Փաստ ինֆո

ԱՄՆ նախագահ Բարաք Օբաման ստորագրել է պաշտպանական քաղաքականության մասին օրենքը, որը ենթադրում է 2017թ. զինվորականների կարիքներին հատկացնել ավելի քան 600 մլրդ դոլար:

Օրինագիծը մնացյալից զատ ենթադրում է նաև արտասահմանյան քարոզչության ու ապատեղեկատվության դեմ պայքարի կենտրոնի ստեղծում, որը Պետդեպարտամենտի կառուցվածքի մաս կկազմի:

Կենտրոնը պետք է «գլխավորի,սինխրոնացնի և համակարգի ԱՄՆ ազգային անվտանգության շահերի դեմ ուղղված արտասահմանյան պետական ու ոչ պետական քարոզչության և ապատեղեկատվության ճանաչման, ընկալման, բացահայտման և հակազդեցության դաշնային կառավարության ջանքերը»:

Ըստ BBC-ի ռուսական ծառայության, 2017թ. պետությունը կենտրոնին կհատկացնի $80 մլն, նույնքան միջոցներ պետք է ուղղվեն նաև 2018թ., նշվում է փաստաթղթում:

Պաշտպանական քաղաքականության մասին օրինագիծը բոլոր երկրներում գործողության մեջ է դրել նաև «Մագնիտսկու օրենքը»:

«Սերգեյ Մագնիտսկու անվան օրենքի գերիշխանության ու հաշվետու լինելու մասին ակտը» նախատեսում է միակողմանի կարգով պատժամիջոցների կիրառում անձանց նկատմամբ, ովքեր մեղավոր են, ԱՄՆ կարծիքով, մարդու իրավունքների խախտման, ինչպես նաև կոռուպցիայի մեջ:

Այդ ցուցակում ընդգրկված օտարերկրացիների համար ԱՄՆ մուտքը փակ կլինի, իսկ նրանց մոտ առկա մուտքի արտոնագրերը կոչնչացվեն: Նաև կարգելափակվեն ԱՄՆ-ում նրանց սեփականությունն ու ակտիվները: Սկզբնապես օրենքը կիրառվում էր միայն ռուսաստանյան պաշտոնատար անձանց նկատմամբ:

Պաշտպանական քաղաքականության մասին օրինագծին հավանության տալը չի խանգարել Օբամային կտրուկ քննադատության ենթարկել փաստաթղթի մի քանի, այդ թվում՝ Կուբայում Գուանտանամո ամերիկյան բանտի վերաբերյալ մասերը:

Նախագահի կարծիքով, հարյուրավոր մլն դոլարներ ծախսել մեկուսացման մեջ գտնվող 60-ից պակաս մարդկանց պահելու համար քայքայում են ԱՄՆ դիրքերը աշխարհում և միայն խրախուսում են ծայրահեղականներին: Նա խոստացել է շարունակել հանուն բանտը փակելու պայքարը՝ չնայած Կոնգրեսի հակազդեցությանը:

Աղբյուր` Փաստինֆո