Փաստ ինֆո

2016թ. հուլիսի 19-ին Սարի-թաղում իշխանության ներկայացուցչի նկատմամբ կյանքի կամ առողջության համար վտանգավոր բռնություն գործադրելու գործով մեղադրյալ Էդուարդ Զեյթունյանը մարտի 24-ից գտնվում է հացադուլի մեջ:

«Փաստինֆո»-ն ՀՀ արդարադատության նախարարության Քրեակատարողական վարչության հանրային կապերի բաժնի պետ Գոռ Ղլեչյանից տեղեկացավ, որ Էդուարդ Զեյթունյանը հացադուլ հայտարարելու պահից սկսած գտնվել է բժիշկների հսկողության ներքո, և նրա առողջական վիճակը գնահատվում է բավարար:

Միևնույն ժամանակ Գոռ Ղլեչյանը նշեց, որ բժիշկը կորոշի՝ Զեյթունյանը հացադուլի մեջ գտնվելով ինչպիսի՞ բուժում պետք է ստանա:

Ավելի վաղ կալանավորի կինը հայտարարել է, թե ամուսինն իրեն վատ է զգում, պահանջել է, որ բժիշկները նրան այցելեն և բուժօգնություն ցուցաբերեն, սակայն չեն այցելել:

Էդուարդ Զեյթունյանը հացադուլ է հայտարարել՝ պահանջով փոփոխել իր նկատմամբ ընտրված խափանման միջոց կալանավորումը:

Ըստ մեղադրանքի՝ Էդուարդ Զեյթունյանը 19.07.2016թ. ժամը 20.00-ի սահմաններում, Երևան քաղաքի Մովսես Խորենացի փողոցին հարող` Գլինկա և Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ:

Նրան մեղադրանք է առաջադրվել ՀՀ քրեական օրենսգրքի 316-րդ հոդվածի 2-րդ մասով:

Նշենք նաև, որ այսօր ՀՀ գլխավոր դատախազության դիմաց նստացույց են սկսել Սարի- թաղի դեպքերով կալանավորավծների հարազատները, նրանց թվում է նաև Էդուարդ Զեյթունյանի կինը, ով հայտարարեց, որ ամուսնուն նույնիսկ ճնշման դեղ չեն տալիս. պատճառաբանում են, որ հացադուլի մեջ է և որ իրավունք չունեն դեղորայք տալ:

Նստացուցարարների պահանջը մեկն է՝ ազատ արձակել կալանքի տակ գտնվող իրենց հարազատներին:

Լուսանկարը՝ A1+  -ի

Աղբյուր` Փաստինֆո