Փաստ ինֆո

«Լեռնային Ղարաբաղում ռազմական գործողությունների վերջին վերսկսումը մեզ հիշեցրեց, թե որքան արագ կարող են հալվել սառեցված հակամարտություները»: Այս մասին, ըստ1in.am-ի, Եվրոպայում մարդու իրավունքների 2015 թվականի իր զեկույցի առաջին իսկ տողերում արձանագրել է Եվրոպայի խորհրդի գլխավոր քարտուղար Թորբյորն Յագլանդը:

Ըստ Յագլանդի զեկույցի,  դատական համակարգը գործնականում անկախ չէ, և այդ մասին հաղորդումները շարունակվում են, չնայած այն բանին, որ Հայաստանը ներկայացրել է լայն բարեփոխումներ՝ քրեականացնելով դատավորի վրա ազդելու փորձերը և սահմանել դատավորի համար նման փորձերի մասին հաղորդելու պարտավորություն։

ԵԽ մարդու իրավունքների հանձնակատարը Հայաստան իր այցի արդյունքներով զեկույցում նշել է, որ դատական համակարգի վերին օղակները միջամտում են ստորին դատական ատյանների աշխատանքին, ինչպես նաև կան արտաքին դերակատարներ, ինչպիսին գործադիր իշխանությունն է։

ԵԽ անդամ երկրների մեծամասնությունում չկան հստակ կանոնակարգեր՝ համացանցում օգտատերերի գործունեության ուսումնասիրման համար, սակայն որոշ երկրներ որդեգրել են այնպիսի քաղաքականություն, որի նպատակն է ամրապնդել առցանց բովանդակության վրա վերահսկողությունը՝ փորձելով կանխել արգելված կոնտենտի տարածումը։ Այս երկրների շարքում են Հայաստանը, Ռուսաստանը, Մոլդովան, Ադրբեջանն ու Թուրքիան, նշվում է զեկույցում։

Անդրադարձ է եղել նաև հավաքների ազատության հարցին, ըստ այդմ,  Հայաստանում և ոչ միայն, դեռևս չկան արդյունավետ միջոցներ՝ իրավապահների կողմից հավաքների ազատության իրավունքի խախտումների դեմ։

Հայաստանում 2015-ի դեկեմբերին տեղի ունեցան սահմանադրական փոփոխություններ, որով մեծանում է խորհրդարանի դերը։ Այս քայլը, ինչպես նշվում է զեկույցում, կարող է հանգեցնել առավել ընդգրկուն քաղաքական գործընթացի, սակայն ժողովրդավարական մշակույթը և քաղաքացիական հասարակության հետ երկխոսությունը շարունակում են մնալ թույլ՝ առանցքային բարեփոխումների ողջ ընթացքում։

Յագլանդը նշում է, որ անցած տարի ԵԽ անդամ երկրներում տեղի է ունեցել ռասիզմի և անհանդուրժողականության ընդհանուր աճ։ Չնայած անդամ երկրներից շատերում առկա է խտրականության դեմ ուղղված օրենսդրություն, սակայն դեռևս առկա է բաց։ Մի շարք երկրներում, այդ թվում՝ Հայաստանում, Անդորրայում, Հունաստանում, Իտալիայում, ՌԴ-ում, Լեհաստանում, Լիխտենշտեյնում, Իսլանդիայում, Ադրբեջանում, Թուրքիայում չկան անկախ մարմիններ, որոնք կզբաղվեին խտրականության հարցերով ինչպես հանրային, այնպես էլ մասնավոր հատվածներում։

Ըստ գլխավոր քարտուղարի,  միևնույն ժամանակ ԵԽ անդամ երկրներում դեռ կան շատ կարևոր բացթողումներ օրենքներում և պրակտիկայում։ Մարդու հիմնարար իրավունքներն ավելի ու ավելի են սահմանափակվում։

Զեկույցում նշվում է, որ ԵԽ 47 անդամ երկրների մոտավորապես կեսը բավարար չափով չի երաշխավորում լրագրողների անվտանգությունը։

Գլխավոր քարտուղարի զեկույցում նշվում է նաև, որ ամբողջ մայրցամաքում սպառնալիքի տակ են մարդու իրավունքները, ժողովրդավարությունն ու անվտանգությունը՝ առաջարկելով ԵԽ անդամ երկրներում առկա խնդիրների լուծման տարբերակներ։