Փաստ ինֆո

2016 թ.-ի օգոստոսի 5-ին ԱՄՆ դեսպան Ռիչարդ Միլսը և ԵՄ Քաղաքական հարցերի պատասխանատու Անդրեա Խալուպովան այցելեցին «Իրավունքների պաշտպանություն առանց սահմանների» հասարակական կազմակերպության գրասենյակ:

Հանդիպման ժամանակ դեսպան Միլսը հետաքրքրվեց՝ ինչ խնդիրներ կամ դժվարություններ են ծագել 2016թ. հուլիսի 17-ից մինչ օրս խաղաղ երթերի ժամանակ ոստիկանների կողմից բռնության ենթարկված քաղաքացիների իրավունքների պաշտպանության գործում:

Այս  մասին հաղորդագրությամբ է հանդես եկել ՀԿ-ն, որում մասնավորապես ասվում է.

«2016 թ.-ին ի պաշտպանություն «Սասնա Ծռեր» խմբավորման տեղի ունեցան խաղաղ բնույթ կրող երթեր, որի ժամանակ, մասնավորապես՝ հուլիսի 17-ին, Խորենացի փողոցում և հուլիսի 29-ի լույս 30-ի գիշերը «Սարի թաղում» ոստիկանների կողմից բռնության ենթարկվեցին և ապօրինաբար ոստիկանության բաժանմունքներ բերման ենթարկվեցին բազմաթիվ քաղաքացիներ, լրագրողներ:

Կազմակերպությունը ևս ստանձնել է այդ օրերին ոստիկանության ապօրինի գործողություններից տուժած քաղաքացիների իրավունքների պաշտպանությունը:

Կազմակերպության նախագահ Հայկուհի Հարությունյանը ներկայացրեց այդ դեպքերի վերաբերյալ հավաքագրված ինֆորմացիան, ինչպես նաև՝ այն խնդիրները, որոնք ծագել են ոստիկանության գործողություններից տուժած քաղաքացիների իրավունքների պաշտպանության հարցում: Կազմակերպության աշխատակիցներն իրենց գնահատականը տվեցին տեղի ունեցած դեպքերի վերաբերյալ:

Դեսպան Միլսը նշեց. «Վերջին երկու շաբաթների ընթացքում Հայաստանում շեշտադրվեց այն կազմակերպությունների կարևորությունը, որոնք զբաղվում են մարդու իրավունքների պաշտպանության ու մոնիտորինգի հարցերով, որոնցից մեկն էլ «Իրավունքների պաշտպանություն առանց սահմանների» հասարակական կազմակերպությունն է: Ինչպես «Իրավունքների պաշտպանություն առանց սահմանների» հասարակական կազմակերպությունը, այնպես էլ դեսպանատունը խորապես անհանգստացած են Էրեբունու դիմակայության օրերին ոստիկանության կողմից ցուցարարների նկատմամբ անհամաչափ ուժի կիրառման ու իրենց աշխատանքն իրականացնող լրագրողներին թիրախավորելու մասին արժանահավատ հաղորդումներով:

Դեսպանատունը մտահոգված է, որ դեռևս շարունակվում են խաղաղ հավաքներ անցկացնելու ու խոսքի ազատության իրենց իրավունքն իրացնող քաղաքացիներին բերման ենթարկելու մասշտաբային դրսևորումները, ինչը տեղի ունեցավ նաև երեկ գիշեր, երբ ցույցի ավարտին 25 ցուցարարներ ոստիկանության կողմից բերման ենթարկվեցին՝ անբացատրելի պատճառներով: Ուժային կառույցները և կառավարությունը չպետք է օգտագործեն հասարակական անվտանգությունն ու կարգը պահպանելու իրենց պարտավորությունը որպես միջոց, որով կվախեցնեն Հայաստանի քաղաքացիներին՝ իրացնելու խաղաղ ցույցերի մասնակցելու իրենց իրավունքը»:

Անդրեա Խալուպովան ևս նշեց, որ անհանգստացած է Հայաստանում վերջին իրադարձությունների հետ կապված մարդու իրավունքների լայնածավալ խախտումներով:

Հանդիպման վերջում կողմերը հույս հայտնեցին, որ ոստիկանության կողմից թույլ տված խախտումները համապատասխան քննության կենթարկվեն և մարդու իրավունքների լուրջ խախտումների համար մեղավոր անձիք պատասխանատվության կենթարկվեն»:

Աղբյուր` Փաստինֆո