Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի գործով նախաքննությունը տևել է 11 օր: Այս մասին այսօր գործով դատական նիստից հետո լրագրողների հետ զրույցում ասաց Իշխան Բարսեղյանի պաշտպան Վարդուհի Էլբակյանը:

Ըստ պաշտպանի՝ իր 17 տարվա աշխատանքային պրակտիկայում առաջին անգամ է հանդիպել նման երևույթի, որ գործը քննվի 11 օրում, այն էլ՝ առանձնապես ծանր հանցագործության մեջ մեղադրելու պարագայում:

Թե նախաքննության փուլում ի՞նչ թերություններ են եղել, պաշտպանն այդ մասին կանդրադառնա դատաքննության ընթացքում, սակայն հավելեց, որ Իշխան Բարսեղյանը մեղադրանքի վերաբերյալ դիրքորոշում չի հայտնել:

Պաշտպանական կողմը չի պատրաստվում դատավորի նկատմամաբ խափանման միջոց կալանավորման որոշումը բողոքարկել՝ «ժամանակի անիմաստ վատնում է»,- ասաց Վարդուհի Էլբակյանը:

Պաշտպանը հոգեբանական ճնշում որակեց այն, որ գործը քննվում է նույն դատարանում, որտեղ Իշխան Բարսեղյանը դատավոր է եղել, ըստ նրա՝ ճիշտ և բարոյական կլիներ, որ այլ դատարանում նիստերն անցկացվեին և ոչ թե՝ նույն դատարանում: Ճիշտ կլիներ նաև, որ գործը քննվեր մեկ այլ դատարանի դատավորի կողմից. «Այս հարցը Վճռաբեկ դատարանի նախագահի լիազորությունների շրջանակում է»,- ասաց Վարդուհի Էլբակյանը:

Ինչպես ավելի վաղ տեղեկացրել էինք, դատավոր Իշխան Բարսեղյանի պաշտպանությունը ստանձնել են 3 փաստաբաններ, նրանց թվում է թոշակի անցած Էրեբունի և Նուբարաշեն վարչական շրջանների ընդհանուր իրավասության դատարանի նախկին դատավոր Վլադիմիր Գրիգորյանը, Վարդուհի Էլբակյանը և Լիաննա Գրիգորյանը:

Իսկ փաստաբան Էլզա Զաքարյանի պաշտպանությունն իրականացնում է փաստաբան Գևորգ Շիրինյանը:

Հիշեցնենք, որ ԱԱԾ-ի կողմից օպերատիվ-հետախուզական միջոցառման արդյունքում պարզվել է՝ հոկտեմբերի 27-ին` ժամը 19.35-ին, Երևան քաղաքի Արշակունյաց պողոտայի և Գարեգին Նժդեհի փողոցի խաչմերուկի գետնանցումում դատավոր Իշխան Բարսեղյանը հանդիպել է քաղաքացուն և վերջինիցս անձամբ ստացել 1000 ԱՄՆ դոլարը:

Իսկ հոկտեմբերի 28-ին` ժամը 01.45-ին, դատավոր Իշխան Բարսեղյանը ձերբակալվել է՝ խոշոր չափերով կաշառք ստանալու կասկածանքով:

Այսպիսով, Հատուկ քննչական ծառայությունը հարուցել է քրեական գործ, որի շրջանակներում դատավոր Իշխան Բարսեղյանին մեղադրանք է առաջադրվելով ՀՀ քրեական օրենսգրքի 311-րդ հոդվածի 4-րդ մասի 3-րդ կետով:

Ելնելով դատավորի կարգավիճակից, որ նա կարող է որոշակի ազդեցություն ունենալ մինչդատական վարույթում գործի օբյեկտիվ քննության վրա, նախաքննական մարմնի կողմից դատավորի նկատմամբ խափանման միջոց կալանավորումն ընտրելու վերաբերյալ միջնորդությունը բավարարվել է:

Քրեական գործով մեղադրանք է առաջադրվել նաև փաստաբան Էլզա Զաքարյանին՝ ՀՀ քրեական օրենսգրքի 313-րդ հոդվածի 1-ին մասով, և նրա նկատմամբ որպես խափանման միջոց  է կիրառվել՝ չհեռանալու մասին ստորագրությունը:

Աղբյուր` Փաստինֆո