Փաստ ինֆո

ՀՀ քրեական օրենսգրքի 258-րդ հոդվածի 3-րդ մասի 2-րդ կետով մեղադրվող Վարդան Ենոքյանը նախօրեին դատարանի դահլիճից ազատ է արձակվել:

«Փաստինֆո»-ի հարցմանն ի պատասխան՝ ՀՀ դատական դեպարտամենտի արարողակարգի և հասարակայնության հետ կապերի վարչությունից հայտնեցին, որ Արագածոտնի մարզի ընդհանուր իրավասության դատարանի՝ դատավոր Սուրեն Մնոյանի նախագահությամբ, երեկ կայացված դատավճռով Վարդան Ենոքյանը մեղավոր է ճանաչվել առաջադրված մեղադրանքում և դատապարտվել է 6 ամիս ժամկետով ազատազրկման:

Միևնույն ժամանակ դատավճռով՝ Ենոքյանի նկատմամբ նշանակված պատիժը համարվել է կրած, և նրա նկատմամբ ընտրված խափանման միջոց կալանավորումը վերացվել է՝ նրան անհապաղ ազատ արձակելով դատական նիստերի դահլիճից:

Ավելի վաղ «Փաստինֆո»-ն տեղեկացրել էր, որ Ենոքյանին ի սկզբանե մեղադրանք էր առաջադրվել իշխանության ներկայացուցչի նկատմամբ բռնություն գործադրելու մեջ` ՀՀ քրեական օրենսգրքի 316-րդ հոդվածի 1-ին մասով, ինչը վերաորակվել էր խուլիգանության, որը զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով:

Կալանավորը հացադուլ է հայտարարել՝ պահանջելով միավորել ՔԿ –ում և ՀՔԾ-ում հարուցված քրեական գործերը

Այսպիսով, օգոստոսի 12-ին Կարբի Ձոր հանգստյան վայրում ընտանեկան խնջույքի ժամանակ 31-ամյա Վարդան Ենոքյանի և նրա կնոջ միջև վիճաբանություն է ծագել, որի ժամանակ տղամարդը հայհոյել է կնոջը:

Մի քանի անգամ նույն իրավիճակը կրկնվելուց հետո վիճաբանությանն ականատես տարածքում ծառայություն իրականացնող ոստիկանության աշխատակիցները մոտեցել են Վարդանին, սակայն վերջինս ներողություն է խնդրել հասարակական վայրում իրեն այդ կերպ պահելու համար:

Այս ամենից հետո ոստիկանի և Վարդանի միջև քաշքշուկ է եղել և ոստիկանը հարվածել է Վարդանի դեմքին, ինչի հետևանքով վերջինս վայր է ընկել գետնին՝ ծնկների վրա, այդ ժամանակ Վարդանի թիկունքից մոտեցել է մյուս ոստիկանը, ով ևս հարվածել է նրան:

Վարդան Ենոքյանի պաշտպան Հայկազ Գալստյանը մեզ հետ զրուցում հայտնել էր, որ Վարդանն իրեն առաջադրված մեղադրանքը չի ընդունում:

Նշենք, որ Վարդանը գտնվել է կալանքի տակ, և միայն պաշտպան Հայկազ Գալստյանի միջնորդությունից հետո դատարանը Ենոքյանին կալանքից գրավով ազատելը ճանաչել էր թույլատրելի՝ սահմանելով գրավի չափ՝ 800․000 ՀՀ դրամ:

Սակայն Վերաքննիչ դատարանը բեկանել էր առաջին ատյանի դատարանի որոշումը՝ քանի որ Ենոքյանը չէր կարողացել սահմանված գրավի չափը վճարել, ուստիև նա կրկին հայտնվել էր կալանքի տակ:

Հիշեցնենք նաև, որ Վարդան Ենոքյանի հաղորդման հիման վրա ՀՔԾ-ում ՀՀ քրեական օրենսգրքի 309-րդ հոդվածի 2-րդ մասով հարուցվել էր քրեական գործ:

Ենոքյանի պաշտպան Հայկազ Գալստյանից «Փաստինֆո»-ն տեղեկացավ նաև, որ ՀՔԾ-ում քննվող քրեական գործի վարույթը կարճվել է՝ ապացույցների անբավարարության հիմքով:

Աղբյուր` Փաստինֆո