Փաստ ինֆո

Արցախին անհրաժեշտ է մարդու իրավունքների ռազմավարություն՝ ներկայացնելով իր մեկ տարվա պաշտոնավարման ընթացքում կատարած աշխատանքը,  «Արմենպրես» լրատվական գործակալության մամուլի սրահում այսօր հայտարարեց Արցախի մարդու իրավունքների պաշտպան Ռուբեն Մելիքյանը:

Արցախի ՄԻ պաշտպանը նշեց, որ այդ հարցն իրենք ընդգծել են իրենց տարեկան զեկույցում:

«Ընդհանրապես ռազմավարական մոտեցումը խնդիրներին կարևոր է երկու տեսանկյունից՝ առաջինը, որպեսզի մենք հասկանանք ուր ենք գնում: Դրա համար, իհարկե,  աշխատանքի արդյունք է պետք՝ վիճակագրական, այլ փորձագիտական ճանապարհով, որպեսզի  հասկանանք խնդիրները, հետո դրանց լուծումները տանք: Եվ, երկրորդ, չափելիությունը՝  առաջընթաց ունե՞նք, թե՞ չունենք: Այս կոչն ենք արել սփյուռքյան կառույցերին,  իրավապաշտպան հանրությանը»,- ասաց Ռուբեն Մելիքյանը:

ՄԻ պաշտպանն առաջնահերթությունների շարքում նշեց միջազգային կառույցների հետ աշխատանքը: Այդ հարցում Արցախի մարդու իրավունքների ինստիտուտն երկու հիմնական գործընկեր ունի՝  հայկական սփյուռքն ու միջազգային իրավապաշտպան հանրությունը: Բոլոր այն սփյուռքյան  կառույցները, ում հետ իրենք աշխատում են, իսկ իրենք աշխատում են հայկական սփյուռքի հիմնական խաղացողների հետ, մեծ պատրաստակամություն ունեն Արցախում իրականացվող գործունեությունը որոշակիորեն համալրել կամ շեշտադրել մարդու իրավունքների կոմպոնենտը:

«Մեզ համար դա շատ կարևոր է, որովհետև արցախյան հակամարտությունն ի վերջո իր էությամբ մարդու իրավունքներին վերաբերող հակամարտություն է, դա մարդու իրավունքների խնդիր է, դա ոչ այլ ինչ է, եթե ոչ իրավունքի և ոչ իրավական մտածողության հակամարտություն»,- նկատեց Ռուբեն Մելիքյանը:

ՄԻ պաշտպանը նշեց, որ միջազգային համագործակցությունը իրենց համար ունի սկզբունքային նշանակություն,  և «մենք այս ուղղությամբ աշխատում ենք»:

Ռ.Մելիքյանը հատուկ կարևորեց նաև հայաստանցի գործընկերների հետ աշխատանքը՝  չի եղել դեպք, որ իրենք դիմեն որևէ հայաստանյան  կազմակերպության և չստանան ակնկալածից ավելին:   

Արցախի մարդու իրավունքների պաշտպանն ընդգծեց, որ այն փաստաթուղթը, որը մեծ հաշվով ամփոփում էր տարեկան գործունեությունը, Արցախի ազգային ժողովի առջև ներկայացված տարեկան հաշվետվությունն էր:

Առաջնահերթություններից առաջինը, կառույցի ղեկավարի գնահատմամբ, հանրային իրազեկման խնդիրն է և դրա հետ զուգակցված կարողությունների մեծացման խնդիրը: Արցախը՝  չունենալով կարողությունների զորացման այն բոլոր հնարավորությունները, որ, օրինակ, Հայաստանում գործընկերներն ունեն, կարիք ունի այդ բացը լրացնելու՝ խոսքը վերաբերվում է ինչպես պետական ապարատին, այնպես էլ, քաղաքացիական հասարակությանն ու անհատ քաղաքացիներին: «Կարողությունների զորացումը կարևոր առաջնահերթություն է մեզ համար, և մենք հատուկ ընդգծել ենք դա և նաև փորձել ենք լուծման ուղիներ առաջադրել»,- նշեց ՄԻ պաշտպանը:

Երկրորդ առաջնահերթությունը քաղաքացիական հասարակության հետ  աշխատանքն է՝ հաշվի առնելով Արցախի քաղաքացիական հասարակության յուրահատուկ վիճակը՝ առաջին խնդրով պայմանավորված:

Երրորդ առաջնահերթությունը մարդու իրավունքների ոլորտում կրթական առաջնահերթությունն է: Ռ.Մելիքյանը կարևորեց, որ առաջին անգամ անցյալ տարի Արցախի պետական  համալսարանի թիմը մասնակցեց միջազգային իրավունքի ամենահեղինակավոր մրցույթի ազգային, այսինքն՝ Հայաստանում կայացված փուլին, դատավորները, այսինքն՝ մրցավարները,  շատ գոհ էին: «Ես վստահ եմ, որ այս ուղղությունը մենք պետք է շարունակենք»:

Հաջորդ առաջնահերթությունը փակ հաստատությունների հետ աշխատանքն է, այստեղ կան  թերություններ: Քաղաքացիական հասարակության հետ քննարկման ժամանակ վերջիններս քննադատություն են հնչեցրել առ այն, որ ՄԻՊ հաստատությունն որպես փակ հաստատություններ առավելապես աշխատում է քրեակատարողական հաստատությունների հետ, քննադատությունն ընդունվել է: «Մենք մտադիր ենք առաջիկա տարվա ընթացքում ուշադրություն դարձնել նաև այլ, սոցիալական նշանակություն ունեցող  փակ հաստատությունների  հետ աշխատանքին»,- ասաց Ռուբեն Մելիքյանը:

Արցախի մարդու իրավունքների պաշտոնը Ռուբեն Մելիքյանը ստանձնել է մայիսի 5-ից՝ անմիջապես ապրիլյան պատերազմի ավատից հետո: «Ամենևին պատահական չէր, որ Արցախի ազգային ժողովի առջև պատգամավորների հարցերին պատասխանելիս կարմիր թելով անցնում էր հենց ապրիլյան պատերազմից բխող մարդու իրավունքների խախտումների մասին հարցերը: Եվ ես հենց Ազգային ժողովի առջև հանձնառություն ստանձնեցի փաստահավաք առաքելություն սկսել, որը կարճ ժամանակ հետո մենք սկսեցինք, որը ամփոփվեց դեկտեմբերի 9-ին միջանկյալ զեկույցով և որը մենք չենք ավարտել: Սա կարող եմ համարել իրավիճակային առաջնահերթություն»,- ասաց Ռուբեն Մելիքյանն՝ հատուկ ընդգծելով, որ «մենք մարդու իրավունքների սովորական ազգային հաստատություն ենք՝ իրեն բնորոշ բոլոր հատկանիշներով, բոլոր ընդհանրություններով, հատկապես եվրոպական, վերջերս տարածվել է նաև այլ ուղղություններով»:

Ըստ Ռ.Մելիքյանի, իր գլխավորած կառույցի  աշխատաժամանակի մեծ մասը իրենք իրականում ծախսում են հենց  քաղաքացիների դիմումների քննարկման, պետական մարմինների կոմունիկացիայի, քաղաքացիների ընդունելության վրա և այլն: Քաղաքացիների դիմումներն իրենց կառուցվածքով որոշակիորեն տարբերվում են հարևան այլ պետությունների դիմումների կառուցվածքից՝ հաշվի առնելով հենց Արցախի պետության առանձնահատկությունները: Ավելի մեծ թիվ են կազմում զինվորական ծառայության հետ կապված դիմումները, ինչպես նաև սոցիալական ոլորտի դիմումները՝ հաշվի առնելով Արցախի Հանրապետության քաղաքականության առավել ընդգծված սոցիալական բնույթը:

Աղբյուր` Փաստինֆո