Փաստ ինֆո

Շաբաթ օրը ԱՄՆ գլխավոր դատախազ Ջեֆֆ Սեշնսը և նրա տեղակալ Ռոդ Ռոզենստինը կանցկացնեն առաջին հարցազրույցները՝ Դոնալդ Թրամփի կողմից պաշտոնից ազատված, Հետաքննությունների դաշնային բյուրոյի տնօրեն Ջեյմս Կոմիին փոխարինող գտնելու համար:

Ըստ BBC-ի ռուսական ծառայության՝ ամերիկյան ԶԼՄ-ների տեղեկություններով, ընդհանուր առմամբ Վաշինգտոնը ուսումնասիրում է ՀԴԲ ղեկավարի պաշտոնի 11 թեկնածություն:

Մայիսի 13-ին կանցկացվեն հարցազրույցներ այդ պաշտոնի 4 հավակնորդների հետ: Նրանց թվում է ՀԴԲ ղեկավարի պաշտոնակատար, Ջեյմս Կոմիի նախկին տեղակալ Էնդրյու Մաքքեյբը:

Իր ղեկավարի պաշտոնից ազատվելուց հետո Մաքքեյբը՝ ելույթ ունենալով Սենատի հանձնաժողովի առաջ, հերքել էր Սպիտակ տան պնդումներն առ այն, թե իբրև նախկին ղեկավարը կորցրել է իր ենթակաների վստահությունը:

«Ես կարող եմ համոզվածությամբ ասել ձեզ, որ աշխատակիցների գերակշիռ մեծամասնությունը տնօրեն Կոմիի հետ ուներ լավ ու մտերմական հարաբերություններ»,- ասել է հինգշաբթի Մաքքեյբը: Նա նաև շատ կարևոր է համարել ԱՄՆ ընտրական արշավին Ռուսաստանի հնարավոր միջամտությանն առնչվող Հետաքննությունների դաշնային բյուրոյի հետաքննությունը:

Ավելի վաղ Սպիտակ տանը Ռուսաստանին վերաբերվող հետաքննությունը անվանել են «հավանաբար ամենաանկարևոր խնդիրներից մեկը» նրանց շարքում, որոնցով այժմ զբաղվում է ՀԴԲ-ն:

Հարցազրույցին հրավիրվել է նաև Տեխասի նահանգից հանրապետական սենատոր Ջոն Կորնինը, ով 1990-ների վերջերին զբաղեցնում էր Տեխասի գլխավոր դատախազի պաշտոնը:

ՀԴԲ ղեկավարի պաշտոնի ևս երկու հավակնորդները իրավաբան Էլիս Ֆիշերն է և Նյու Յորքի վերաքննիչ դատարանի դատավոր Մայքլ Գարսիան, ով 2012թ. նշանակվել էր ՖԻՖԱ-ի էթիկայի հանձնաժողովի քննչական պալատի ղեկավար, սակայն 2014թ. հեռացել էր այդ պաշտոնից կազմակերպության քաղաքականության հետ անհամաձայնության պատճառով:

Ավելի վաղ Սպիտակ տան մամուլի քարտուղար Շոն Սփայսերը հայտարարել էր, որ Դոնալդ Թրամփը ՀԴԲ նոր ղեկավարին կնշանակի հենց որ գտնվի այդ պաշտոնին համապատասխանող թեկնածու:

Աղբյուր` Փաստինֆո