Փաստ ինֆո

Զանգվածային անկարգությունների գործով ամբաստանյալ Արարատ Խանդոյանի պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանը այսօր դիմել է ՀՀ Մարդու իրավունքների պաշտպանին՝ խնդրելով համապատասխան քայլեր ձեռնարկել իր և իր պաշտպանյալի խախտված իրավունքները վերականգնելու ուղղությամբ: Այս մասին «Փաստինֆո»-ին հայտնեց Արա Ղարագյոզյանը՝ պարզաբանելով, որ դատարանը խոչընդոտում է իր փաստաբանական գործունեությանը և խախտում Ա.Խանդոյանի պաշտպան ունենալու իրավունքը:

Ըստ Արարատ Խանդոյանի պաշտպանի, լարված մթնոլորտում է անցել 24.04.2017 թ. դատական նիստը: Այդ նիստում մեղադրողն առարկություններ է ներկայացրել պաշտպանական կողմի ներկայացրած մի շարք միջնորդությունների դեմ, մինչդեռ իր պաշտպանյալին դատարանը հնարավորություն չի տվել օգտվել հայտարարություն անելու իր իրավունքից: Ավելին, Ա.Խանդոյանի նկատմամբ դատարանը կիրառել է դատական սանկցիա՝ նախազգուշացում, ինչից հետո էլ Խանդոյանը պնդել է, որ հայտարարություն պետք է անի, դատարանն էլ այս անգամ կիրառել է ավելի խիստ սանկցիա՝ դատական նիստերի դահլիճից հեռացում: Պաշտպան Ղարագյոզյանն էլ իր պաշտպանյալին դատական նիստից հեռացնելուց հետո նույնպես լքել է դատական նիստերի դահլիճը:

Նույն այդ օրը դատարանն որոշում է կայացրել հանրային պաշտպան հրավիրելու մասին այն դեպքում, որ Արարատ Խանդոյանը չի հրաժարվել իր պաշտպանից և դատական նիստի ժամանակ հրաժարվել է հանրային պաշտպանի ծառայությունից:

11.05.2017 թ. դատական նիստի ժամանակ Արարատ Խանդոյանը դատարանում հայտարարել է, որ իրեն հանրային պաշտպան պետք չէ, և դատարանը չպետք է որոշի, թե ով պետք է ներկայացնի իր շահերը դատարանում. «Դուք չեք որոշելու ով է իմ պաշտպանը լինելու: Ես ունեմ պաշտպան, իմ պաշտպանն Արա Ղարագյոզյանն է»:

Հանրային պաշտպան Լիաննա Գասպարյանն էլ ասել է, որ Հանրային պաշտպանի գրասենյակից իրեն է հանձնարարվել այս գործը, «սակայն, ինչպես տեսնում եք, անձը չի ցանկանում, որպեսզի ես ստանձնեմ վերջինիս պաշտպանությունը»: Հանրային պաշտպանը վկայակոչել է ՀՀ քրեական դատավարության օրենսգրքի համապատասխան հոդվածը, որի համաձայն ինքը կարող է անձի պաշտպանությունը ստանձնել միայն վերջինիս կողմից համաձայնություն ունենալու դեպքում: «Այս պարագայում ես գտնում եմ, որ չեմ կարող մասնակցել այս գործին»,- հայտարարել է հանրային պաշտպանը:

Սակայն դատարանը որոշել է հանրային պաշտպանին ներգրավել որպես Ա.Խանդոյանի պաշտպան այն դեպքում, որ Արարատ Խանդոյանը չի հրաժարվել իր պաշտպանից և դատարանն էլ Ա.Ղարագյոզյանին չի հեռացրել քրեական գործի վարույթից:

Մեջբերելով ՀՀ քրեական դատավարության օրենսգրքի համապատասխան հոդվածը՝ Արա Ղարագյոզյանն եզրակացնում է՝ այսինքն, տեղի է ունենում պաշտպանական իրավունքի ակնհայտ խախտում:

«Հարգելի պարոն Թաթոյան, թեպետ մարդու իրավունքների պաշտպանը չի միջամտում դատական գործերին, սակայն ակնկալում ենք Ձեր աջակցությունը այս հարցում և հուսով եմ, որ 18.05.2017 թ ժամը 12.00-ին Կենտրոն և Նորք-Մարաշ վարչական շրջանների ընդհանուր իրավասության դատարանում Ձեր աշխատակազմից մարդ կուղարկեք վերը նշված ապօրինի դատավարությանը»՝ այդ միջոցով փորձելով աջակցել մարդու իրավունքների ոտնահարման վերացմանը, նշում է իր դիմումում Արա Ղարագյոզյանը:

Աղբյուր` Փաստինֆո