Փաստ ինֆո

Քրեական հեղինակություն համարվող Թևոսիկի եղբոր՝ Արթուր Սաֆարյանի, սպանության և Մովսես Ներսիսյանի ենթադրյալ սպանության գործով այսօր հրապարարակվեցին դատարան չներկայացած երկու վկայի նախաքննական ցուցմունքները:

Վկաներից մեկը տաքսու վարորդ է, նա հայտնել է, որ 2014թ. փետրվարի լույս 2-ի գիշերը կեսգիշերից մինչև կեսգիշերից կես ժամ անց իրեն մոտեցել է մի անծանոթ տղամարդ, ասել, որ իրեն տաքսի է պետք:

Երբ հասել են Իսակովի պողոտա, ուղևորը ասել է, որ ինչ-որ բան է մոռացել օդանավակայանում, ինքը շրջադարձ է կատարել, վերադարձել օդանավակայանի մոտ: Ուղևորը գնացել է, ինքն էլ մի պահ հեռացել է մեքենայի մոտից, ապա վերադառնալով՝ տեսել է, որ ուղևորը մեքենայի մոտ կանգնած է՝ սպիտակ փաթեթը ձեռքին, իր կարծիքով դա եղել է քառակուսի տուփ, որի պարունակությունն իրեն հայտնի չէ: Իրար հետ չեն խոսել, չեն քննարկել, թե ինչ էր ուղևորը մոռացել: Ուղևորին Կիևյան-Բարեկամություն խաչմերուկում իջեցրել է:

Ըստ վկայի նախաքննական ցուցմունքի, ուղևորը մինչև հոնքերը քաշած ամառային «կոզիրյոկ» գլխարկով էր, սովորական դեմք ուներ, բայց դեմքն իր մեջ տպավորվել է:

Վկան Իսրայել Սարգսյանին լուսանկարով ճանաչել է՝ ներկայացված չորս հոգու լսանկարների միջից, և հայտարարել, որ «ես իրե՛ն եմ տեղափոխել»: Ընդ որում, չի նշել, թե կոնկրետ ինչ հատկանիշներով է ճանաչել Իսրայելին:

Առերես հարցաքննության ժամանակ ևս վկան պնդել է, որ «այս մարդն է եղել, անունը չգիտեմ, ընդամենը մի քանի բառ ենք փոխանակել, բայց ընդհանուր դեմքն իմ մեջ տպավորվել է»:

Ամբաստանյալի պաշտպան Հեկտոր Սարդարյանը կասկած հայտնեց, թե ինչպես է տաքսու վարորդի պես անգրագետ մարդը արտաքինը նկարագրելիս այդպիսի տերմիններ օգտագործել, ինչպես գիշերով տեսել, մասնավորապես, ուղևորի աչքերի գույնը: Ըստ պաշտպանի, ցուցմունքը լրիվ թելադրված է, ոչ մի տերմին նրա խելքի բանը չէր:

Իսրայել Սարգսյանն էլ իր հերթին նշեց, որ վկան չէր կարող իր աչքերին նայել ու այդպիսի ցուցմունք տալ, դրա համար էլ նրան փախցրել են Կրասնոդար:

Իսրայել Սարգսյանը անհավանական, հեքիաթ համարեց վկայի պատմածը՝ այդ ինչպես է եղել, որ ինքն օդանավակայանի ֆիրմային մեքենաներին չի մոտեցել, «փափախչի»-ին է մոտեցել, ինչպես է իմացել, որ նա տաքսու վարորդ էր՝ ճակատին տաքսու նշան կա՞ր: «Ոչ մի ապացույց չկա, որ ես իր տաքսին եմ նստել»,- ասաց ամբաստանյալը՝ հավելելով, որ վարորդն ուրիշ ուղևորի է բերել, ժամով տեսել են, որ մեքենա է մտնում, վարորդին տեսել են ու հասկացել, որ նրա հետ կարող են օպերատիվ աշխատանքներ կատարել, դրա համար էլ իրեն մշակել են: Ըստ Ի.Սարգսյանի, սուտ է նաև այն, որ օդանավակայանից մինչև Բարեկամություն ընթանալիս ոչ մի բառ չի փոխանակել ուղևորի հետ՝ «ո՞նց կարող էինք ոչ մի բառ չխոսեինք»:

Իսկ ճանաչման գործողությանն էլ, ըստ Իսրայել Սարգսյանի, միայն ինքն է մարզահագուստով եղել, մնացածը սև կուրտկաներով էին, վկային ասել են՝ «գնա, այդ սպորտիվկայով տղուն ճանաչի, ինքն էլ եկել է, ինձ է ճանաչել»:

Դատարանում հրապարակվեցին նաև տուժող Արթուր Սաֆարյանի մտերմուհու նախաքննական ցուցմունքները: Նա հայտնել էր, որ տուժող Արթուր Սաֆարյանի մտերմուհին է եղել, նա ջերմ հարաբերությունների մեջ է եղել իր ու իր մոր հետ: Աղջիկն իմացել է, որ Արթուր Սաֆարյանն ապրել է Իսպանիայում, Ռուսաստանում, Հայաստան նոր է եկել ու հիմնական ապրելու չի եկել, էլի գնալու է: Հնարավոր է, եղբոր հարցերով եկած լիներ: Ըստ վկայի, ինքն իմացել է, որ Արթուրը երկու երեխա, կին ունի, գիտեր, որ նրա եղբայրը քրեական աշխարհում հայտնի Թևոսիկն է, ով այդ ժամանակ Դատապարտյալների հիվանդանոցում էր, իմացել է, որ շուտով ազատվելու է:

Վկան պատմել է, որ Արթուր Սաֆարյանն իր ու իր մոր ներկայությամբ հեռախոսազանգ է ստացել, խոսել, ապա ասել է՝ «իմ թշնամին Ռուսաստանից եկել է»: Սակայն, թե ով է իր թշնամին, տուժողը չի նշել, ապա ասել է, որ աղջկա տնից պետք է գնա հանդիպման: Հեռախոսով խոսելիս Արթուրը նորմալ էր խոսում, նման չէր, որ թշնամու հետ է խոսում:

Հանդիպումից հետո Արթուրն ասել է, որ հարթվել է ամեն ինչ, իրենք հանդիպել են: Սպանության օրն էլ հեռախոսով խոսել են, տրամադրությունը շատ լավն էր, իրեն բոլորը սիրում էին:

Վկան հայտնել է, որ լրատվամիջոցներից լսել է, որ Իսոն ու Մոսոն (Իսրայել Սարգսյանն ու Մովսես Ներսիսյանը) կապ ունեն Արթուրի սպանության հետ:

Այս վկայի ցուցմունքի հրապարակումից հետո էլ Իսրայել Սարգսյանը հայտարարեց՝ բոլորն ասում են, որ Արթուրը Թևոսիկի եղբայրն է, բայց նա ինքն էլ քրեական աշխարհում հայտնի մարդ էր և կարող էր իր թշնամիներն ունենալ:

Մեղադրողը միջնորդեց դատարան հրավիրել ու հարցաքննել չորս փակ վկաներից (նրանց իսկական անուն ազգանունները չեն հրապարակվում, նրանք գործում հանդես են գալիս կեղծանուններով) մեկին՝ ոստիկանների աշխատանքը համակարգողին, ով հստակ կասի ոստիկանական աշխատանքի մասին:

Պաշտպան Սարդարյանը ասաց՝ «հրապարակեք չորսի ցուցմունքներն էլ, պետք չէ որ որևէ մեկը գա, այդքան սպասել ենք, նորից կհետաձգվի»: Իսրայել Սարգսյանն էլ իր հերթին հայտարարեց. «Հիմա էլ չորս ամիս սպասենք մինչև վկային գտնեք: Կողմ եմ որ չորսն էլ գան, բայց քանի որ շատ է ձգձգվում, ուզում եմ, որ հրապարակվեն»:

Դատարանը բավարարեց մեղադրողի միջնորդությունը:

Աղբյուր` Փաստինֆո