Փաստ ինֆո

Ռուսաստանյան նախագահի մամուլի քարտուղար Դմիտրի Պեսկովը մեկնաբանել է լուրերն այն մասին, թե իբր ռուսաստանյան հատուկ ծառայությունները ԱՄՆ ընտրված նախագահ Դոնալդ Թրամփի մասին վարկաբեկող նյութեր ունեն: Նա անվանել է այդ տեղեկատվությունը «բացարձակապես սուտ», կեղծիք ու անհեթեթություն:

Ըստ Պեսկովի, «Կրեմլը չունի Թրամփին վարկաբեկող նյութեր, տեղեկատվությունը չի համապատասխանում իրականությանը և ոչ այլ ինչ է, եթե ոչ բացարձակ հորինվածք»:

Պատասխանելով BBC-ի հարցին՝ Պուտինի մամուլի քարտուղարն ընդգծել է, որ Կրեմլը չունի նաև նախագահական ընտրություններում Թրամփի մրցակցուհի Հիլլարի Քլինթոնին վարկաբեկող նյութեր:

Հրապարակված տեղեկատվությունը Պեսկովը բնութագրել է որպես Ռուսաստանի ու ԱՄՆ-ի հարաբերություններին վնասելու փորձ: «Կրեմլը չի զբաղվում վարկաբեկող նյութեր հավաքելով: Կրեմլը, նախագահը զբաղվում է մեր արտասահմանյան գործընկերների հետ հարաբերություններ կառուցելով»,- հավելել է նա:

Ավելի վաղ BuzzFeed պարբերականը հրապարակել է մի փաստաթուղթ, որն իբրև ամերիկյան հետախուզության կողմից անցյալ շաբաթ փոխանցվել է Թրամփին: Դրանում ասվում է, որ ռուսաստանյան հատուկ ծառայությունները ԱՄՆ ընտրված նախագահին վարկաբեկող նյութեր ունեն:

Դոնալդ Թրամփին հետախուզության կողմից նման տվյալների փոխանցման մասին հաղորդել են նաև այլ ամերիկյան ԶԼՄ-ներ: Նրանք պնդում են, որ փաստաթղթի պատճենը փոխանցվել է նաև գործող նախագահ Բարաք Օբամային, ով իր պաշտոնը հունվարի 20-ին պետք է զիջի Թրամփին:

Սպիտակ տունը պաշտոնապես ոչ հերքել է, ոչ էլ հաստատել այդպիսի փաստաթուղթ ստանալը:

Մինչդեռ Թրամփի ներկայացուցիչները հերքում են, որ նա ստացել է նման զեկույց: Նա ինքը դրանից հետո իր թվիթերյան էջում գրել է, որ «դրանք կեղծ նորություններ են, իսկական վհուկների որս»՝ ուղղակիորեն չհիշատակելով ԶԼՄ-ներում հրապարակված փաստաթղթի մասին:

Փաստաթղթի իսկության մասին իր կասկածներն է հայտնել նաև WikiLeaks պորտալը, ում, սակայն, վերջին ժամանակներս կշտամբում են Թրամփին համակրելու համար: Պորտալի մասնագետները գտնում են, որ փաստաթղթում ամսաթվերի սխալներն ու շարադրանքի ոճը նման չէ հետախուզության իսկական զեկույցներին:

Անցյալ շաբաթ Թրամփին ներկայացվել էր ամերիկյան հետախուզության հաշվետվությունը, որը բովանդակում էր հաստատումներ առ այն, որ ռուսաստանյան նախագահ Վլադիմիր Պուտինը հրահանգել է արշավ կազմակերպել ԱՄՆ նախագահական ընտրությունների արդյունքների վրա ազդելու նպատակով:

Այդ արշավի նպատակներն էին նախագահական ընտրությունների հանդեպ բնակչության վստահության քայքայելը և Դեմոկրատական կուսակցությունից թեկնածու Հիլլարի Քլինթոնին վարկաբեկելը, ասվում էր հաշվետվության մեջ: Ռուսաստանը նման արշավի անցկացումը հերքում է:

Թրամփն, ով երկար ժամանակ բացեիբաց կասկածում էր ԱՄՆ նախագահական ընտրություններում ռուսաստանյան հաքերների մասնակցությանը, զեկույցի հրապարակումից և հետախուզության ներկայացուցիչների հետ հանդիպումից հետո, ըստ BBC-ի, փոքր-ինչ փոխել է իր տոնը, թեև ուղղակիորեն չի համաձայնել հատուկ ծառայությունների հետևությունների հետ:

Ընտրված նախագահը, ով նախընտրական արշավի ժամանակ շատերի կողմից համարվում էր պրոռուսաստանյան թեկնածու, հայտարարել է, որ շատ երկրներ, այդ թվում՝ Ռուսաստանն ու Չինաստանը, փորձում են կոտրել ամերիկյան կազմակերպությունների սերվերները, սակայն նման գործողությունները ընտրությունների ելքի վրա չեն ազդել:

Աղբյուր` Փաստինֆո