Փաստ ինֆո

Պետական դավաճանության վերաբերյալ գործով այսօրվա դատական նիստում մեղադրող Արամ Արամյանը միջնորդեց բոլոր երեք ամբաստանյալներին մեղավոր ճանաչել ՀՀ քրեական օրենսգրքի 299-րդ հոդվածի 1-ին մասով՝ Պետական դավաճանությունը,  և դատապարտել տևական ազատազրկման: 

Մասնավորապես, մեղադրողը միջնորդեց ամբաստանյալ Ռաֆիկ Պապոյանին դատապարտել հոդվածով նախատեսված առավելագույն պատժաչափի՝ 15 տարվա ազատազրկման՝ գույքի բռնագրավմամբ, ամբաստանյալ Կարինե Ղումաշյանին՝ 14 տարվա 6 ամսվա ազատազրկման՝ գույքի բռնագրավմամբ, իսկ ամբաստանյալ Սերգեյ Պապոյանին՝ 14 տարվա ազատազրկման՝ գույքի բռնագրավմամբ: Վերջինիս մասով մեղադրողը միջնորդեց նաև «չհեռանալու ստորագրություն» խափանման միջոցը փոխել և ընտրել  կալանավորումը:

Դատախազը նշեց, որ ամբաստանյալներին առաջադրված մեղադրանքը լիովին ապացուցված է, նրանց մեղսագրվող արարքներն էլ ճիշտ են որակված:

Այսպիսով, ըստ մեղադրողի, հիմնավոր է մեղադրանքն, ըստ որի Ռաֆիկ Պապոյանը՝ բնակվելով Թուրքիայում, հավաքագրվել է այդ երկրի տարածքում գործունեություն ծավալած, Ադրբեջանի հետախուզական ծառայությունների աշխատակիցը հանդիսացող, Սեյրան ավունով ներկայացած անձի կողմից և կատարել է այդ հետախուզական ծառայության առաջադրանքները` Հայաստանից Թուրքիա ժամանած ՀՀ քաղաքացիների միջից ընտրել Ադրբեջանի հետախուզական ծառայությունների համար հետաքննություն ներկայացնող անձանց ու հավաքագրման նպատակով ծանոթացնել նրա հետ:

Հիմնավոր է ամբաստանյալ  Կարինե Ղումաշյանին առաջադրված մեղադրանքն, ըստ որի նա ևս բնակվելով Թուրքիայում՝  ընկել է այդ երկրի տարածքում գործունեություն ծավալած Ադրբեջանի հետախուզական ծառայությունների տեսադաշտը և 2013թ. հավաքագրվել այդ ծառայությունների աշխատակիցը հանդիսացող Արման անունով ներկայացած անձնավորության կողմից: Ստանալով վարձատրություն` մոտ 1500 ԱՄՆ դոլար գումարի չափով, ստացել է առաջադրանք` կիրառելով գաղտնապահության կանոնների պահպանման մեթոդները` Հայաստանի տարածքից չզանգահարել Արման անունով ներկայացած անձին և այդ ծանոթության մասին ոչ մեկին չհայտնել:

Լիովին ապացուցված է նաև Սերգեյ Պապոյանին առաջադրված  մեղադրանքն,  ըստ որի նա Թուրքիայում բնակվող հոր` Ռաֆիկ Պապոյանի ուղղորդմամբ, Վրաստանի Թբիլիսի քաղաքում հանդիպել է Ադրբեջանի հետախուզական ծառայությունների աշխատակիցը հանդիսացող, Սեյրան անունով ներկայացած անձի հետ և հավաքագրվել վերջինիս կողմից` տրամադրելով տեղեկություն ԼՂՀ Մարտունու շրջանում որպես հետախույզ ժամկետային զինծառայության ընթացքում տիրապետած տեղեկությունների վերաբերյալ:

Վճարելով 750 ԱՄՆ դոլլար գումար` վերոհիշյալ Սեյրանը տվել է առաջադրանք` ընդունվել պայմանագրային ծառայության Մատաղիսի զորամասերից մեկում և տեղեկություններ հայտնել այդ զորամասի մասին համացանցի «սկայպ»  ծրագրի կամ «օդնոկլասնիկի»  սոցիալական ցանցի միջոցով:

Մեղադրողը նշեց, որ մեղադրանքը հաստատվել է նախաքննությամբ ու դատաքննությամբ ձեռք բերված ապացույցներով, որոնք վերաբերելի են, թույլատրելի ու համակցության մեջ հիմնավորում են մեղադրանքը:

Հաջորդ դատական նիստում ճառերով հանդես կգա պաշտպանական կողմը՝ պաշտպաններն ու ամբաստանյալները:

Աղբյուր` Փաստինֆո