Փաստ ինֆո

 

23-ամյա Արտուր Մկրտչյանը  մեղավոր է  ճանաչվել Չինաստանի Ժողովրդական Հանրապետության քաղաքացուն կողոպտելու մեջ՝  ՀՀ քրեական օրենսգրքի 176-րդ հոդվածի 2-րդ մասի 2-րդ և 4-րդ կետերով՝ խոշոր չափերով կողոպուտ, որը զուգորդվել է կյանքի կամ առողջության համար ոչ վտանգավոր բռնություն գործադրելով,  և դատապարտվել 3 տարի 3 ամիս ժամկետով ազատազրկման:

 

Ըստ նախաքննական մարմնի կողմից առաջադրված մեղադրանքի,  Արտուր Մկրտչյանը  2015թ. սեպտեմբերի 4-ին ժամը 13-ի սահմաններում, անձնական օգտագործման  ավտոմեքենայով Չինաստանի Ժողովրդական Հանրապետության քաղաքացուհի Ջինգ Մինգուանգի Շուին Կապանից Մեղրի տեղափոխելու ճանապարհին՝ Սյունիքի մարզի Ծավ գյուղի մոտակայքում, ավտոմեքենան խափանվելու մտացածին պատճառաբանությամբ, խնդրել է վերջինս իջնել ավտոմեքենայից և շարժիչը գործարկելու համար հրել այն: Վերջինս չմերժելով վարորդի խնդրանքը, իր անձնական իրերը թողնելով ավտոմեքենայում, դուրս է եկել և կանգնել ավտոմեքենայի հետնամասում: Սակայն այդ ժամանակ Ա.Մկրտչյանը, Ջ.Շուի առողջության համար ոչ վտանգավոր բռնություն գործադրելով՝ հետընթաց կտրուկ շարժմամբ հարվածել, վայր է գցել նրան՝ վերջինիս առողջությանը պատճառել թեթև վնասի հատկանիշներ չպարունակող քերծվածքների ձևով մարմնական վնասվածքներ, ապա դիմել փախուստի` բացահայտ հափշտակելով խոշոր չափերով՝ 1 185 609.2 ՀՀ դրամ ընդհանուր արժողության Ջ.Շուի անձնական իրերն ու դրամը՝ «ipad mini 2»  տեսակի պլանշետային 1 համակարգիչ,  «DEԼԼ» տեսակի 1 նեթբուք, «iphone 6 plus»  տեսակի բջջային 1 հեռախոս, «Canon»  տեսակի 1 ֆոտոխցիկ, «Nokia» տեսակի բջջային 1 հեռախոս, 1000 ԱՄՆ դոլար, 230 եվրո, 7000 ՀՀ դրամ, 605 չինական յուան, 10 թուրքական լիրա և 5 վրացական լարի: 

 

Դատական քննության նախապատրաստական փուլում ամբաստանյալ Ա.Մկրտչյանը ՀՀ քրեական օրենսգրքի 176-րդ հոդվածի 2-րդ մասի 2-րդ և 4-րդ կետերով առաջադրված մեղադրանքում իրեն մեղավոր չի ճանաչել  և նշել, որ տուժող Ջինգ Մինգուանգի Շուիից հափշտակություն չի կատարել, սակայն դատաքննության ընթացքում առաջադրված մեղադրանքի շուրջ հարցաքննվելիս Արտուր Մկրտչյանը վերոնշյալ առաջադրված մեղադրանքում իրեն լիովին մեղավոր է ճանաչել և նշել, որ զղջում է կատարածի համար, միաժամանակ օգտվելով իր դատավարական իրավունքից հրաժարվել դեպքի հանգամանքների վերաբերյալ ցուցմունք տալուց և կողմերի հարցերին պատասխանելուց:

 

Դատարանն արձանագրել է, որ ամբաստանյալը  նախաքննության ընթացքում նույնպես օգտվելով իր դատավարական իրավունքից,  հրաժարվել է ցուցմունք տալուց:

Տուժող   Ջինգ Մինգուանգի Շուի ցուցմունք է տվել, որ  2015թ. օգոստոս ամսվա կեսին որպես զբոսաշրջիկ Վրաստանից ժամանել է Հայաստան և այցելել տեսարժան վայրեր:

 

2015թ. սեպտեմբերի 3-ին պատահական մեքենաներով հասել է Կապան քաղաք՝ նպատակ ունենալով գնալ Իրան, այնտեղից էլ Լիբանան: Գիշերել է Կապանի «Լեռնագործ» հյուրանոցում, իսկ հաջորդ օրը քաղաքի կենտրոնից պատահական մեքենայով պատրաստվել է մեկնել Իրան: Կապանի փողոցներից մեկում իրեն է մոտեցել կարմիր գույնի մի ավտոմեքենա, որի հետին ապակու վրա կարիճ է պատկերված եղել: Նշված մեքենայի անծանոթ վարորդն առաջարկել է իրեն տանել Մեղրի, ինքը համաձայնվել և նստել է մեքենան: Սակայն նկատելով, որ վարորդը այլ ճանապարհով է ընթացել, հարցրել է վարորդից, այնուհետև իր մոտ եղած քարտեզով համոզվել, որ նշված ճանապարհը նույնպես տանում է Մեղրի:

 

Մոտ 2 ժամ ընթանալուց հետո վարորդը կանգնեցրել է ավտոմեքենան և հայտնել, որ այն խափանվել է ու խնդրել է իջնել ավտոմեքենայից և շարժիչը գործարկելու համար հրել այն: Չմերժելով վարորդի խնդրանքը և ոչինչ չկանխատեսելով, իր անձնական իրերը թողնելով ավտոմեքենայում, դուրս է եկել, կանգնել ավտոմեքենայի հետնամասում և փորձել հրել, սակայն այդ ժամանակ վարորդը մեքենայի հետընթաց կտրուկ շարժմամբ հարվածել և վայր է գցել իրեն ու դիմել փախուստի՝ իր հետ տանելով իր անձնական իրերն ու գումարը:   Մեքենայի հարվածից վայր ընկնելու հետևանքով մարմնական վնասվածքներ է ստացել:

 

Դեպքից հետո պատահական մեքենայով հասել է Ծավ գյուղ, այնտեղ պատմել եղելությունը, որից հետո գյուղացիների օգնությամբ կատարվածի մասին հայտնել է Կապանի ոստիկանություն:

 

Նախաքննության ընթացքում իրեն ճանաչման ներկայացված անձանց մեջ արտաքին հատկանիշներով ճանաչել է իր գույքը հափշտակած անձին, ով ինչպես պարզվել է հանդիսանում է Կապան քաղաքի բնակիչ, 1992թ ծնված՝ Արտուր  Մկրտչյանը: Իր մասնակցությամբ կատարված ավտոմեքենայի խուզարկությամբ հափշտակված ողջ գույքը հայտնաբերվել է, որը ճանաչվել է իր կողմից և վերադարձվել իրեն:

 

Ջինգ Շուին իր կողմից տրված ցուցմունքները պնդել է նաև Ա.Մկրտչյանի հետ առերես հարցաքննության ժամանակ:

 

Թեև դատական քննության ընթացքում Դատարանին, մեղադրող և պաշտպանական կողմերին չի հաջողվել  հարցեր առաջադրել և հարցաքննել տուժող Ջինգ Մինգուանգի Շուին, սակայն պաշտպանական կողմին նման հնարավորություն ընձեռվել է մինչդատական վարույթի ընթացքում, մասնավորապես` 2015թ. սեպտեմբերի 9-ի տուժող Ջինգ Մինգուանգի Շուի և կասկածյալ Արտուր  Մկրտչյանի միջև իրականացված առերեսման ընթացքում:

 

Քննչական այդ գործողության ժամանակ կասկածյալ Ա.Մկրտչյանին հարցադրումներ կատարելու իրավունք է վերապահվել, այսինքն` իրապես հնարավորություն է ունեցել հարցաքննելու իր դեմ ցուցմունք տված տուժողին և վիճարկել վերջինիս ցուցմունքները: Դատարանում տուժող Ջինգ Մինգուանգի Շուին հարցաքննելն  անհնարին է եղել Հայաստանի Հանրապետության տարածքից դուրս` Չինաստանի Ժողովրդական Հանրապետությունում գտնվելու կապակցությամբ: 

 

Դատարանն արձանագրել է, որ  տուժող Ջինգ Մինգուանգի Շուի վերը հիշատակված նախաքննական ցուցմունքները չեն հանդիսանում այն միակ ապացույցները, որոնց հիման վրա Դատարանն հետևության է հանգել ամբաստանյալ Ա.Մկրտչյանի մեղավորության վերաբերյալ:

 

Այդ ցուցմունքներում առկա փաստական տվյալներն հաստատվել են գործով ձեռք բերված այլ ապացույցներով, այդ թվում՝ ամբաստանյալ Ա.Մկրտչյանի կողմից առաջադրված մեղադրանքի շուրջ դատական քննության ընթացքում հայտնած դիրքորոշմամբ, երկու վկաների  դատաքննական և նախաքննական ցուցմունքներով, որոնց հարցաքննելու հնարավորություն Դատարանում պաշտպանական կողմն ունեցել և այդ իրավունքից օգտվել է:

 

Ուստի  Դատարանի համոզմամբ,  չեն խախտվել արդար դատաքննության իրավունքի էությունն ու բովանդակությունը կազմող` ամբաստանյալ Ա.Մկրտչյանի նվազագույն իրավունքները և չի հանգեցրել Կոնվենցիայի 6-րդ հոդվածի 3-րդ մասի (d) կետի խախտման, որով երաշխավորվում է իր դեմ ցուցմունք տված անձին հարցաքննելու անձի իրավունքը: