Փաստ ինֆո

«Օֆշորի գործով» այսօրվա դատական նիստում հարցաքննվեց ՀՀ կենտրոնական բանկի վերահսկող վկան, ով դատարան էր հրավիրվել տուժող կողմի միջնորդությամբ:

Վկան խումբ էր կազմել ու այս գործի քննության շրջանակում 2014թ. ստուգումներ անցկացրել Ամերիաբանկում՝ բանկի և գործով միակ ամբաստանյալ Աշոտ Սուքիասյանին պատկանող «Ձորագյուղ» արտադրական կոոպերատիվի միջև կնքված վարկային պայմանագրի շուրջ: Ստուգման հաշվետվությունը կազմվել է քննիչի առաջադրած հարցերի հիման վրա, մասնավորապես, 10 մլն 700 հազար դոլար վարկավորման գործընթացն, արդյոք, համապատասխանե՞լ է օրենսդրությանը և ներքին իրավական ակտերին, և արդյո՞ք վարկը նպատակային է օգտագործվել:

Վարկային պայմանագրով նպատակ է դրվել համալրել շրջանառու միջոցները, մարել կրեդիտորական պարտքերը և իրականացնել ֆինանսատնտեսական գործունեություն: Մեկ կարճաժամկետ նպատակ էր դրվել՝ ադամանդի արդյունահանում և մեկ երկարաժամկետ նպատակ՝ Հայաստանում առևտրի կենտրոնի հիմնում ու բիզնեսի ընդլայնում:

ԿԲ-ի խումբը որևէ խախտում չի հայտնաբերել, գտել է, որ վարկավորման գործընթացն իրականացվել է օրենսդրությանն ու ներքին փաստաթղթերին համապատասխան: ԿԲ-ն՝ հիմնվելով Ամերիաբանկի մոնիթորինգների արդյունքների վրա, գտել է, որ վարկն օգտագործվել է նպատակային:

Տուժող կողմի հարցերը բազմաթիվ էին, մասնավորապես, կողմին հետաքրքրում էր՝ եթե բիզնես ծրագրով 9 մլն դոլարի սարքավորում պետք է ձեռք բերվեր, սակայն այն ձեռք է բերվել 100 հազար դոլարի չափով, արդյոք դա կարելի՞ է համարել նպատակային օգտագործված վարկ:

Ամբաստանյալի պաշտպան Յուրիկ Խաչատրյանն առարկեց հարցադրման դեմ՝ նշելով, որ վարկային պայմանագրում նման թիվ նշված չէ, այն առկա է բիզնես պլանում:

Տուժող Փայլակ Հայրապետյանի ներկայացուցիչ Շալիկո Փիրուզյանը անընդհատ հարցադրումներ ու դիտարկումներ էր անում, թե Կենտրոնական բանկը՝ լինելով վերադաս բանկ, ինչու այս ու այս չի արել: Դրան ի պատասխան մեղադրողը հայտարարեց, որ սուբյեկտիվիզմի պայքար է ընթանում, նախ պետք է ճշտել ԿԲ լիազորությունները, անընդհատ նույն բանը կրկնվում է՝ ԿԲ-ն վերադաս բանկ է, Ամերիաբանկն էլ առևտրային բանկ է, ստացվում է ինչ-որ շրջապտույտ, ասաց դատախազը:

Դատարանում նախատեսում է հարցաքննել ևս մեկ վկայի, ով 1-2 տարի է, ինչ այլևս չի աշխատում Կենտրոնական բանկում, ինչպես նաև Ամերիաբանկի ներկայացուցիչներին:

Հիշեցնենք, ամբաստանյալ Աշոտ Սուքիասյանը մեղադրվում է ՀՀ քրեական օրենսգրքի 190-րդ հոդվածի 3-րդ մասի 1-ին կետով՝ առանձնապես խոշոր չափերով հանցավոր ճանապարհով ստացված եկամուտներն օրինականացնելը (փողերի լվացումը), 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն, և 205-րդ հոդվածի 2-րդ մասով՝ առանձնապես խոշոր չափերով հարկերը վճարելուց չարամտորեն խուսափելը:

Ըստ մեղադրանքի՝ Աշոտ Սուքիասյանը խարդախությամբ ուրիշի առանձնապես խոշոր չափերով գույքի նկատմամբ իրավունք է ձեռք բերել, օրինականացրել հանցավոր ճանապարհով ստացված առանձնապես խոշոր չափերով եկամուտներ, ինչպես նաև չարամտորեն խուսափել է առանձնապես խոշոր չափերով հարկեր, տուրքեր և պարտադիր այլ վճարումներ կատարելուց:

Աղբյուր` Փաստինֆո