Փաստ ինֆո

Օրեր առաջ «Արմավիր» ԲԿ-ում նորածին է լույս աշխարհ եկել, սակայն երեխայի վիճակը վատացել է և փոքրիկին ծնվելուց երկու օր անց տեղափոխել են Երևան` Մուրացանի հիվանդանոց, որտեղ և հունվարի 28-ին մահացել է:

Նորածնի հարազատները երեխայի մահվան մեջ մեղադրում են Արմավիրի Բժշկական կենտրոնի մանկաբարձագինեկոլոգիական բաժանմունքի վարիչ Նշան Գևորգյանին, ով, ի դեպ, բավականին հայտնի է հասարակությանը իր «քաջագործություններով»:

Բժիշկ Նշան Գևորգյանը վերջին մի քանի տարիների ընթացքում հասցրել է մի քանի անգամ դատապարտվել, սակայն, ինչպես տեսնում ենք, նրան հաջողվել է պատժից խուսափել ու շարունակել իր «սխրագործությունները»:

Դեռևս 2010թ. հուլիսի 17-ին` «Արմավիր»-ի հիվանդանոց ընդունվելուց ընդամենը 4 ժամ անց, մահացել էր Արմավիրի մարզի Հացիկ գյուղի բնակիչ 1 տարեկան 4 ամսական Հովհաննես Հովհաննիսյանը: Փոքրիկը հիվանդանոց է ընդունվել «գանգուղեղային տրամվայից հետո զարգացած ճակատային և քունքային հեմատոմաներ» ախտորոշմամբ:

«Արմավիր ԲԿ»-ում երեխային վիրահատել են, բայց մի քանի ժամ անց նրա վիճակը կտրուկ վատացել է: Երեխայի կյանքը փրկելու համար հիվանդանոցի բուժանձնակազմը որոշում է կայացրել նրան տեղափոխել Երևանի «Սուրբ Աստվածամայր» բժշկական կենտրոն:

Մանկաբուժական ռեանիմացիոն բրիգադ հրավիրելու փոխարեն` Հովհաննեսին որոշում են մայրաքաղաքի հիվանդանոց տեղափոխել տաքսիով, երեխան ճանապարհին մահանում է:

Դատաբժշկական փորձաքննության արդյունքում պարզվել է, որ երեխան մահացել է «Արմավիր ԲԿ»-ում մասնագիտական պարտականությունները ոչ պատշաճ կատարելու հետևանքով:

Հաջորդ դեպքը տեղի է ունեցել 2010թ. դեկտեմբերի 5-ի գիշերը: Արմավիրի մարզի Այգևան գյուղի բնակիչ Վռամ Խլղաթյանի հարազատները զանգահարել են Արմավիր ԲԿ և «շտապ oգնություն» կանչել: Բայց բժիշկը կանչով հիվանդին չի այցելել` պատճառաբանելով, որ բենզին չկա: Այս հիվանդը ևս մահացել է:

Ի պաշտոնե պատասխանատու լինելով հիվանդանոցի նյութատեխնիկական ապահովվածության համար` Նշան Գևորգյանն անտեսել է աշխատակիցների պահանջները` մանկական վերակենդանացման համար անհրաժեշտ բժշկական պարագաներով և, մասնավորապես, մանկական լարինգոսկոպով «Արմավիրի ԲԿ» մանկական բաժանմունքը ապահովելը: Եվ երբ 01.01.2011թ հիվանդանոց ընդունված մանկահասակ հիվանդ Արտաշես Սեդրակյանի առողջական վիճակը կտրուկ վատացել է, բուժօգնություն ցուցաբերելու լիարժեք հնարավորություն չի եղել: Արդյունքում` երեխան մահացել է:

Չնայած որ նախաքննական մարմինը այս երեխայի մահվան համար նույնպես պատասխանատու էր համարել Նշան Գևորգյանին, երբ գործը հասավ դատարան, քրեական գործով մեղադրող Անդրանիկ Սահակյանը հանկարծ դատարանում հրաժարվել է Արտաշես Սեդրակյանի մահվան դրվագով բժշկին առաջադրված մեղադրանքից՝ հանցակազմի բացակայության պատճառաբանությամբ:

Ինչ վերաբերում է մյուս 2 զոհերին, ապա Արմավիրի մարզի առաջին ատյանի դատարանի՝ 2013թ. դեկտեմբերի 23-ի դատավճռով Նշան Գևորգյանը մեղավոր է ճանաչվել` պաշտոնեական անփութության համար, որն անզգուշությամբ առաջացրել է մարդու մահ` դատապարտելով նրան 5 տարվա ազատազրկման՝ առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու:

Եվ քանի որ Գևորգյանը համաներման կիրառմամբ ազատվել էր պատժի կրումից և դատարանն էլ նրան չէր զրկել որոշակի ժամկետով մասնագիտական գործունեությամբ զբաղվելու իրավունքի, ուստիև՝ Նշան Գևորգյանը շարունակել է մարդկանց կյանքերի ու ճակատագրերի խեղումը:

Պատժից ազատվելուց ընդամենը 2 ամիս հետո Գևորգյանը կրկին հայտնվում է իրավապահների տեսադաշտում՝ այս անգամ «կաշառք» չտալու պատճառով հղի կնոջը չվիրահատելու համար:

Մասնավորապես, Ըստ մեղադրանքի՝ Նշան Գևորգյանը 2014թ. փետրվարի 25-ին մանկաբարձական անվճար բժշկական սպասարկման ծրագրով իրականացվող կեսարյան հատում վիրահատություն կատարելու համար հղի, Արմավիրի մարզի Նալբանդյան գյուղի բնակչուհի Ալինա Գևորգյանի սկեսուրից՝ Բավական Սիմոնյանից կաշառք է պահանջել, սակայն մերժում ստանալով՝ հրաժարվել է Ա.Գևորգյանին բուժօգնություն ցուցաբերել:

2015 օգոստոսի 17-ի դատավճռով Գևորգյանը մեղավոր է ճանաչվել ՀՀ քրեական օրենսգրքի 200 հոդվածի 3-րդ մասով և դատապարտել է 1 տարի 6 ամիս ժամկետով ազատազրկման, սակայն ը նրա նկատմամբ նշանակված պատիժը պայմանականորեն չի կիրառվել՝ սահմանվել է 2 տարի ժամկետով փորձաշրջան:

Այդ ամենից հետո Գևորգյանը վերաքննիչ բողոք է ներկայացրել պահանջով բեկանել իր վերաբերյալ դատավճիռը և կայացնել արդարացման դատական ակտ, սակայն վերաքննիչ բողոքը մերժվել է:

Վճռաբեկ բողոքի վարույթ ընդունվելը ևս մերժվել է:

Այս ամենից հետո, երբ դեռ դատարանի կողմից նրա նկատմամբ սահմանված փորձաշրջանի ժամկետները չի ավարտվել, Նշան Գևորգյանի անունը կապվում հերթական դժբախ դեպքի հետ:

Մինչև ե՞րբ է Առողջապահության նախարարությունն աչք փակելու գևորգյանական մոտեցում ցուցաբերող բժիշկների գործողությունների կամ անգործությունների վրա, դեռ քանի՞ ճակատագիր է խեղվելու, որպեսզի հասկանանք, որ ոչ թե պետք է բժշկի գործողություններում արդարացման հիմքեր գտնել կամ դատապարտել, հետո համաներմամբ ազատել պատժի կրումից կամ փորձաշրջան սահմանել, այլ պետք է ուղղակի զրկել բժշկական գործունեությամբ զբաղվելու իրավունքից՝ կանխելով նրա ձեռամբ հաջորդ մահվան դեպքը:

Լուսանկարը՝ Hetq.am-ի

Աղբյուր` Փաստինֆո