Փաստ ինֆո

Անցյալ տարվա մայիսի մեկից մինչև այս տարվա փետրվարի 28-ն ընկած ժամանակահատվածում, տասն ամսվա ընթացքում, մենք ունեինք հակառակորդի կողմից արձակված կրակոցներից 20 զոհ: Այս մասին «Արմենպրես» լրատվական գործակալության մամուլի սրահում այսօր հայտնեց Արցախի մարդու իրավունքների պաշտպան Ռուբեն Մելիքյանը՝ ընդգծելով, որ «մենք դա շատ մեծ թիվ ենք համարում և բարձրաձայնում ենք, որ Ադրբեջանը շարունակաբար թույլ է տալիս հրադադարի ռեժիմի խախտումներ»: Վերջին նման դեպքը փետրվարի 24-25-ի հատվածում էր:

«Մենք այստեղ փաստահավաք առաքելություն իրականացրեցինք, հայտարարությամբ հանդես եկանք, բավականին լայն տարածեցինք, խոսքը վերաբերվում էր, մեր համոզմամբ, երկու փոխկապակցված երևույթների, առաջինը, դիվերսիոն ներթափանցման երկու փորձերին, երկրորդ Թալիշ գյուղին էր վերաբերվում, այնտեղ ռմբակոծություն էր տեղի ունեցել երկու օրերի ընթացքում: Փաստահավաք աշխատանքի արդյունքն արձանագրեցինք: Մենք պետք է կարողանանք միջազգային հանրության համար հասկանալի լեզվով մատուցել, ձևավորել և ստեղծել տեղեկատվություն, և մենք դա անելու ենք»,- հավելեց Ռ.Մելիքյանը:

Ըստ ԱՀ ՄԻ պաշտպանի, այս պահին ավելի կարևոր է դառնում այսպես կոչված սևցուցակավորումը: «Մենք այն համոզմանն ենք, որ սևցուցակավորումն ինքնին անթույլատրելի գործունեություն է, այսինքն՝ այն կրում է խտրական բնույթ և դրա պատճառով սահմանափակվում են մի շարք իրավունքներ»,- ասաց կառույցի ղեկավարը:

Իսկ առաջինն այն վտանգն է, որ Ադրբեջանից է բխում, և Ադրբեջանը չի էլ թաքցնում այդ վտանգը, և «մենք այդ երևույթին բաց աչքերով և սառը պետք է նայենք»:

ՄԻ պաշտպանը անդրադարձավ անցյալ տարի «Հայաստանի եվրոպական բարեկամներ» կազմակերպության կողմից Արցախում անցկացված շատ հետաքրքիր սոցիոլոգիական հետազոտությանը: Ո՞րն եք դուք համարում թիվ մեկ մտահոգությունը հարցին հիսուն տոկոսից ավելին պատասխանել էր՝ անվտանգությունը, ինչը մարդու իրավունքների տերմինաբանությամբ արտահայտված կյանքի, արդարության իրավունքներն են: Դրանից հետո են գալիս սևցուցակավորման հետ կապված հարցերը. Արցախ մուտքի և այլ երկրներում Արցախի քաղաքացիների իրավունքների սահմանափակումների հետ կապված, խոսքի ազատության խնդիրները: «Նույն Լապշինի գործը ոչ այլինչ էր, եթե ոչ առաջին հերթին խոսքի ազատության խնդիր: Այսինքն՝ Ադրբեջանն իրեն հասու բոլոր միջոցներով, և դա չի էլ թաքցնում, փորձում է սահմանափակել Արցախի քաղաքացիների բոլոր հնարավոր իրավունքները: Մենք սառն ենք նայում իրականությանը, մենք էլ մեր հակաքայլերն ենք իրականացնում»,- ասաց Ռուբեն Մելիքյանը:

Աղբյուր` Փաստինֆո