Փաստ ինֆո

Նոյեմբերի 27-ին տեղի ունեցավ «Պրոբացիայի պետական ծառայությունը. ակնկալիքներ և զարգացման հեռանկարներ» թեմայով կլոր սեղան-քննարկումը: Այն կազմակերպել էր «Քաղաքացիական հասարակության ինստիտուտ» ՀԿ-ն՝ ՀՀ արդարադատության նախարարության պրոբացիայի պետական ծառայության հետ համատեղ: Միջոցառմանը ներկա են գտնվել ՀՀ արդարադատության նախարարի տեղակալ Սուրեն Քրմոյանը, պրոբացիայի պետական ծառայության պետ Լևոն Ավետիսյանը և «Քաղաքացիական հասարակություն ինստիտուտ» ՀԿ-ի նախագահ Արտակ Կիրակոսյանը: Արդարադատության նախարարի տեղակալ Սուրեն Քրմոյանն իր խոսքում կարևորեց այն սկզբունքը, որ պատժի նպատակներին կարելի է հասնել նաև ազատազրկման վայրից դուրս:

«Իհարկե, ոչ բոլոր դեպքերում է այս սկզբունքը կիրառելի, սակայն որոշ դեպքերում քրեական օրենսգրքով դատապարտված անձը կարող է պատիժը կրել ոչ թե ազատազրկման բաժնում, այլ ազատության մեջ՝ համայնքում»,- ասաց Քրմոյանը:

ՀՀ արդարադատության նախարարի տեղակալը նշեց, որ վերջին ամիսներին կատարված աշխատանքն այսծառայու թյունում արդեն տվել է իր դրական արդյունքները:

«Ի տարբերություն նախկին այլընտրանքային պատիժների կատարման համակարգի, ներկայումս պրոբացիոն ծառայությունն ավելի շատ ուշադրություն է դարձնում դատապարտյալների վերասոցիալականացմանը և վերաինտեգրացմանը: Միայն այն, որ պրոբացիոն ծառայողները զինվորական չեն և դատապարտյալները ավելի սերտ են շփվում և համագործակցում պատկան բոլոր մարﬕնների հետ, վկայում է այն, որ մենք այլ մեթոդիկա ենք կիրառում այստեղ: Մեր վերջնական նպատակն է, որպեսզի այս ծառայության ներդրմամբ էապես նվազի կրկնահանցագործությունը»,- ընդգծեց Քրմոյանը:

Նա նշեց նաև, որ նախատեսված խափանման նոր միջոցների իրականացումը ապահովելու է հենց պրոբացիայի ծառայությունը:

«Անձի ոտքին ամրացվելու է էլեկտրոնային սարք, որը հսկելու է այդ անձի գտնվելու վայրը: Պրոբացիայի ծառայությունով լուծվելու են դատապարտված անձի զբաղվածության, սոցիալական, իրավական, կրթության և այլ հարցերը: Բացի այդ, պրոբացիայի ծառայության ներդրմամբ ակնկալվում է պետության ծախսերի էական նվազում: Եթե անձը պատիժը կրում է քրեակատարողական հիմնարկում օրական ծախսը կազմում է 5-6 հազար դրամ, իսկ պրոբացիայի դեպքում ծախսվելու է օրական մոտ հազար դրամ»,- ասաց Քրմոյանը:

Պրոբացիայի պետական ծառայության պետ Լևոն Ավետիսյանը իր հերթին նշեց, որ ներկայումս պրոբացիոն ծառայության մեջ են գտնվում 2798 շահառու, ովքեր նախկինում հաշվառված են եղել այլընտրանքային պատիժների կատարման բաժնից:

«Հիմնականում ոչ մեծ և միջին ծանրության հանցագործություն կատարած անձինք են այդ շահառուները: Կան նաև ծանր հանցագործություն կատարած անձինք, որոնք պայմանական վաղաժամկետ ազատ են արձակվել»,- ասաց Ավետիսյանը:

2016 թվականի մայիսի 18-ին Ազգային ժողովն ընդունեց «Պրոբացիայի մասին» օրենքը, իսկ սեպտեմբերի 1-ից ուժի մեջ մտավ Արդարադատության նախարարության կազմում Պրոբացիայի պետական ծառայության ստեղծման մասին ՀՀ կառավարության որոշումը, որով տրվեց ծառայության աշխատանքների մեկնարկը:

Աղբյուր` Փաստինֆո