Փաստ ինֆո

Վերաքննիչ դատարանը մերժել է իշխանության ներկայացուցչի նկատմամբ բռնություն գործադրելու մեջ մեղադրվող Վարդան Ենոքյանի պաշտպան Հայկազ Գալստյանի բողոքը:

Պաշտպանը մեզ հետ զրույցում նշեց, որ Վ.Ենոքյանի նկատմամբ առաջին ատյանի դատարանի կողմից կալանավորումը որպես խափանման միջոց ընտրվելու որոշման դեմ իր կողմից ներկայացված վերաքննիչ բողոքը մերժվել է՝ անփոփոխ մնալով առաջին ատյանի դատարանի որոշումը:

Ծեծի ենթարկվածը կալանավորվել է

Ավելի վաղ տեղեկացրել էինք, որ օգոստոսի 12-ին Կարբի Ձոր հանգստյան վայրում ընտանեկան խնջույքի ժամանակ 30-ամյա Վարդան Ենոքյանի և նրա կնոջ միջև վիճաբանություն է ծագել, որի ժամանակ տղամարդը հայհոյել է կնոջը:

Մի քանի անգամ նույն իրավիճակը կրկնվելուց հետո վիճաբանությանն ականատես տարածքում ծառայություն իրականացնող ոստիկանության աշխատակիցները մոտեցել են Վարդանին, սակայն վերջինս ներողություն է խնդրել հասարակական վայրում իրեն այդ կերպ պահելու համար:

Այս ամենից հետո ոստիկանի և Վարդանի միջև քաշքշուկ է եղել և ոստիկանը հարվածել է Վարդանի դեմքին, ինչի հետևանքով վերջին վայր է ընկել գետնին՝ ծնկների վրա, այդ ժամանակ Վարդանի թիկունքից մոտեցել է մյուս ոստիկանը, ով ևս հարվածել է նրան:

Դեպքից հետո Վարդանին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով՝ այն է ոստիկանի նկատմամբ կյանքի կամ առողջության համար ոչ վտանգավոր բռնություն գործադրելը, որից հետո կալանավորվել է:

Պաշտպան Հայկազ Գալստյանը մեզ հետ զրուցում տեղեկացրել էր, որ Վարդանն իրեն առաջադրված մեղադրանքը չի ընդունում:

Աղբյուր` Փաստինֆո