Փաստ ինֆո

«Պետք չէ սպասել, որ ԱՄՆ նախագահ Օբաման արտաբերի ցեղասպանություն բառը. «Դա հենց հայոց եղեռն է: Մարդկության դեմ ուղղված ինքնատիպ հանցագործություն, որը բոլոր հատկանիշներով նույնացվում է ցեղասպանության հետ», - Ծիծեռնակաբերդում պատասխանելով լրագրողնեի հարցերին ասել է ՀՀ արդարադատության նախկին նախարար Գեւորգ Դանիելյանը:

Գ.Դանիելյանն անդրադարձել է նաեւ Ցեղասպանության հարցում Թուրքիայի դիրքորոշմանը` փաստելով, որ մարդկության դեմ ուղղված այդ հանցագործությունից 101 տարի անց եւս Թուրքիայի դիրքորոշման ու քաղաքականության հարցում չկան փոփոխություններ:


«Թուրքիան հաճախ հայտարարում է, թե պատրաստ են իրենց արխիվները մեզ տրամադրել, որևէ խոչընդոտ չեն ստեղծելու, պատրաստ են փորձել համատեղ ուժերով, պատմաբանների հետ քննարկել ու եթե համոզվեն՝ տեղի է ունեցել ցեղասպանություն, կընդունեն, կշարժվենք առաջ: Դա այդքան էլ այդպես չէ, մեծ կեղծիք կա դրա տակ», - ասել է Գ. Դանիելյանը եւ նշել, որ նույն Թուրքիան հայտարարում է, թե 1919-20 թթ. քրեական գործերի նյութերն այլևս արխիվներում չեն պահպանվել, ոչնչացվել են, ավելին՝ հայտարարություն է տարածել, որ քրեական գործերի նյութերը, ամենայն հավանականությամբ, հափշտակվել են հայերի կողմից: Ավելին` հայտարարում են, որ շատ նյութեր կան, բայց քրեական գործերի դատավճիռների նյութերը չկան:

«Մինչդեռ Վատիկանի արխիվներում պահպանվել են շատ դատավճիռներ: Դատավճիռներում բառացի ոչ մի խոսք չկա ցեղասպանության մասին, բայց բովանդակային կտրվածքով կան: Դատավճիռներում այդ իրադարձությունների նկարագիրը դասական իմաստով հենց ցեղասպանություն է: Ուրիշ բան, որ դրա մասին քիչ են խոսում, փորձում են թաքցնել, բայց դրանից ոչինչ չի փոխվում: Դատավճիռները վկայում են, որ դրանք ոչ թե պատահական պատերազմական գործողություններով թելադրված սպանություններ են եղել, այլ կոնկրետ շարժառիթներով: Տեղաշարժն էլ տեղի է ունեցել ոչ թե մարդկանց անվտանգությունն ապահովելու նկատառումով, այլ նրանց՝ հնարավորինս ավելի դյուրին եղանակով ոչնչացնելու նպատակով: Դա ֆիքսվում է դատավճիռներով»,-ասաց Գևորգ Դանիելյանը: