Փաստ ինֆո

Վերաքննիչ քրեական դատարանը՝ նախագահությամբ Ռուզաննա Բարսեղյանի, դատավորներ Արմեն Դանիելյանի և Մխիթար Պապոյանի այսօր մերժել է մեղադրող դատախազի կողմից արդարացման դատավճռի դեմ բերված բողոքը՝ ուժի մեջ թողնելով առաջին ատյանի դատարանի դատավճիռը:

Հիշեցնենք, որ Ավան և Նոր-Նորք վարչական շրջանների ընդհանուր իրավասության դատարանը՝ նախագահությամբ Արմեն Վարդապետյանի, մի խումբ անձանց կողմից մեկ ուրիշի առողջությանը դիտավորությամբ միջին ծանրության վնաս պատճառելու մեջ մեղադրվող 3 երիտասարդներն անպարտ են ճանաչվել և արդարացվել:

Սարգիս, Սերոբ և Գուրգեն Հարությունյանների պաշտպանությունը իրականացրել է փաստաբան Հայկ Հակոբյանը:

Մեղադրանքը պաշտպանող դատախազը հիմնավորված էր համարել Հարությունյաններին առաջադրված մեղադրանքը և միջնորդել էր նրանցից յուրաքանչյուրին դատապարտել 2-ական տարվա ազատազրկման:

Սակայն արդարացման դատավճռից դժգոհ լինելով մեղադրողը վերաքննիչ բողոք էր ներկայացրել պահանջով բեկանել Սերոբ,Գուրգեն և Սարգիս Հարությունյանների վերաբերյալ 31.10.2016թ Երևանի Ավան և Նոր Նորք վարչական շրջանների ընդհանուր իրավասության դատարանի դատավճիռն ու գործն ուղարկել ստորադաս դատարան` նոր քննության:

Ըստ մեղադրանքի՝ Սարգիս Հարությունյանը իր ընկերների՝ եղբայրներ Սերոբ և Գուրգեն Հարությունյանների հետ ծեծի են ենթարկել Գուրգեն Գաբրիելյանին՝ դիտավորությամբ նրա առողջությանը պատճառելով միջին ծանրության վնաս՝ առողջության տևական քայքայումով:
Սարգիս, Սերոբ և Գուրգեն Հարությունյաններին մեղադրանք էր առաջադրվել ՀՀ քրեական օրենսգրքի 113-րդ հոդվածի 2-րդ մասի 3-րդ կետով:

Սարգիս Հարությունյանի նկատմամբ որպես խափանման միջոց է ընտրված եղել կալանավորումը, իսկ Սերոբ և Գուրգեն Հարությունյանների նկատմամբ՝ չհեռանալու մասին ստորագրությունը:

Ըստ պաշտպանի՝ քրեական գործով նախաքննությունը կատարվել էր թերի և ոչ օբյեկտիվ և իր պաշտպանյալներին մեղադրանք էր առաջադրվել հիմնականում տուժողի իրարամերժ, ոչ արժանահավատ և նրա մերձավոր հարազատների գործին ոչ ականատես վկաների ցուցմունքների հիման վրա, հետամուտ չլինելով գործում առկա այլ ապացույց համարվող տեսաձայնագրմամբ փաստված դեպքին ականատես անձանց հայտնաբերելու և նրանց որպես վկա հարցաքննելու ուղղությամբ:

Պաշտպանը գտնում է, որ խախտվել են ինչպես ՀՀ Սահմանադրության, այնպես էլ քրեական դատավարության օրենսգրքի մի շարք հոդվածների պահանջներ:

Աղբյուր` Փաստինֆո