Փաստ ինֆո

Ընդդիմությունը՝ 18 մանդատով, պաշտոնապես հայտարարել Վանաձորում «Լուսավոր Հայաստանի» քաղաքապետի թեկնածուի օգտին քվեարկելու մասին, ինչպես է ՀՀԿ-ն պատրաստվում 15 մանդատով քաղաքապետ ընտրել: Նման կարծիք է հայտնել ԱԺ պատգամավոր, «Լուսավոր Հայաստան» կուսակցությունը ներկայացնող էդմոն Մարուքյանը:

Ֆեյսբուքյան գրառման մեջ մասնավորապես ասվում է. «Այսօր հաստատվեց Վանաձորի ավագանու ցանկը, ինչի առիթով շնորհավորում եմ ավագանու բոլոր անդամներին:

Ինչպես գիտեք, հոկտեմբերի 8-ին, Լուսավոր Հայաստան, Հայկական Վերածնունդ և Բարգավաճ Հայաստան կուսակցությունները, որոնք Վանաձորի նորընտիր ավագանիում միասին ունեն 18 մանդատ, ստորագրեցին համագործակցության հուշագիր, որով կողմերը պարտավորվեցին Վանաձորի ավագանու առաջիկա նիստում միասնաբար պաշտպանել Քրիստ Մարուքյանի թեկնածությունը:

Հուշագրի տակ ստորագրեցին երեք կուսակցությունների ղեկավար մարմինների ներկայացուցիչները և ավագանու բոլոր 18 անդամները: Այս պայմաններում չափազանց տարօրինակ է դառնում, թե ինչ տրամաբանությամբ և ակնկալիքով է ՀՀԿ-ն առաջադրելու սեփական թեկնածուին Վանաձորի ավագանու ընտրություններում, եթե Հանրապետականը և ՀՅԴ-ն միասին ատացել են 15 մանդատ, իսկ ընդդիմությունը՝ 18 մանդատով պաշտոնապես հայտարարել և ստորագրել է Լուսավոր Հայաստանի քաղաքապետի թեկնածուի օգտին քվեարկելու մասին: Կարելի՞ է արդյոք ենթադրել, որ Հանրապետական կուսակցությունը փնտրում է զարտուղի ճանապարհներ` սեփական 15 ձայնը ավելացնելու և տարատեսակ խարդավանքների միջոցավ առավելություն ստանալու համար:

Սա տարօրինակ և միևնույն ժամանակ չափազանց մտահոգիչ հարց է, որը բացահայտում է Վանաձորի ավագանու առաջիկա նիստում Հանրապետական կուսակցության հնարավոր գործողությունները»։

Աղբյուր` Փաստինֆո