Փաստ ինֆո

Հիմնադիր խորհրդարանի անդամ Գևորգ Սաֆարյանի պաշտպան, փաստաբան Տիգրան Հայրապետյանը քիչ առաջ միջնորդեց փոխել իր պաշտպանյալի խափանման միջոց կալանավորումը, իսկ մերժելու դեպքում՝ կիրառել գրավ: Սա կալանավորումն այլ խափանման միջոցով փոխարինելու կամ գրավ կիրառելու՝ պաշտպանի արդեն երկրորդ միջնորդությունն է՝ առաջինը դատարանի կողմից մերժվել է:

Պաշտպանն իր միջնորդության մեջ հիմնական շեշտը դրեց մեղադրանքի անհիմն լինելու վրա: Ըստ նրա՝ մեկ րոպե տևած միջադեպի ընթացքում մեղադրանքի կողմը կարողացել է հավաքի մասնակիցների կողմից ոստիկանների հանդեպ հինգ բռնության դեպքեր տեսնել և ոչ մի անօրինական արարք չտեսնել ոստիկանների գործողություններում:

Ըստ Տ.Հայրապետյանի, տեսագրությունից երևում է, որ տուժող ոստիկան Գեղամ Խաչատրյանը տասից ավելի հարվածներ է հասցնում, որոնք ըստ մեղադրանքի կողմի, նպատակ ունեն հավաքի մասնակիցներին վախեցնել ու ինչ-ինչ գործողություններից զերծ պահել: Պաշտպանը նշեց, որ նման կերպ խեղաթյուրվել է իրականությունը: Մեղադրանքի անհիմն լինելու մասին է վկայում նաև, ըստ պաշտպանի, այն, որ Գևորգ Սաֆարյանի կողմից ոստիկանին ոտքով հարվածելու ենթադրյալ հանգամանքն ի հայտ է եկել միջադեպից երկու ամիս անց:

Հակառակը, ըստ պաշտպանի, ոստիկանն էր ագրեսիվ վարքագիծ դրսևորում. նրա ընկերները հեռացնում էին հավաքի մասնակիցներից, սակայն ոստիկանը, ընկերներից ազատվելով, նորից մոտենում է ու հարվածներ հասցնում:

Ըստ Տ.Հայրապետյանի, Գևորգ Սաֆարյանի հանդեպ Գեղամ Խաչատրյանը ուներ թշնամական վերաբերմունք: Դրա մասին է վկայում նրա ֆեյսբուքյան էջում երկու գրառումները: Դրանցից մեկում նա նշել է, որ գնում է հասարակական կարգը պաշտպանելու կապիկներից, որոնք զվռնում են հրապարակում, իսկ երկրորդում վիրավորանքներ է հասցրել Գ.Սաֆարյանի ու նրա հարազատների հասցեին:

Պաշտպանն ամփոփեց, որ իրավաբանությունն ու ողջամտությունը հեռացել են այս գործից:

Մեղադրողը հայտարարեց, որ առարկում է միջնորդության դեմ: Նա ընդգծեց, որ պաշտպանական կողմը հղումներ է կատարում տեսաձայնագրություններին, մինչդեռ դրանք գնահատվել են այլ ապացույցների հետ մեկտեղ, և դրանցով չի հերքվում մեղադրանքը: Ըստ մեղադրողի, չեն վերացել կալանավորման հիմքերը:
Դատարանը հեռացավ խորհրդակցական սենյակ՝ որոշում կայացնելու:

Մինչ այդ դատարանում հրապարակվեցին միջադեպը պատկերող երկու տեսանյութեր, ինչպես նաև Գ.Սաֆարյանի պաշտպանի հետ ԶԼՄ-ի հարցազրույցի տեսանյութը՝ դրանում ևս տեղ էին գտել կադրեր միջադեպից:

Տեսանյութի շուրջ ցուցմունքներ տվեց ամբաստանյալը՝ նշելով, որ տեսանյութից երևում է, որ Գեղամ Խաչատրյանը հայհոյում է, և ինքը նրան հարցնում է՝ ինչո՞ւ եք հարվածում, որ մենք պատասխանե՞նք: Չէին պատասխանում և չենք պատասխանել, ասաց Գ.Սաֆարյանը: Տեսանյութից երևում է նաև, որ հրապարակում տոնական մթնոլորտ էր տիրում՝ միջադեպը տեղի է ունեցել Ամանորի գիշերը, եթե սադրանք չլիներ, մինչև վերջ միջադեպն էլ չէր լինի:

Ըստ ամբաստանյալի, ինքը որևէ հարված չի հասցրել Գեղամ Խաչատրյանին, և տեսանյութում որևէ տեղ չի երևում, որ ինքը հարվածներ է հասցրել՝ մեկը ոտքով և մեկը՝ ձեռքով: Ակնհայտ սուտ է, ընդամենը «քաղաքական վերնախավից հրահանգ են ստացել գործ սարքել» իր վրա, ասաց ամբաստանյալը:

Ըստ Գ.Սաֆարյանի, ոստիկանությունը խախտել է իրենց ազատ արտահայտվելու, ազատ տեղաշարժվելու, հավաքների ազատությունը: Նա ընդգծեց, որ, ըստ օրենքի դրույթի, եթե հավաքը խաղաղ է, ոստիկանությունը պարտավոր է աջակցել հավաքին:

Ըստ Գ.Սաֆարյանի, քննչական մարմինը միջոցներ չի ձեռնարկել, որպեսզի պարզվի միջադեպը տեսանկարահանող առնվազն երեք ոստիկանի ինքնությունը, որպեսզի նրանց կատարած, ինչպես նաև տարածքի տեսահսկման սարքերի տեսագրությունները առգրավվեն ու կցվեն գործին: Ըստ ամբաստանյալի, սա ևս վկայում է, որ ինքն անմեղ է, հակառակ դեպքում նման միջնորդությամբ հանդես չէր գա: Նա հավելեց, որ գործը քաղաքական է և հրահանգ է եղել Գևորգ Սաֆարյանին պահելու ճաղերի հետևում:

Իսկ ամբաստանյալի պաշտպանն իր հերթին հայտարարեց, որ իրենք տեսանյութ ունեն, որը կներկայացնեն, դրանից երևում է, որ ոստիկանների ասածները չեն համապատասխանում իրականությանը:

Լուսանկարը՝ Ֆոտոլուրի

Աղբյուր` Փաստինֆո