Փաստ ինֆո

ՀՔԱ Վանաձորի գրասենյակի հաղորդմամբ՝ 2016 թ. նոյեմբերի 3-ին ՀՀ Վարչական դատարանում նշանակված էր Անուշ Պողոսյանի դեմ ՀՀ ԱՆ ԴԱՀԿ ապահովող ծառայության հայցի քննությունը, որով պահանջվել էր Ա. Պողոսյանին պատասխանատվության ենթարկել՝ ՀՀ Վարչական իրավախատումների վերաբերյալ օրենսգրքի 206.5 հոդվածի իմաստով (Հարկադիր կատարողի պարտականությունների կատարմանը դիտավորյալ խոչընդոտելը):

Ըստ Գրասենյակի՝ 2016 թ. սեպտեմբերի 26-ին կայացած նախորդ դատական նիստի ընթացքում պատասխանողի ներկայացուցիչ, ՀՔԱ Վանաձորի գրասենյակի իրավաբան Տ. Սիրադեղյանը, հաշվի առնելով, որ 2016 թ. մարտի 31-ին և 2016 թ. ապրիլի 20-ին կազմված «արձանագրություն վարչական իրավախախտումների վերաբերյալ» գրառումը կրող փաստաթղթերը չեն համապատասխանում վարչական իրավախախտման արձանագրությանը ներկայացվող պահանջներին, իսկ անձին դատական կարգով վարչական պատասխանատվության ենթարկելու վերաբերյալ հայցադիմումները ենթակա են դատարանի քննությանը միայն հարուցված վարչական վարույթի ընթացքում վարչական իրավախախտման մասին արձանագրություն կազմված լինելու և այդ արձանագրությունը հայցադիմումին կից դատարան ներկայացված լինելու դեպքում, միջնորդեց կարճել գործի վարույթը, ինչի հիմքով էլ դատական նիստը հետաձգվեց:

Երեկ արդեն նշանակված հեթական դատական նիստի ժամանակ պարզ դարձավ, որ դեռևս 2016 թ. հոկտեմբերի 21-ին դատարան է մուտքագրվել ՀՀ ԱՆ ԴԱՀԿ ապահովող ծառայության ներկայացուցչի՝ հայցից հրաժարվելու մասին գրությունը, և այդ հիմքով գործի վարույթը կարճվեց:

Հայցի ապահովում կիրառելու դատարանի որոշման հիման վրա արգելանք է դրվել Ա. Պողոսյանի բնակարանում գտնվող գույքի նկատմամբ, հետագայում պահանջատեր Արմեն Մկրտչյանը դիմում է ներկայացրել ՀՀ ԱՆ ԴԱՀԿ ապահովող ծառայության Ավան և Նոր-Նորք բաժին, որում հայտնել է, որ արգելադրված գույքն օգտագործվում է:

Դրա հիման վրա ավարտված կատարողական վարույթը վերսկսվել է, և ՀՀ ԱՆ ԴԱՀԿ ապահովող ծառայության Ավան և Նոր-Նորք բաժնի հարկադիր կատարող Կ. Պարոնյանը պարբերաբար այցելել է Ա. Պողոսյանի բնակարան՝ արգելադրված գույքի ստուգում կատարելու նպատակով, սակայն Ա. Պողոսյանը, ոչ իրավաչափ գնահատելով ՀՀ ԱՆ ԴԱՀԿ ապահովող ծառայության Ավան և Նոր-Նորք բաժնի հարկադիր կատարող Կ. Պարոնյանի գործողությունները, չի բացել իր բնակարանի դուռը:

ՀՀ ԱՆ ԴԱՀԿ ապահովող ծառայությունը հայցադիմում է ներկայացրել Ա. Պողոսյանին հարկադիր կատարողի պարտականությունների կատարմանը դիտավորյալ խոչընդոտելու համար վարչական պատասխանատվության ենթարկելու պահանջով այն հիմքով, որ վերսկսված կատարողական վարույթի շրջանակներում որպես պարտապան հանդես եկող Ա. Պողոսյանը չէր կատարել որոշակի գործողություններ պարտադրելու, այն է՝ իր բնակարանում իրականացվելիք կատարողական գործողություններին ներկա գտնվելու և բնակարանի դուռը բացելու մասին ՀՀ ԱՆ ԴԱՀԿ պահավող ծառայության Ավան և Նոր-Նորք բաժնի հարկադիր կատարող Կ. Պարոնյանի որոշումը:

Աղբյուր` Փաստինֆո