նրա ողջ լինելու հավաստի ու բավարար տվյալներ առայսօր ձեռք չեն բերվել:

Նշվեց, որ ենթադրաբար դիտահորը նետված Մովսես Ներսիսյանի դիակը չի հայտնաբերվել, սակայն քննչական փորձարարության շրջանակում չեն հայտնաբերվել նաև դիտահորը նետված անկենդան կենդանիների մարմինները:

Փորձագետները եզրակացրել են, որ Մովսես Ներսիսյանի դիակը կարող է քայքայված լինել: Փորձագետները միաժամանակ գտել են՝ կարելի է ենթադրել, որ կարող էին պահպանվել կմախքային ոսկորները և մասնակիորեն՝ փափուկ հյուսվածքները:
Հաջորդ դատական նիստում պաշտպանական ճառով հանդես կգա Իսրայել Սարգսյանի պաշտպան, փաստաբան Հեկտոր Սարդարյանը: Պաշտպանից հետո պաշտպանական ճառով հանդես կգա նաև Իսրայել Սարգսյանը, սակայն միայն հաջորդ դատական նիստին պարզ կլինի, թե ամբաստանյալին անհրաժե՞շտ է լրացուցիչ ժամանակ ճառին նախապատրաստվելու համար, թե՞ ոչ:

Աղբյուր` Փաստինֆո