Փաստ ինֆո

1991թ. նախագահ Լևոն Տեր-Պետրոսյանը հայտարարեց մահապատիժը սառեցնելու մասին, 2003թ. նախագահ Ռոբերտ Քոչարյանը այն փոխարինեց ցմահ ազատազրկմամբ, իսկ հիմա նորից «հետ ենք գնում դեպի մահապատիժ»: Այս մասին պայմանական վաղաժամկետ ազատ արձակելու կամ պատժի չկրած մասը ավելի մեղմ պատժատեսակով փոխարինելու մասին իր դիմումը մերժելու ՔԿՀ որոշման դեմ դիմում-բողոքի քննության այսօրվա նիստում հայտարարեց ցմահ դատապարտյալ Ալիկ Գրիգորյանը՝ ընդգծելով, որ վաղաժամկետ ազատ արձակել չկա, օրենքները չեն գործում:

Ըստ ցմահ դատապարտյալի, առաջին հինգ տարիներին ասում են՝ խելոք մնացեք, լավ կլինի, իսկ քսան տարի պատիժը կրելուց հետո ասում են՝ հրաժարվեցիր թենիս խաղալ, չես ուղղվել, գնա ու մահացիր, այսինքն՝ մահապատիժը վերականգնվում է: Ալիկ Գրիգորյանը նշեց, որ ցմահ դատապարտյալ Արսեն Արծրունին պատիժը կրելու ընթացքում երեք ինստիտուտ ավարտեց. «Վերջում ի՞նչ՝ ոչ մի բան»:

Ըստ Ա.Գրիգորյանի, ՔԿՀ աշխատակիցը պետք է իրեն ասի, որ մասնակցի մարզական և այլ միջոցառումներին: Եթե ի՛նքը խցի դուռը թակի, ոչ մի հսկիչ իրեն չի պատասխանի, նա պարզապես կգրանցի, որ դուռը ջարդում են և դա կորակվի որպես կարգի խախտում: ՔԿՀ ներկայացուցիչ Արմեն Պետրոսյանը հայտարարեց, որ ՔԿՀ աշխատակցին կանչելու համար հատուկ կոճակ կա. «Սեղմեք, և նա կգա», ինչին ի պատասխան ցմահ դատապարտյալը հայտարարեց՝ «այդ կոճակը ձեր մոտ չի աշխատում»:

ՔԿՀ ներկայացուցիչը նորից հակադարձելով՝ տեղեկացրեց՝ հոկտեմբերի 14-ը մարզասրահի ձեր օրն է:

Ալիկ Գրիգորյանը դատարանին տեղեկացրեց, որ այն բանից հետո, ինչ ինքը սեպտեմբերի 16-ի դատական նիստում հայտարարել է, որ իրենց հետ սոցիալ-հոգեբանական աշխատանքներ չեն տարվում, սեպտեմբերի 19-ին այդ աշխատանքները սկիզբ են առել:

Դատապարտյալը շնորհակալություն հայտնեց բողոքը քննող՝ Էրեբունի-Նուբարաշեն վարչական շրջանների դատավոր Արտուշ Գաբրիելյանին, որ դատական նիստն անց է կացնում ոչ թե քրեակատարողական հիմնարկում, այլ դատարանում՝ մարդիկ չեն հասկանա, թե քսան տարուց ավելի ազատազրկման մեջ գտնվող մարդու համար ինչ է աշխարհին առանց վանդակի նայելը, «դուրս գալը, ավտո նստելը, մարդկանց հետ շփվելը»: «Սա մի ուրիշ աշխարհ է»,- ասաց ցմահ դատապարտյալը:

Աղբյուր` Փաստինֆո