Փաստ ինֆո

ՀՀ տարածքային կառավարման և զարգացման նախարար Դավիթ Լոքյանն այսօր մասնակցել է «Համակողմանի տարածքային զարգացման ծրագրերը և ռազմավարական պլանավորումը հանուն Հայաստանի մարզերի զարգացման» տարածքային զարգացման համաժողովին, որին ներկա էին և ելույթով հանդես եկան Միջազգային տնտեսական ինտեգրման և բարեփոխումների նախարար, ՀՀ փոխվարչապետ Վաչե Գաբրիելյանը, ԵՄ դեսպան Պյոտր Սվիտալսկին, տարածքային կառավարման և տեղական ինքնակառավարման մարմինների բարձրաստիճան ներկայացուցիչներ:

Համաժողովի ընթացքում քննարկվել են տարածքային զարգացման ընթացիկ և նախատեսվող բարեփոխումները` ներառյալ ազգային և տարածքային մակարդակներում առկա ռազմավարական պլանավորման գործընթացները: Համաժողովը նշանավորվել է Տարածքային ծրագրերի դրամաշնորհների ստորագրմամբ` ԵՄ-ի և ՀՀ կառավարության համաֆինանսավորմամբ և որի շրջանակներում նախատեսվում է իրականացնել 7 ծրագրեր ՀՀ մարզերում: Ծրագրերի իրականացումը կմեկնարկի հաջորդ տարվա սկզբին:

Պիլոտային տարածքային զարգացման ծրագիր դրամաշնորհի (ՊՏԶԾԴ) ընդհանուր նպատակն է աջակցել Հայաստանի Կառավարությանը Հայաստանի մարզերի միջև ավելի համաչափ սոցիալական և տնտեսական զարգացում ապահովելու համար:

ՊՏԶԾԴ հատուկ նպատակներն են՝ ստեղծել տնտեսական հնարավորություններ և դիվերսիֆիկացնել տնտեսությունը Հայաստանի տաս մարզերում (աջակցություն գործարար ոլորտին, արդյունավետ ներդրումներ, համագործակցություն ընկերությունների շրջանում, հատկապես ՓՄՁ-ներ և առնչվող ենթակառուցվածքներ), ստեղծել զբաղվածության հնարավորություններ (տրամադրել համապատասխան հմտություններ և խթանել կայուն զբաղվածություն մասնավորապես աճի ոլորտներում, զարգացող և նորարարական ոլորտներում, հատկապես երիտասարդ չափահասների միջև) մարզերում:

Մինչ օրս ՊՏԶԾԴ-ն Հայաստանի ամենամեծ տարածքային զարգացման ծրագիրն է, թե առկա միջոցների, և, թե ծրագրի աշխարհագրական ներառման առումով: Ծրագրի ընդհանուր հասանելի բյուջեն գրեթե 10 մլն եվրո է, որից 7 մլն եվրոն տրամադրվում է Եվրոպական Միության կողմից, 1.75 մլն եվրոն Հայաստանի կառավարության կողմից, և առնվազն 10% համաֆինանսավորում դիմորդների կողմից:

Յոթ ծրագրերի հաջող իրականացման դեպքում ակնկալվում են հետևյալ արդյունքները.

• Գրեթե 2,200 անձիք (մեծամասամբ երիտասարդներ) կստանան աջակցություն զբաղվածության աճի բարձրացման համար՝ խորհրդատվությունների, դասընթացների միջոցով:
• Ավելի քան 700 ձեռնարկություններ աջակցություն կստանան մրցունակության բարձրացման համար:
• Գրեթե 500 նոր աշխատատեղեր կստեղծվեն մարզերում ծրագրիկողմից, որից հարյուրը որակյալ աշխատատեղեր են:
• Ավելի քան 320 ձեռնարկություն կբարձրացնի իր մրցունակությունը (շրջանառության և/կամ զբաղվածության առումով):

Դրամաշնորհային ծրագրի ոչ միայն կաջակցի մարզերի զարգացմանը, կբարձրացնի նրանց տնտեսական մրցունակությունը, կնվազեցնի արտագաղթի միտումները, այլ նաև կօգնի Հայաստանի մարզերի ծրագրի և միջոցների կառավարման կարողությունների զարգացմանը:

ՀՀ տարածքային կառավարման և զարգացման նախարար Դավիթ Լոքյանն իր ելույթում մասնավորապես ասել է. «Մեր տարածքային զարգացման ընդհանուր հեռանկարի համար այսօր շատ կարևոր օր է, քանի որ մենք ստորագրում ենք մի փաստաթուղթ, որով սկսվում է գործունեություն Հայաստանի տարբեր մարզերում, որի արդյունքները մենք բոլորս միասին պետք է տեսնենք առաջիկայում: Ձեզ բոլորիդ հայտնի է, որ Եվրամիությունը Արևելյան գործընկերության ընդհանուր կոնտեքստում լուրջ օժանդակություն է ցուցաբերում Հայաստանի Հանրապետությանը, և առավել կարևորվում է գործընկերությունը Տարածքային կառավարման և զարգացման նախարարության հետ, քանի որ մեզ համար պարզ է այն փորձը, որ Եվրամիությունը տարիների ընթացքում ունեցել է տարածքային անհամաչափությունները հաղթահարելու և երկրում կայուն ապրելակերպ ստեղծելու առումով: Օժանդակությունը, որ մենք այսօր Եվրամիությունից ստանում ենք և ապագայում ակնկալում ենք, հիմնականում ուղղված է լինելու բարեփոխումներին, և այդ բարեփոխումների արդյունքները մեր երկրում պետք է լինեն չափելի, գրանցելի, և մենք ձեզ հետ միասին տեսնենք: Այսօրվա ծրագրերը, որ մենք ստորագրելու ենք, ներառում են շուրջ 10 մլն եվրոյի չափով գումար: Այս ծրագրերի ընտրությունը իրականացրել է մեր գործընկերը: Շատ հաջողված ծրագրեր ենք ունեցել, որոնք կարող ենք դառնալ լավագույն օրինակ ապագայում այս կարգի տարաբնույթ ծրագրեր իրականացնելու, որոնք բխելու են մեր ռազմավարությունից:

Դուք բոլորդ տեղյակ եք, որ ՀՀ կառավարությունն արդեն ընդունել է ՀՀ 2016-2025թթ. տարածքային զարգացման ռազմավարությունը` Եվրամիության օժանդակությամբ: Համապատասխան թիմ, որը մշտապես աշխատում է մեր նախարարության մասնագետների հետ և ապագայում նույն կարգի ծրագրեր, որոնք կարող են դառնալ դիտարկտիկ, կարող են դառնալ ուսուցողական, մենք իրականացնելու ենք ՀՀ-ում: Ես կարող եմ թվային տվյալներ փոխանցել ձեզ: Այս ծրագրերի իրականացման արդյունքում մենք ունենալու ենք 2000 զբաղված մարդիկ, կայուն աշխատատեղ, որոնք հիմնականում միջինից բարձր վճարում են ունենալու և հիմնականում որոշակի պրոդուկտ են տալու:

Սիրելի բարեկամներ, ես այն հաստատ համոզմունքն եմ հայտնում, որ մեր երկրում սկսված է մի գործընթաց, որն անվերադարձ է. 2017 թ. Մենք առաջնորդվելու ենք խոշորացման ընդհանուր ծրագրով` ունենալով ևս 34 փնջեր: Եվ ինձ համար շատ ուրախացնող է այն հանգամանքը, որ սկսել ենք առաջարկներ ստանալ համայնքներից: Մենք 2018 թ-ից հետո Հայաստանում կունենանք շուրջ 100 խոշորացված համայնքներ, որոնց և կառավարումը, և ծրագրերի իրականացումը և տնտեսական զարգացման ընդհանուր մեխանիզմների ներդրումը, գործիքների կիառումը, ներդրումային տարաբնույթ, վարկային ռեսուրսների ներգրավման խնդիրները կդառնան շատ հեշտ և իրականանալի: Խոշորացման արդյունքում ունենալու ենք մարդկային լուրջ կապիտալ, որը կարողանալու է տարածքների զարգացման ընդհանուր պրոբլեմները հաղթահարել:

Թույլ տվեք մեր բոլորի անունից շնորհակալություն հայտնել մեր բարեկամներին Եվրամիությունից, հատկապես պարոն դեսպանին և իր թիմին, որն այսօր շարունակում է ամբողջ Հայաստանում աշխատել մեզ հետ, որպեսզի մենք ունենանք մարզային լավագույն ռազմավարություններ, որպեսզի մենք մինչև մայիս ունենանք գործառնական ծրագրեր տարածքների համար, որոնց իրականացման համար մենք հետագայում կընտրենք համապատասխան միջոցներ:

Աղբյուր` Փաստինֆո