Փաստ ինֆո

Երևանի Էրեբունի և Նուբարաշեն վարչական շրջանների դատարանն այսօր զանգվածային անկարգությունների վերաբերյալ երկու գործեր ըստ ընդդատության ուղարկեց Երևանի Կենտրոն և Նորք-Մարաշ վարչական շրջանների դատարան: 

Մասնավորապես, դատարանը՝ դատավոր Ա.Գաբրիելյանի նախագահությամբ, որոշեց ըստ ընդդատության Երևանի Կենտրոն և Նորք-Մարաշ վարչական շրջանների դատարան ուղարկել ՀՀ քրեական օրենսգրքի 225-րդ հոդվածի՝ զանգվածային անկարգություններ, 2-րդ մասով մեղադրվող Արսեն Մկրտումյանի, Գագիկ Միքայելյանի և Սոսո Մարգարյանի գործը:

Դատարանի հիմնավորումների համաձայն, գործի նյութերից երևում է, որ ամբաստանյալներ Ա.Մկրտումյանին, Գ.Միքայելյանին և Ս.Մարգարյանին ՀՀ քրեական օրենսգրքի 225-րդ հոդվածի 2-րդ մասով մեղսագրվող հանցագործություններն սկսվել և ավարտվել են Երևանի Մովսես Խորենացի և Քրիստափոր փողոցների խաչմերուկում:

Ի պատասխան Երևանի Կենտրոն վարչական շրջանի ղեկավարին հասցեագրված գրության` 23.09.2016թ. դատարանը տեղեկացվել է, որ այդ հատվածը գտնվում է Կենտրոն վարչական շրջանի տարածքում:

Ուստի՝ դատարանը գտել է, որ գործը պետք է ուղարկել ըստ ընդդատության, հակառակ դեպքում, գործը Երևանի Էրեբունի և Նուբարաշեն վարչական շրջանների ընդհանուր իրավասության դատարանում քննելով, կխախտվեն քրեական գործի քննության ՀՀ քրեական դատավարության օրենսգրքով նախատեսված ընդդատության կանոները:

Ըստ մեղադրանքի՝ հուլիսի 20-ին սկսված զանգվածային անկարգությունների ժամանակ դրանց մասնակից Արսեն Մկրտումյանը վազքով մոտենալով ոստիկանության ծառայողների կողմից կազմված պատնեշին, ոտքով հարվածել է ոստիկանին, ապա քարի կտոր է նետել ոստիկանների ուղղությամբ: Նույն ժամանակ Գագիկ Միքայելյանը և Սոսո Մարգարյանը պարբերաբար տեղաշարժվելով զանգվածային անկարգությունների կատակարման վայրում, տարբեր հատվածներից քարեր են նետել ոստիկանների վրա:

Ըստ ընդդատության Երևանի Կենտրոն և Նորք-Մարաշ վարչական շրջանների դատարան ուղարկելու որոշում կայացրեց նաև Էրեբունի և Նուբարաշեն վարչական շրջանների դատարանի մեկ այլ դատավոր Ա.Դանիբեկյանը՝ զանգվածային անկարգությունների մեկ այլ՝ Հայկ Հովհաննիսյանի, Արման Մխիթարյանի, Նարեկ Սարգսյանի և Ալբերտ Ավագյանի գործով՝ բոլոր չորս ամբաստանյալները մեղադրվում են ՀՀ քրեական օրենսգրքի 225-րդ հոդվածի 2-րդ մասով:

Ըստ մեղադրանքի, Հայկ Հովհաննիսյանը 2016թ. հուլիսի 20-ին Երևան քաղաքում տեղի ունեցած զանգվածային անկարգությունների ընթացքում բռնություն է գործադրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցների նկատմամբ` ոտքով հարվածներ է հասցրել ոստիկանության ծառայողներին, նրանց ուղղությամբ նետել քար, մետաղյա ձողին նմանվող իր և փայտե կտորներ:

Արման Մխիթարյանն, ըստ մեղադրանքի, զանգվածային անկարգությունների ընթացքում բռնություն է գործադրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցների նկատմամբ` քարեր է նետել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցների վրա:

Նարեկ Սարգսյանին առաջադրված մեղադրանքի համաձայն, նա զանգվածային անկարգությունների ընթացքում բռնություն է գործադրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցների նկատմամբ` ձեռքերով, ոտքերով և մահակով հարվածներ է հասցրել իրենց ծառայողական պարտականությունները կատարող, իշխանության ներկակացուցիչ հանդիսացող ոստիկանության աշխատակիցներին:

Ալբերտ Ավագյանն, ըստ մեղադրանքի, զանգվածային անկարգությունների ընթացքում բռնություն է գործադրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցների նկատմամբ` ոտքերով և ձեռքերով հարվածել է իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, ապա քաշել և փորձել է խլել մեկ այլ ոստիկանության աշխատակցի վահանը:

Լուսանկարը՝ ֆոտոլուրի

Աղբյուր` Փաստինֆո