Փաստ ինֆո

Ամբաստանյալ Արարատ Խանդոյանի վերաբերյալ զանգվածային անկարգությունների գործով այսօրվա դատական նիստում ավարտվեց դատաքննությունը: Հաջորդ դատական նիստում կողմերը հանդես կգան ճառերով:

Մինչ այդ դատարանը մերժեց պաշտպանական կողմի միջնորդությունը՝ ամբաստանյալի կալանավորումը վերացնելու մասին: Արարատ Խանդոյանի պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանը միջնորդության մեջ հղում կատարեց Վերաքննիչ քրեական դատարանի կողմից վերջերս մեկ այլ գործով փաստաբանի բողոքի հիման վրա կալանքն անփոփոխ թողնելու դատարանի որոշումը բեկանելու որոշմանը: Ինչպես այն գործով, այնպես էլ Խանդոյանի գործով կալանավորումը անորոշ, անժամկետ անփոփոխ է թողնվել:

Դատարանը մերժեց նաև դատաքննությունը լրացնող պաշտպանական կողմի միջնորդությունները երկու վկայի ցուցմունքներն անթույլատրելի ճանաչելու և որպես լրացուցիչ վկա երկու անձի, այդ թվում՝ ԱԺ պատգամավոր Նիկոլ Փաշինյանին դատարան հրավիրելու ու հարցաքննելու մասին:

Ըստ ամբաստանյալ Արարատ Խանդոյանի, Երևանի Խորենացու փողոցում ոստիկաններն են հարձակվել ժողովրդի վրա և ոչ թե հակառակը: Ըստ նրա, զանգվածային անկարգությունների գործերն, այդ թվում՝ իր վերաբերյալ գործը շինծու գործեր են, արդեն իսկ այդ գործերով տասը հոգի ապօրինի դատապարտվել է:

Դատարանը պարզաբանեց, որ եթե կա խնդիր ոստիկանների գործողությունների հետ կապված, ապա այդ առումով կա այլ ընթացակարգ՝ դիմել Հատուկ քննչական ծառայություն, որն էլ կքննի դիմումը: Իսկ վկայակոչած վկաների ցուցմունքներն անթույլատրելի ճանաչելու համար հիմքեր չկան, ինչը չի բացառում, որպեսզի անհրաժեշտության դեպքում վերջնական դատական ակտում դատարանն անդրադառնա ցուցմունքների անթույլատրելիության հարցին:

Ի դեպ, Մարդու իրավունքների պաշտպանի լիազորությունների շրջանակում ՄԻՊ աշխատակազմի ներկայացուցիչները այսօրվա դատական նիստի դիտարկում էին անցկացնում:

Նրանք դատարանում էին գտնվում փաստաբան Արա Ղարագյոզյանի դիմումի հիման վրա: Արարատ Խանդոյանի պաշտպանը դիմել էր ՀՀ Մարդու իրավունքների պաշտպանին՝ խնդրելով համապատասխան քայլեր ձեռնարկել իր և իր պաշտպանյալի խախտված իրավունքները վերականգնելու ուղղությամբ:

Ըստ Արա Ղարագյոզյանի, դատարանը խոչընդոտում է իր փաստաբանական գործունեությանը և խախտում Ա.Խանդոյանի պաշտպան ունենալու իրավունքը: Մասնավորապես, դատարանն որոշում է կայացրել հանրային պաշտպան հրավիրելու մասին այն դեպքում, որ Արարատ Խանդոյանը չի հրաժարվել իր պաշտպանից և դատարանն էլ Ա.Ղարագյոզյանին չի հեռացրել քրեական գործի վարույթից:

Լուսանկարը՝ Ֆոտոլուրի

Աղբյուր` Փաստինֆո